4
थेबै म्हि च्होंर पत्रुस नेरो यूहन्ना
1 पत्रुस नेरो यूहन्ना म्हिमैंने पोंरिमा को-कोइ ख्रो पिंबै खेगिमैं, मन्दिरर्बै कप्तान नेरो सदुकीमैं चमैं ङाँर खइ।
2 “येशू सिसि धबै सोगों तब् धोंलेन् म्हिमैं सिलेना धबै सोगों तब्मुँ,” बिसि पत्रुस नेरो यूहन्नाइ म्हिमैंने लोमिंमल। छतमा च सदुकीमैं ह्रिस खल।
3 छतमा चमैंइ पत्रुस नेरो यूहन्नालाइ क्हासि प्हँन्हाँग्धों समा झेलर च्युथेंइ तलेबिस्याँ च त्हेर ङेसा तल् खाँल।
4 दिलेया चमैंए ताँ थेब्मैंए न्होंर ल्हें म्हिइ येशूए फिर बिश्वास लइ। खीए फिर बिश्वास लब्मैं योदा-अयोदा हजार ङ्हदे तल।
5 प्हँन्हाँग्धों क्रथे मिंथेमैं, अरू यहूदी चिब्मैं, नेरो शास्त्रिमैं ताँन् थेबै म्हि च्होंर यरूशलेमर खागु तल।
6 ख्रो पिंबै खेगि क्रथे हन्नास, कैयाफा, यूहन्ना, अलेक्जेन्डर नेरो ख्रो पिंबै खेगि क्रथेए परवा ताँन् चर्न मुँल।
7 चमैंइ पत्रुस नेरो यूहन्नालाइ म्हाँजोर राल् पिंसि “क्हेमैंइ खाब् शाक्तिउँइँले नेरो खाबै मिंर चु के लल?” बिसि ङ्योएइ।
8 छबिमा पबित्र प्ल्हजी प्लिंसि पत्रुसइ चमैंने बिइ, “ओ म्हिए फिर्बै क्रथे नेरो चिबनाँब्मैं!
9 तिंयाँ ङिइ डुँड् म्हि सल् लमिंमा खैले सल् लमिंइ बिसि ङ्योएम् बिस्याँ,
10 नासरतर्बै येशू ख्रीष्टए मिंर चु म्हि ससि क्हेमैंए उँइँर राइमुँ बिसि क्हेमै नेरो इस्राएलर्बै ताँन् म्हिमैंइ सेल् त्हुम्। क्हेमैंइ येशूलाइ क्रूसर च्योवाल, दिलेया परमेश्वरजी खीलाइ सिबउँइँले धबै सोगों लमिंइ।
11 क्हेमैं गारा झोंब्मैंइ केर आत्हु बिबै युँमा चुन् येशू ग, दिलेया खी तोगो ताँन् भन्दा केर त्हुबै जगर्बै युँमा तखइमुँ।
12 अरू खाबज्यै मुक्ति पिंल् आखाँ तलेबिस्याँ ङ्योइ मुक्ति योंबर स्वर्गए न्होंरि म्हिमैंए ल्हागिर अरू खाबै मिं या परमेश्वरजी आपिंइँमुँ।”
13 झाइले पत्रुस नेरो यूहन्ना आखेबै म्हिमैं मुँलेना आङ्हिंन्ले पोंल् खाँब् म्रोंसि चमैं प्लेटोयाइ। धै चुमैं येशूने बालुन् टिब्मैं मुँना बिसि चमैंइ था सेइ।
14 दिलेया नब् सबै म्हि चमैंने बालु रारिब् म्रोंसि चमैंइ तोइ बिल् आखाँ।
15 छतसि चमैंलाइ थेबै म्हि च्होंउँइँले बैरु ह्याद् बिसि चमैंइ छ बिसि मत लइ:
16 “तारे ङ्योइ चु म्हिमैं खै लले? क्ह्रोंसेंन्ले चुमैंउँइँले औदिबै चिनु तइमुँ बिसि यरूशलेमर टिब्मैं ताँनइ सेल् खाँइ। छतसि ङ्योइ चु आङिं बिल् आखाँ।
17 दिलेया चु ताँ अरू म्हिमैंइ आसेरिगे बिसि ‘धबै चु मिंर खाब्ने या क्हेमैंइ तोइ आबिद्’ बिसि ङ्योइ चमैंने हौदिले।”
18 झाइले चमैंइ पत्रुस नेरो यूहन्ना हुइसि “तारे पिरु येशूए मिंर क्हेमैंइ तोइ आबिद्, तोइ ताँ या आलोमिंन्!” बिसि ल्हैदिइ।
19 दिलेया पत्रुस नेरो यूहन्नाइ चमैंने बिइ, “परमेश्वरए ताँ ङिंब उ क्हेमैंए ताँ ङिंब? परमेश्वरए उँइँर तो छ्याँब तमुँ क्हेमैं ह्रोंसैना मैंन्।
20 तलेबिस्याँ ङिम् ङिइ म्रोंब नेरो थेबै ताँमै आपोंल्ले टिलन् आखाँ।”
21 छले चमैंइ सजैं पिंबै ताँ तोइ आयों तलेबिस्याँ चर तरिबै ताँए ल्हागिर ताँन् म्हिमैंइ परमेश्वरए मिं क्वेरिल। छतसि चमैंइ पत्रुस नेरो यूहन्नालाइ बेल्ले हौदिसि पिमिंइ।
22 च अचम्माले सबै म्हि प्लिच्यु बर्ष क्हो-क्होबै मुँल।
बिश्वासीमैंए प्राथना
(भजनमैं २:१-१२)
23 छाइले त्होंखसि पत्रुस नेरो यूहन्ना खेंमैए थुमैं ङाँर खसि ख्रो पिंबै खेगि चिब्मैं नेरो चिबनाँब्मैंइ बिबै ताँन् ताँमैं चमैंने बिइ।
24 चु ताँ थेसि चमैंइ बालुन् परमेश्वरने कै तेसि बिइ, “ओ प्रभु! क्हिजी स्वर्ग, पृथ्बी, मा ङ्युँइ नेरो चर मुँबै तोन्दोंरि सैमैं बनेमिंइ।
25 पबित्र प्ल्हउँइँले क्हिजी ह्रोंसए सेवा लबै म्हि ङिए खे दाऊदए सुँउँइँले स्योमा बिइ,
‘अरू ह्रेंमैं तले ह्रिस खगे,
धै म्हिमैंइ केर आफेबै ताँमैं तले मैंगे?
26 याहवेह नेरो खीजी त्हाँबै म्हिए बिरोधर
ह्युलर्बै म्रुँमैं राइ,
धै क्रथे मिंथेमैं ताँन् खागु तइ।’
27 क्ह्रोंसेंन हेरोद म्रुँ, पन्तियस पिलातस, अरू ह्रेंमैं नेरो इस्राएलीमैं या चु सहरर्न क्हिजी त्हाँबै सेवा लबै पबित्र येशूए बिरोधर खागु तल।
28 छतमा ओंसों ओंनोंन् क्हिए योउँइँले क्हिजी लबै चाँजोमैं च बिरोधीमैंइ पूरा लइ।
29 ओ प्रभु तारे, चमैंइ ङिलाइ हौदिमा क्हिजी ङ्ह्योमिंन्, धै क्हिए केब्छैंमैंइ आङ्हिंन्ले क्हिए ताँ पोंबै भों पिंन्।
30 झाइले नबै म्हिमैं सल् लमिंबर क्हिजी ह्रोंसए यो स्योंमा, ह्रोंसए सेवा लबै पबित्र येशूए मिंउँइँले औदिबै केमैं नेरो चिनुमैं तरिगे।”
31 चमैंइ प्राथना लल् खाँबै लिउँइ चमैं खागु तबै क्ल्ह्यो लायाइ, धै चमैं ताँन् पबित्र प्ल्हजी प्लिंयाँइ, छतमा चमैंइ आङ्हिंन्ले परमेश्वरए ताँ पोंइ।
बिश्वासीमैंने मुँबै ताँन् सैमैं गमस्तर तमल
32 प्रभुए फिर बिश्वास लब्मैं ताँनए सैं, खों घ्रिन् मुँल। चमैंए न्होंर खाबज्यै या चमैंने मुँबै सैमैं ह्रोंसल् आबिमल। चमैंए ताँन् सैमैं गमस्तर तमल।
33 झाइले च कुल्मिंबै चेला चिब्मैंइ तिफुँइ आङ्हिंन्ले प्रभु येशू सिबइले धबै सोगों तइमुँ बिसि ग्वाइ पिंमल, छतमा परमेश्वरजी चमैं ताँनए फिर थेबै आशिक पिंमल।
34 चमैंए न्होंर खाबलाज्यै तो सैलै या खाँचो आतमल, तलेबिस्याँ क्ल्ह्यो न्हें मुँब्मैंइ च चुँसि योंबै मुइ पखमल,
35 झाइले कुल्मिंबै चेला चिब्मैंए उँइँर थेंमिंमल। धै खा-खाबलाइ तो-तो सैए खाँचो तमल, चमैंलाइ म्हिमैंइ च मुइ चुमिंमल।
36 च त्हेर साइप्रस ह्युलर्बै लेबी कुलार्बै योसेफ मुँल चलाइ कुल्मिंबै चेला चिब्मैंइ बर्णाबास बिसि मिं थेंल। (च मिंए अर्थ अरूए सैं भोंब् लमिंब् ग।)
37 चुइ क्ल्ह्यो चुँसि योंबै मुइ पखसि कुल्मिंबै चेला चिब्मैंए योर पिंइ।