12
परमेश्वरजी पावललाइ पिंबै दर्शनमैं
1 खाबलाइ तोइ फायदा आतलेया ङइ ङ्हो लोंबै के लल् त्हुम्। तोगो ङइ प्रभुउँइँले योंबै दर्शनमैं नेरो क्होसे क्होल् आखाँबै ताँमैंए बारेर बिरिइमुँ।
2 येशूए फिर बिश्वास लबै ङइ ङो सेबै म्हि घ्रिलाइ च्युसे प्लिदि भन्दा ओंसों परमेश्वरजी तल सोंर्बै स्वर्ग समा क्वेबोइ। चलाइ ज्युर्न बोइ उ प्ल्ह मत्त्रे बोइ च ङइ आसे, च ताँ परमेश्वरजी सेइमुँ।
3 च म्हिलाइ स्वर्गर बोयाबै ताँ ङइ सेइमुँ, दिलेया चलाइ ज्युर्न बोइ उ प्ल्ह मत्त्रे बोइ च ङइ आसे, च ताँ परमेश्वरजीन् सेइमुँ।
4 चर म्हिए सुँउँइँले त्होंलै आतबै औदिबै ताँमैं चइ थेइ। च ताँमैं म्हिए सुँउँइँले पोंलन् आत।
5 छाबै म्हिए बारेर मत्त्रे ङइ प्हैंसि पोंमुँ, दिलेया ह्रोंसए बारेर बिस्याँ ङइ योंबै दुःख बाहेक अरू ताँर प्हैंसि आपों।
6 ङइ प्हैंबै सैं ललेया ङ बुद्धि आरेब् धों आत, तलेबिस्याँ ङइ क्ह्रोंसेंन्बै ताँ मत्त्रे पोंमल। दिलेया छाबै ताँर ङ थेब् प्हैंदा आङ्हाँ। तलेबिस्याँ म्हिमैंइ ङइ तो लब म्रोंइमुँ, ङउँइँले तो ताँ थेइमुँ, च भन्दा बडि चमैंइ ङलाइ आमैंरिगे बिब ङए सैं मुँ।
7 दिलेया छाबै औदिबै दर्शनमैं ङइ ल्हें म्रोंलेया ङ थेब् आप्हैंरिगे बिसि प्रभुजी ङए ज्युर पुजु घ्रि थेंमिंइ। ङ थेब् आप्हैंरिगे बिसि च पुजु अथबा दुष्टए दूत घ्रि ङलाइ ह्रुगुदिबर थेंमिंइ।
8 “चु दुःख पिंबै पुजु ङउँइँले स्योमिंन्” बिसि ङइ सोंखे समा प्रभुने प्राथना लइ।
9 दिलेया प्रभुजी ङने बिइ, “ङए दयाम्हाँया योंसेरो क्हिलाइ अरू सै तोइ आचैदि, तलेबिस्याँ क्हि आखाँ आथुबै त्हेर ङए भोंइन तोन्दोंरि के लम्।” छतसि ख्रीष्टए भों ङने तरिगे बिसि आखाँ आथुबै त्हेरै या ङ सैं तोंन्लेन् प्हैंब्मुँ।
10 छतसि ख्रीष्टए मिं थेब् तरिगे बिसि ङ आखाँ आथुलेया, म्हिमैंइ ङलाइ प्ह्रलेया, सैदिलै आखाँबै दुःख तलेया ङ सन्दोक तम्, तलेबिस्याँ आभोंबै त्हेरै या ङ बेल्ले भोंब् तम्।
कोरिन्थथेंमैंए ल्हागिर पावलइ न्हुँ लब
11 ङलाइ बुद्धि आरेबै म्हि तबर क्हेमैंन कर ल्हैदिइ। क्हेमैंइ अरूमैंए छ्याँबै बयन लसि चमैंलाइन “बेल्ले छ्याँबै कुल्मिंबै चेला चिब्मैं” बिमुँ, चमैंए उँइँरम् क्हेमैंइ ङए बारेर छ्याँबै बयन लल् त्हुमल। तलेबिस्याँ ङ तोइ आङिंलेया चमैं भन्दा ङ तोरै च्योंब् आरे।
12 “ङ क्ह्रोंसेंन कुल्मिंबै चेला चिब ग” बिसि उँइँबर ङइ सैदिल् त्हुबै सैमैं तोन्दोंरि सैदिसि क्हेमैंए उँइँर ङइ औदिबै चिनु मुँबै केमैं लल।
13 अरू क्ल्ह्योर्बै बिश्वासीमैंलाइ भन्दा क्हेमैंलाइ ङइ च्युगुदे म्हाँया लइमुँ वा? ओं, बिलन् त्हुमा क्हेमैंइ ङलाइ क्षमा पिंल् त्हुबै ताँ घ्रि मुँ, तलेबिस्याँ क्हेमैंने ङइ खर्ज आह्रि!
14 तारे चु सोंखेबै लारै या ङ क्हेमैं ङाँर खसिन्मुँ। ङइ क्हेमैंने तोइ खर्ज ह्रिरिब आरे, तलेबिस्याँ ङलाइ क्हेमैंए मुइ आङिं क्हेमैं चैदिम्। आबा-आमाए ल्हागिर प्हसेमैंइ सै न्होर आसाँथें, दिलेया प्हसेमैंए ल्हागिर आबा-आमामैंइ सै न्होर साँथेंम्।
15 क्हेमैंए ल्हागिर सैं तोंदै ङने मुँबै ताँन् सै न्होर नेरो ङए ज्यु या पिंब्मुँ। छले ङइ क्हेमैंए फिर ल्हें म्हाँया लसेरो क्हेमैंइ ङलाइ च्युगुदे म्हाँया लब् वा?
16 ङइ क्हेमैंलाइ तोइ सैरै दुःख आपिंइमुँ बिसि क्हेमैंज्यै सेइमुँ। दिलेया ङइ बाठो तसि क्हेमैंलाइ फसदिइ बिसि क्हेमैंइ ङलाइ छ्याब् ल्हैदिम् रो।
17 क्हेमैं ङाँर कुल्मिंबै म्हिमैं न्होंर्बै खाब् म्हिउँइँले ङइ क्हेमैंने मुइ किंइ? आकिं।
18 ङइ तीतसलाइ क्हेमैं ङाँर ह्याद् बिसि चने बालु बिश्वासी अलि या कुल्मिंइ। तीतसइ लोब लसि क्हेमैंने बालु मुइ किंइ वा? आकिं। तीतस नेरो ङइ सैं घ्रिलेन् के आल वा? ङि घ्याँ घ्रिर्न आप्र वा?
19 चु ताँन् ताँमैं बिमा ङि छ्याँब् मुँ बिसि क्हेमैंए उँइँर पोंइ वा? छ कत्ति आङिं! बरु परमेश्वरए उँइँर ख्रीष्टजी बिब् धोंले ङि पोंम्। ओ ङए खोबै अलि-अङाँमैं, ङिइ लबै ताँन् केमैं क्हेमैंलाइ भोंब् लमिंबै ल्हागिर्न ग।
20 क्हेमैंए बानि छ्याँब तरिगे बिब ङए सैं मुँ। दिलेया क्हेमैं ङाँर ङ खमा ङए सैंर मैंब् धों तब क्हेमैं आत उ, छलेन क्हेमैंए सैंर मैंब् धों तब ङै या आत उ बिसि ङ ङ्हिंइमुँ। तलेबिस्याँ क्हेमैं न्होंरि प्होंगि कैगि लब, ख्रे लब, ह्रिस लब, ह्रोंसए फायदा मत्त्रे म्हैब, अरूलाइ प्ह्रब, फ्रम् ताँ क्योंम् ताँ लब, थेब् प्हैंब, बिब् आङिंब तलै खाँम्।
21 क्हेमैं न्होंरि ल्हें म्हिइ पाप केमैं लल, चमैंइ आछ्याँबै के, ब्यभिचार लसेया, खै तदा ङ्हाँमुँ छान् तसेया सैं आएलै। छतसि ङ धबै क्हेमैं ङाँर खमा छाब् म्रोंसि ङए सैं नल् त्हुलै, धै चु ताँर परमेश्वरजी ङलाइ क्हेमैंए उँइँरि फा पिन् लम् उ बिसि ङ ङ्हिंइमुँ।