28
माल्टा बिबै टापूर पावलए फिर तबै ताँ
1 ङि मा ङ्युँइए छेउर खबै लिउँइ च टापूए मिं माल्टा मुँना बिसि ङिइ था योंइ।
2 चर्बै म्हिमैंइ ङि फिर बेल्ले ल्हयो खइ। च त्हेर नाँ युसि बेल्ले खुँल। छतसि चमैंइ मि फुइसि ङि मि त्हेबर हुइसि मान लइ।
3 पावलज्यै या प्हैं घ्रि सिं खुसि मिर झोंइ। मिए राबाइ लमा प्हुरि घ्रि त्होंखसि पावलए योर बेर्दियाइ।
4 पावलए योर प्हुरि बेर्दिब् म्रोंसि चर्बै म्हिमैंइ, “चु म्हि क्ह्रोंसेंन्ले म्हि सैबै म्हि तल् त्हुम्! च मा ङ्युँइउँइँले सोइ खलेना निसाफउँइँले चु स्योरल् आखाँ,” बिसि खेंमैंए न्होंर बिबर होंइ।
5 दिलेया पावलइ च प्हुरि मिर खारवामा प्हुरिइ पावललाइ तोइ न्होह्रों आल।
6 दिलेया “तिस्याँदे लिउँइ बिख ल्हैदिसि चए ज्यु रोंलै, सर क्हुरह्यासि सियालै,” बिसि चर मुँबै म्हिमैंइ मैंरिल। ल्हें त्हे समा च तोइ आतब् म्रोंसि चमैंइ अरू सैंन् मैंसि “चुम् देवता ग मुँना!” बिइ।
7 च टापूर्बै क्ह्रों पब्लियसए क्ल्ह्यो-न्हें च क्ल्ह्योए चेंदो मुँल। चइ ङि चए धिंर हुइसि मान लइ। धै सोंरो समा प्ह्रें तसि ङि चर्न टिइ।
8 च त्हेर पब्लियसए आबा जर खब नेरो फो नब तल। छतसि पावल च नबै म्हिलाइ ङ्ह्योबर ह्यासि चए ल्हागिर प्राथना लइ, धै चए फिर यो थेंसि च नबै म्हि सल् लमिंइ।
9 छतसि च टापूर टिबै अरू नबै म्हिमैं या पावल ङाँर खमा चमैं या सइ।
10 चमैंइ ङि ल्हें मान लसि ल्हें क्होल्सैंमैं पिंइ। धै ङि माल्टाउँइँले ह्याब् बिसि क्यु झाजर क्रेबि छेमा चमैंइ घ्याँर ङिलाइ चैदिबै सैमैं या क्यु झाजर झोंमिंइ।
पावल माल्टाउँइँले रोम सहरर फेनेब
11 म्हैंन सोंल् लिउँइ ङि अलेक्जेन्ड्रियार्बै क्यु झाजर क्रेइ। चु क्यु झाज सर्खर माल्टर्बै टापूर्न मुँल। चु क्यु झाजए ओंसों जौंले देवतामैंए मूर्ति कुन्दिल।
12 ङि सुराकुसाइ बिबै सहरर फेनेसि सोंरो समा चर्न टिइ।
13 सुराकुसाइउँइँले ङि मा ङ्युँइए छेउ-छेउउँइँले रेगियन सहरर फेखइ। चए प्हँन्हाँग्धों ल्हुँउँइँले (दक्षिणउँइँले) खैं खइ, धै नुयुँम्धों ङि पटिओलि बिबै सहरर फेखइ।
14 चर ङिइ प्रभुए फिर बिश्वास लबै अलि-अङाँमैं त्होइ। चमैंइ “सद घ्रि समा ङिने टिमिंन्” बिइ। छतसि ङि ङिरो चमैंनेन् टिबै लिउँइ ङि रोम बिबै सहरर फेखइ।
15 रोमर्बै प्रभुए फिर बिश्वास लबै अलि-अङाँमैंइ ङि खसिन् मुँ बिबै ताँ थेसि को-कोइ म्हिमैं ङिने त्होबर अप्पियस बिबै बजार नेरो सों पाटि बिबै क्ल्ह्यो समा खइ। चमैं म्रोंसि पावलइ भों योंसि परमेश्वरलाइ धन्यबाद पिंइ।
16 ङि रोम खबै लिउँइ पावल रुँबै सिपाइ घ्रिने बालो च घ्रिन् टिल् पिंइ।
पावल रोम सहरर टिब
17 सोंरो लिउँइ पावलइ चर्बै यहूदीमैंए चिबनाँब्मैं हुइसि खागु लइ। चमैं खागु तबै लिउँइ पावलइ चमैंने बिइ, “ओ अलिमैं, ङ्योए ह्युलर्बै म्हिमैं नेरो ङ्योए खेमैंए रोसमैंए बिरोधर ङइ तोइ आछ्याँबै के आलल। दिलेया म्हिमैंइ ङ यरूशलेमर क्हासि रोमीमैंए योर पिंवाइमुँ।
18 रोमीमैंइ ङलाइ ङ्युलु च्युलु लमा सैल् त्हुबै छ्याब् तोइ आस्यासि ङ पिवाबै सैं लल।
19 दिलेया यहूदीमैंइ बिरोध लबइले ङइ कैसर म्रुँ ङाँर ह्याल् योंरिगे बिसि यो छ्युँ ललन् त्हुइ। छान् तलेया ङए ह्रेंए बिरोधर तोइ छ्याब् पिंबै ताँ ङने आरेल।
20 छतसि ङइ क्हेमैंने त्होसि चु ताँमैं क्होमिंबर क्हेमैंलाइ हुइब् ग। तलेबिस्याँ ‘परमेश्वरजी मुक्ति पिंबै म्रुँ ख्रीष्ट कुल्मिंब्मुँ,’ बिसि ङ्यो इस्राएलीमैंइ आशा थेंइमुँ। झाइले च म्रुँ युल् खाँइ बिसि ङइ बिप्रबइले ङ चु सँउँलिइ फैथेंइँमुँ।”
21 पावलए ताँ थेसि चमैंइ बिइ, “ङिइमि क्हिए बारेर यहूदीया ह्युलउँइँले तोइ प्ह्रिछ्या आयोंइँमुँ। धै अलि-अङाँमैं खाबै खसि क्हिए बिरोधर आछ्याँब ताँ तोइ आपोंइँमुँ।
22 दिलेया क्हिए सैंर मैंबै ताँमैं ङिइ क्हिउँइँलेन् थेदा ङ्हाँइँमुँ, तलेबिस्याँ खन्तोदोंन् म्हिमैंइ क्हिए टोलिमैंए बारेर बिरोध लसि पोंरिब ङिइ थेइमुँ।”
23 च लिउँइ चमैंइ पावलए ताँ थेबर त्हिंइ घ्रि तोक्दिइ। छतमा ल्हें म्हि पावल टिबै क्ल्ह्योर खइ। धै चइ न्हाँगउँइँले ङेसा समा परमेश्वरए ग्याल्सर्बै ताँमैं लोमिंइ। चइ मोशाइ पिंबै ठिम नेरो अगमबक्तामैंए कितबमैंउँइँले पावलइ परमेश्वरए ग्याल्सर्बै ग्वाइ पिंसि यशूए बारेर्बै ताँमैं क्होमिंबै भों लरिल।
24 चइ बिबै ताँ थेसि को-कोइइ क्वेंइ, को-कोइइ आक्वें।
25 छतसि चमैं खें-खेंमैंन् ताँ आक्ह्रिसि ह्याबि छेमा पावलइ चमैंने बिइ, “परमेश्वरए प्ल्हजी क्हेमैंए खेमैंने यशैया अगमबक्ताउँइँले बिमिंबै चु ताँ ठिकन् मुँल,
26 चु म्हिमैं ङाँर ह्यासि बिद्,
‘क्हेमैंइ थेबम् थेब्मुँ, दिलेया खोंयोंन् बिलै आक्हो;
ङ्ह्योबम् ङ्ह्योब्मुँ, दिलेया खोंयोंन् बिलै आम्रों।’
27 तलेबिस्याँ चमैंए खों सारो तइमुँ,
चमैंए न्ह थेल् आखाँब् तइमुँ,
धै चमैंइ मि च्युँल्ले टिइमु।
आस्याँ चमैंए मिइ म्रोंब्मुँ,
चमैंए न्हइ थेब्मुँ,
चमैंए खोंइ क्होब्मुँ,
धै चमैं सैं एसि ङ ङाँर खब्मुँ,
ङइ चमैंलाइ सल् लमिंब्मुँ
बिसि परमेश्वरजी बिइमुँ।
28 छतसि ‘परमेश्वरजी म्हिमैं जोगेमिंब्मुँ,’ बिबै सैं तोंबै ताँ अरू ह्रेंर्बै म्हिमैंए ल्हागिर खीजी पिमिंइँमुँ, धै चमैंज्यै थेब्मुँ, बिसि क्हेमैं था सेल् त्हुम्।”
29 [पावलइ चु ताँ बिबै लिउँइ, यहूदीमैं खें-खेंमैंन् आक्ह्रिसि ठटा ठुटु तसि ह्याइ।]
30 पावल ङ्हिंदि समा ह्रोंसए खर्जर्न रोमर टिइ, धै च ङाँर खब्मैं ताँनलाइ खिइ मान लमल।
31 चइ आङ्हिंनले परमेश्वरए ग्याल्सर्बै ताँ बिमल, प्रभु येशू ख्रीष्टए बारेर लोमिंमल, धै खाब्ज्यै या पावल आक्वै।