44
योसेफइ ह्रोंसए आघें-अलिमैंए जाँच लब
1 च लिउँइ योसेफइ ह्रोंसए धिंर्बै के लबै चिबने बिइ, “चमैंइ बोल् खाँबै म्ल्ह-नारिमैं चमैंए नेंदोंर झोंमिंन् धै चमैंए चाँदिए मुइ या चमैंए नेंदोंए सुँर थेंमिंन्।
2 झाइले ङए चाँदिए प्ह्येल नेरो म्ल्ह-नारिमैं किंब् बिसि चमैंइ पखबै चाँदि बालु लसि च्योंबए नेंदोंए सुँर झोंमिंन्।” छबिमा योसेफइ बिब् धोंलेन् चइ लइ।
3 प्हँन्हाँग्धों न्हाँगर्न योसेफइ ह्रोंसए आघें अलिमैं खेंमैंए गदामैंने बालुन् कुलमिंइ।
4 चमैं सहरउँइँले दे क्याइ फेनेबै लिउँइ योसेफइ केब्छैंमैं न्होंर्बै चिबने बिइ, “क्हि युन्ले च म्हिमैंए लिलि ह्यादु, धै चमैंने त्होसि ‘ङिइ छेन् लना लन् क्हेमैंइ ङिए न्होह्रों तले लल? बिद्।
5 ङए क्ल्हेए चाँदिए प्ह्येल तले पखल? चु प्ह्येलर्न ङए क्ल्हेइ थुँबै सैमैं थुँम्, धै च प्ह्येलउँइँलेन् चइ छ्याँब्-आछ्याँब फेलम् चु क्हेमैंइ बेल्ले आछ्याँबै के लइ।’ ”
6 च के लबै चिबइ चमैंने त्होबै लिउँइ क्ल्हेइ खै बिल छान् बिमा
7 चमैंइ के लबै चिबने बिइ, “ओ चिब, तले छाबै ताँ लल? छाबै के क्हिए केब्छैंमैंइ खोंयोंइ आल।
8 ङिए नेंदोंमैंए सुँर ओंसों योंबै चाँदि ङिइ कनान ह्युलउँइँले एसि चुर पखइ, आङिं वा? ङिइ खैले क्हिए क्ल्हेए धिंउँइँले चाँदि नेरो मारा ह्योमल?
9 क्हिए केब्छैंमैंए न्होंर खाब्ने च प्ह्येल स्यामुँ च सैवाद्। धै ङि या क्हिए केब्छैंमैं तब्मुँ।”
10 च चिबइ बिइ, “तम्, क्हेमैंइ बिब् धोंन् तरिगे। दिलेया खाब्ने बालु च प्ह्येल स्यामुँ च ङए केब्छैं तब्मुँ। अरूमैं बिस्याँ छ्याब् मुँब तरिब् आरे, चमैं ह्याल् खाँम्।”
11 छबिमा ताँनइ युन्ले ह्रों-ह्रोंसए नेंदों सर थेंसि प्ल्हइ।
12 झाइले च चिबइ थेब्मैंए नेंदोंउँइँले म्हैबै तों लमा च प्हेल बेन्यामीनए नेंदोंर योंइ।
13 छतमा चमैं सैं नसि ह्रोंसए क्वें ट्होइ। धै गदामैं फिर ति थेंसि सहरउँइ एखइ।
14 यहूदा नेरो चए आघें-अलिमैं योसेफए धिंर फेखमा च चर्न मुँल। धै चमैंइ चए ओंसों खसि फ्योइ।
15 योसेफइ चमैंने बिइ, “क्हेमैंइ छाबै के तले लल? आसेल्ले लबै के ङ धों तबै म्हिइ सेम् बिसि क्हेमैंइ आसेल् वा?”
16 यहूदाइ बिइ, “ङिइ क्हिने तो बिब, चु ताँर ङिइ खैले आङिं बिल् खाँमुँ? क्हिए केब्छैंमैंए आछ्याँबै केमैं परमेश्वरजी उँइँमिंइमुँ। तारे नेंदोंर च प्ह्येल स्याबै म्हि मत्त्रे आङिं, ङि ताँन् क्हिए केब्छैंमैं तइ।”
17 दिलेया योसेफइ बिइ, “ङ ङाँइले छाबै के खोंयोंइ तरिब् आरे। नेंदोंर च प्ह्येल स्याबै म्हि मत्त्रे ङए केब्छैं तब्मुँ। छतसि क्हेमैं छिं ङ्हाँन्ले ह्रोंसए आबा ङाँर सैं तोंदै ह्याद्।”
यहूदाइ बेन्यामीनए ल्हागिर यो छ्युँ लब
18 दिलेया यहूदा योसेफए उँइँर ह्यासि बिइ, “ओ ङए प्रभु, ङ यो छ्युँ लमुँ क्हिए केब्छैंइ ताँ घ्रि बिल् पिंन्। क्हि म्रुँ धों तबै थेबै म्हि ग दिलेया क्हिए केब्छैंने बालु ह्रिस आखमिंन्।
19 क्हिइ ह्रोंसए केब्छैंमैंने ‘क्हेमैंल आबा नेरो अरू अलि या मुँ वा?’ बिसि ङ्योएल
20 छतसि ङिइ क्हिने बिइ, ‘ङिए आबा खेब् तयाइमुँ। च खेब् तयाबै त्हेर्बै कोलो ङिल अलि च्योंब घ्रि मुँ। चए आघें सियाल् खाँइ। चए आमाउँइँले फिब तारे च घ्रि मत्त्रे मुँ। छतसि आबाइ चलाइ बेल्ले खोम्।’
21 “छबिमा क्हिइ ह्रोंसए केब्छैंमैंने ‘च चुर ङ ङाँर पखो, ङइ ङ्ह्योम्,’ बिइ।
22 ‘च कोलोइ ह्रोंसए आबा वाथेंल् आखाँ। चइ ह्रोंसए आबा वाथेंइ बिस्याँ चए आबा सियाब्मुँ,’ बिसि ङिइ क्हिने बिल।
23 दिलेया क्हिइ ङिने बिइ, ‘क्हेमैंए च्योंबै अलि क्हेमैंने बालु आपखस्याँ क्हेमैं धबै ङए ओंसों राल् योंरिब् आरे।’
24 “छतसि ङि ङिए आबा ङाँर ह्यासि क्हिइ बिबै ताँमैं चने बिइ।
25 छबिमा ङिए आबाइ बिइ, ‘धबै ह्यासि च्युगुदे म्ल्ह-नारिमैं किंइ पखो।’
26 छबिमा ‘ङि ह्याल् आखाँ। ङिए च्योंबै अलि ङिने बालु कुलस्याँ ङि ह्याब्मुँ। ङिए च्योंबै अलि ङिने बालु आकुलस्याँ ङि च म्हिए उँइँर ह्याल् योंरिब् आरे,’ बिसि ङिइ चने बिल।
27 “छबिमा ङिए आबाइ ङिने बिइ, ‘ङए प्ह्रेंस्यो राहेलउँइँले च्ह ङ्हिं तब क्हेमैंइ सेइमुँ।
28 चमैं न्होंरि च्ह घ्रिइ ङलाइ वाथेंइ। च त्हेसेरो ङइ चलाइ आम्रोंइमुँ, धै क्ह्रोंसेंन्लेन् क्ह्योंर्बै सिंहमैंइ चलाइ चवासि ङए च्ह च्यता-चिति लवालै।
29 चु च्योंबै या क्हेमैंइ ङ ङाँइले बोसि चए फिर तोइ तयास्याँ ङए चु सारयाबै क्र शोकने बालुन् क्रोंर सथेंनेब्मुँ।’
30 “छतसि ङि ङिए आबा ङाँर फेनेमा ङिने बालु चु कोलो आम्रोंसि आत। तलेबिस्याँ चु कोलो ङ्ह्योसिन् च सोरिइमुँ।
31 छतसि ङिने बालु चु कोलो आम्रोंबै तोदोंन् च सियाब्मुँ। ङि क्हिए केब्छैंमैंइ क्र सारयाबै ङिए आबा शोकने बालुन् क्रोंर सनेल् त्हुब्मुँ।
32 च्हौ मत्त्रै आङिं! क्हिए च्ह ङए अलि खैलसे या क्हि ङाँर एपखस्यो बिसि ङइ आबाने बिथेंइमुँ। ‘ङइ चु कोलो क्हि ङाँर एइ आपखस्याँ ङए छ्ह तिगोंन् ङ क्हिए ओंसों छ्याब् मुँबन् तरिब्मुँ।’
33 “छतसि चिब, ङ क्हिने यो छ्युँ लमुँ चु कोलोए क्ल्ह्योर ङ क्हिए केब्छैं तल् पिंन्। धै चु कोलो चए आघेंमैंने बालु धिंर एह्याल् पिंन्।
34 तलेबिस्याँ चु कोलो ङने बालु आबोल्ले ङए आबा ङाँर ङ खैले ह्याब? ङए आबाए फिर दुःख तब ङइ ङ्ह्योल् आखाँ।”