9
शाऊलए सैं एब
(चेला चिब्मैंए केमैं २२:१-२१; २६:१-२३)
1 शाऊल अझै समा प्रभुए चेलामैंए बिरोध लसि सैबै धम्कि लदै यरूशलेमर्बै ख्रो पिंबै खेगि क्रथे ङाँर ह्याइ।
2 झाइले चइ चने “येशूए लिलि प्रबै मुँयुँमैं-च्हमिरिमैं खाब् स्यालेन ङइ चमैंलाइ क्हासि यरूशलेमर बोल् पिंन् बिबै प्ह्रिछ्यामैं दमस्कस सहरर्बै म्हि च्हों धिंमैंए म्हिमैंए मिंरि प्ह्रिमिंन् ओ,” बिइ।
3 धै च प्ह्रिछ्यामैं किंसि शाऊल प्रदै दमस्कसए चेंदो फेनेमा तिखेर्न स्वर्गउँइँले चारबै ह्वे युसि चए खागु चारइ।
4 छतमा च सर क्हुरियाइ, धै “ओ शाऊल, शाऊल, क्हिइ तले ङ छले ह्रुगुदिरिमुँ?” बिबै कै चइ थेइ।
5 चइ बिइ, “प्रभु, क्हि खाब् जा?”
छबिमा खीजी बिइ, “ङ क्हिइ ह्रुगुदिरिबै येशू ग।
6 तारे रेसि सहरर ह्याद्, क्हिइ तो लल् त्हुम् बिसि म्हि घ्रिइ क्हिने बिमिंब्मुँ।”
7 च त्हेर शाऊलने बालु ह्याबै थुमैंइ कै बिस्याँ थेइ, दिलेया खाबै आम्रोंमा प्लेटोयाल्ले रारिइ।
8 शाऊल रेसि मि ङ्ह्योमा चइ तोइ म्रोंल आखाँल। छतमा चने ह्याबै थुमैंइ च डोरेसि दमस्कसर पखइ।
9 सोंरो समा च मि आम्रोंब् तयाइ, धै चइ चब्-थुँब या तोइ आल।
10 च त्हेर दमस्कसर हननिया मिं मुँबै चेला घ्रि मुँल। प्रभु च ङाँर म्रोंयुसि चने “ओ हननिया,” बिइ।
चइ “प्रभु, ङ चुर्न मुँ,” बिइ।
11 झाइले प्रभुजी चने बिइ, “रेसि ‘सिधा’ बिबै सहरए न्होंर्बै घ्याँर ह्याद्। चर यहूदा बिबै म्हिए धिंर शाऊल मिं मुँबै टार्ससथें म्हैद्। तलेबिस्याँ च प्राथना लरिइमुँ।
12 चइ दर्शनर हननिया मिं मुँबै म्हि घ्रि धिं न्होंर खसि चइ मि म्रोंरिगे बिसि ह्रोंसए फिर यो थेंब म्रोंइँमुँ।”
13 दिलेया हननियाइ बिइ, “प्रभु, चु म्हिइ यरूशलेमर क्हिए म्हिमैं फिर बेल्ले दुःख पिंइँमुँ बिबै ताँ ङइ ल्हें म्हिउँइँले थेइमुँ।
14 चुरै या क्हिए मिं किंब्मैं ताँन् क्हासि झेलर च्युवाबै हग ख्रो पिंबै खेगि चिब्मैंउँइँले चइ योंइँमुँ।”
15 दिलेया प्रभुजी चने बिइ, “ह्याद्, तलेबिस्याँ अरू ह्रेंमैं, म्रुँमैं नेरो इस्राएलर्बै म्हिमैंए उँइँर ङए मिंए बारेर बिमिंबर ङइ त्हाँबै म्हि चन् ग।
16 ङए मिंर बिश्वास लमा चइ कति थेबै दुःख नोल् त्हुम् बिब ङइ चने उँइँमिंब्मुँ।”
17 छबिमा हननिया ह्यासि शाऊल टिबै धिं न्होंर होंइ। धै चए फिर यो थेंसि बिइ, “ओ अलि शाऊल, क्हि खरिबै घ्याँर क्हि ङाँर म्रोंयुबै येशूजीन् क्हिए मि म्रोंरिगे धै पबित्र प्ल्हजी प्लिंरिगे बिसि ङ कुल्मिंब् ग।”
18 हननियाइ छ बिबै तोंदोंन् शाऊलए मिर्बै ताँगए कत्ला धों तबै सै खारयासि चइ धबै मि म्रोंइ। धै च रेसि बप्तिस्मा किंइ।
19 झाइले चब् चसि चइ भों योंइ।
शाऊलइ दमस्कस नेरो यरूशलेमर लबै के
धै शऊल दे त्हिंइ समा दमस्कसर मुँबै चेलामैंने टिइ।
20 झाइले चर टिबै तोंदोंन् चइ येशू परमेश्वरए च्ह ग बिसि म्हि च्हों धिंजरे येशूए ताँमैं बिबर होंइ।
21 चए ताँ थेब्मैं ताँनइ प्लेटोयासि बिइ, “यरूशलेमरि येशूए मिं किंब्मैंलाइ दुःख पिंसि सैल् म्हैबै म्हि चुन् आङिं वा? छलेन चु दमस्कसरै या चमैंलाइ फैसि ख्रो पिंबै खेगि चिब्मैं ङाँर बोयाबै सैं लसि च खब आङिं वा?”
22 दिलेया शाऊल आङ्हिंनले येशूए ताँ बिमिंबर भोंब् ततै ह्याइ, धै येशून् परमेश्वरजी कुल्मिंबै म्रुँ ख्रीष्ट ग बिसि प्रमाण पिंमा दमस्कसर्बै येहूदिमैंइ अकमक्क तसि तोइ ज्वाफ पिंल् आखाँ।
23 छतमा ल्हें त्हिंइ लिउँइ यहूदीमैंइ चलाइ सैवाबै घ्याँ म्हैइ।
24 दिलेया चमैंइ चलाइ सैल् म्हैबै ताँ शाऊलइ सेइ। चमैंइ चलाइ सैबै ल्हागिर त्हिंइ म्हुँइँस सहरर्बै म्रार चए छैं लसि टिमल।
25 दिलेया चए चेलामैंइ म्हुँइँसर्न च ट्हलर झोंसि बानुउँइँले तमिंइ।
शाऊल यरूशलेम सहरर एह्याब
26 शाऊल यरूशलेमर खबै लिउँइ चइ चेलामैंने क्ह्रिल् म्हैइ। दिलेया चमैंइ च येशूए चेला ग बिब आक्वेंसि ताँन् चने ङ्हिंइ।
27 दिलेया बारनाबास बिबै चेलाइ शावल त्होसि चलाइ कुल्मिंबै चेला चिब्मैं ङाँर बोमिंइ। “घ्याँर प्रमा शाऊलइ प्रभु म्रोंइ, प्रभु चने बालु पोंइ, झाइले दमस्कसर येशूए मिंउँइँले खबै सैं तोंबै ताँ आङ्हिंन्ले अरूमैंने बिमिंइ,” बिबै ताँ या बारनाबासइ चेला चिब्मैंलाइ बिइ।
28 झाइले शाऊल यरूशलेमर चमैंने बा-बालु खुल्ल तसि प्रबर होंइ, धै आङ्हिंन्ले प्रभुए मिंउँइँले खबै सैं तोंबै ताँ म्हिमैंने बिप्रबर होंइ।
29 झाइले चइ ग्रिक क्युइ पोंबै यहूदीमैंने या छलफल लमल, दिलेया चमैंइ चलाइ सैल् म्हैमल।
30 चु ताँ था सेसि येशूए फिर बिश्वास लबै आघें-अलिमैंइ शाऊल कैसरियार पखइ, धै च क्ल्ह्योउँइँले टार्ससर कुल्मिंइ।
31 छले यहूदीया, गालील नेरो सामरियार्बै चर्चर शान्ति तइ धै चर्च भोंब् तइ। चमैंइ प्रभुलाइ म्हाँदिदै प्रमा पबित्र प्ल्हजी चमैंए सैंर भों पिंइ। छतमा प्रभुए फिर बिश्वास लब्मैं ल्हें ततै ह्याइ।
एनियासए नबा सयाब
32 पत्रुस छाइछुइ ताँन् क्ल्ह्योजरे स्युरदै लुड्डा बिबै नाँसर्बै प्रभुए म्हिमैं ङाँरै या फेखइ।
33 पत्रुसइ चर एनियास मिं मुँबै म्हि घ्रि त्होइ। च म्हि प्रेदिं ओंनोंन् यो प्हलेमैं ओलेल् आखाँबै स्याले तसि क्ल्ह्योर्न रोरिल।
34 पत्रुसइ चने बिइ, “ओ एनियास! येशू ख्रीष्टजी क्हि सल् लमिंम्। रेसि क्हिए क्ल्ह्यो त्युइद्।” छ बिबै तोंदोंन् च रेयाइ।
35 च छले सब् म्रोंसि लुड्डा नाँस नेरो शारोन बिबै ह्युलर टिबै ताँन् म्हिमैं प्रभुउँइ सैं एइ।
डोरकास सिबउँइँले सोगों तब
36 योप्पा बिबै नाँसर तबिता बिब येशूए फिर बिश्वास लबै च्हमिरि घ्रि मुँल। ग्रिक क्युइर चने डोरकास बिमल। चइ छ्याँबै केमैं लब् नेरो ङ्हाँदुमैंए खाँचोमैं टार्दिमिंब्रें लमल।
37 च त्हेजरेन् तबिता नसि सियाइ, झाइले म्हिमैंइ च सिनु ख्रुमिंसि आटि फिर्बै कोठा घ्रिर थेंइ।
38 लुड्डा नाँस योप्पाउँइँले चेंदोन् मुँ, धै योप्पार मुँबै चेलामैंइ पत्रुस लुड्डार मुँ बिब् थेसि, “गाह्र आम्हाँदिन्ले युनन् ङि ङाँर खमिंन् ओ,” बिसि चए ङाँर म्हि ङ्हिं कुलइ।
39 चु ताँ थेबै लिउँइ पत्रुस चमैंने बालु ह्याइ। चर फेनेसि चमैंइ चलाइ आटि फिर्बै कोठार बोइ। चर्बै ताँन् म्हरेस्योमैं पत्रुसए ङाँर खइ, धै डोरकास खेंमैंने बालु मुँमा चइ टुइ थेंबै भोटो, चोला नेरो अरू क्वेंमैं पत्रुसने उँइँसि चमैं क्रोबर होंइ।
40 झाइले पत्रुसइ चमैं ताँन् बैरु कुल्मिंसि च्हि तुँसि परमेश्वरने प्राथना लइ। धै च सिनु ङाँइ तोसि, “तबिता, रेद्!” बिमा चइ मि ङ्ह्योइ, झाइले पत्रुस म्रोंसि रेसि क्हुँइ।
41 पत्रुसइ चए यो क्हासि रेमिंइ, धै बिश्वासीमैं नेरो म्हरेस्योमैं हुइसि च सियाल् खाँबै तबिता सोगों तइ बिसि उँइँमिंइ।
42 चु ताँ योप्पा तिगोंन् थेनेइ, धै ल्हें म्हिइ प्रभुए फिर बिश्वास लइ।
43 झाइले पत्रुस दे त्हिंइ समा योप्पार सिमोन बिबै ट्हिबिए के लबै म्हिने टिइ।