15
यरूशलेमर्बै म्हि च्हों
(उत्पत्ति १७:९-२७; लेबी १२:१-८; यहोशू ५:१-९)
1 छले एन्टिओखियार टिरिमा यहूदीया ह्युलउँइँले को-कोइ म्हिमैं चर युसि येशूए फिर बिश्वासीमैंने, “मोशाए ठिमर प्ह्रिब् धोंले क्हमैंलाइ ज्युर चिनु आललै बिस्याँ क्हेमैंइ खोंयोंन् बिलै आखाँबै छ्ह योंल् आखाँ,” बिसि लोमिंबर होंइ।
2 छाबै ताँ थेसि चमैंने पावल नेरो बारनाबास आक्ह्रिमा चमैं बेल्ले प्होंइ। छतसि चर्बै बिश्वासीमैंइ पावल, बारनाबास नेरो अरू म्हिमैंने बिइ, “चु ताँए छ्याँन् मिंन् लबै ल्हागिर यरूशलेमर्बै कुल्मिंबै चेला चिब्मैं नेरो एल्डरमैं ङाँर ह्याद्।”
3 छतमा चर्चर्बै म्हिमैंइ चमैं छाइले बिदा लसि कुल्मिंइ। चमैं फोनिके नेरो सामरिया ह्युल तसि ह्यामा अरू ह्रेंमैंज्यै या येशूए फिर बिश्वास लबै ताँ चमैंने छेनाले बिमिंइ। चु ताँ थेसि चर्बै ताँन् अलि-अङाँमैं बेल्ले सैं तोंइ।
4 झाइले चमैं यरूशलेमर फेखमा चर्चर्बै म्हिमैं, कुल्मिंबै चेला चिब्मैं नेरो एल्डरमैंइ चमैंए मान लइ। परमेश्वरजी खेंमैंउँइँले लबै ताँन् केमैंए बयन चमैंइ चरै या लइ।
5 दिलेया फरिसीमैं न्होंर्बै प्रभुए फिर बिश्वास लबै को-कोइ म्हिमैं रासि बिइ, “ज्युर चिनु लसि चमैंइ मोशाए ठिमर प्ह्रिबै ताँ लद् बिसि अरू ह्रेंमैंलाज्यै या ल्हैदिल् त्हुम्।”
6 चु ताँ छेनाले क्होबर कुल्मिंबै चेला चिब्मैं नेरो एल्डरमैं खागु तइ।
7 ल्हें ताँमैं तबै लिउँइ पत्रुस रासि चमैंने बिइ, “ओ अलि-अङाँमैं, अरू ह्रेंमैंज्यै या प्रभु येशूउँइँले खबै सैं तोंबै ताँ थेसि मुक्ति योंरिगे बिसि परमेश्वरजी क्हेमैंए म्हाँजोउँइँले ओंसोंन् ङ त्हाँइ बिसि क्हेमैंइ सेइमुँ।
8 खोंर्बै ताँ सेबै परमेश्वरजी ङ्योलाइ पबित्र प्ल्ह पिंब् धोंलेन् अरू ह्रेंर्बै म्हिमैंलाज्यै या पबित्र प्ल्ह पिंसि चमैं खीए म्हिमैं तल् पिंइमुँ बिबै ताँ ङ्योने उँइँमिंइ।
9 खीजी यहूदी नेरो अरू ह्रेंर्बै म्हिमैंए न्होंरि तोइ सैरै या आफेल। चमैंइ येशूए फिर बिश्वास लबइले परमेश्वरजी चमैंए आछ्याँबै के क्षमा पिंसि चमैंए सैं या शुद्ध लमिंइ।
10 छतसि नोलै आखाँबै खर्गु चेलामैंए प्हैंदार थेंमिंसि तले परमेश्वरए जाँच लमुँ? चु खर्गु ङ्योए खेमैंज्यै नोल् आखाँल, ङ्योज्यै या नोल् आखाँइमुँ।
11 दिलेया प्रभु येशूए फिर बिश्वास लबइले खीए दयाम्हाँयाउँइँले ङ्योइ खैले मुक्ति योंइमुँ, छलेन चमैंज्यै या मुक्ति योंइमुँ।”
12 चु ताँ थेसि चर मुँबै ताँन् म्हिमैं च्याँ तयाइ, धै अरू ह्रेंमैंए म्हाँजोर परमेश्वरजी खेंमैंउँइँले खैबै औदिबै चिनु मुँबै केमैं लइ बिसि बारनाबास नेरो पावलइ धबै बिमिंमा चमैंइ छेनाले थेइ।
13 चमैंइ पोंल् खाँबै लिउँइ याकूबइ बिइ, “ओ अलि-अङाँमैं, ङए ताँ थेद्।”
14 परमेश्वरजी अरू ह्रेंमैंए फिर ल्हयो खसि ह्रें घ्रि त्हाँसि आशिक पिंइ बिबै ताँ सिमोन पत्रुसइ भर्खर बिमिंइ।
15 चु ताँ अगमबक्ताइ प्ह्रिथेंबै ताँने क्ह्रिइमुँ,
16 “ ‘च लिउँइ ङ एयुब्मुँ,
धै दाऊदए फुयाबै धिं धबै बनेब्मुँ।
चए फुयासि खयाल आडिबै गाह्रा ङइ धबै बनेमिंब्मुँ,
धै भोंब् लमिंब्मुँ।
17 छलमा ङए म्हिमैं तबर हुइबै ताँन् चैबै अरू ह्रेंमैंइ,
याहवेह म्हैल् खाँब्मुँ,
18 बिसि याहवेहजी बिइमुँ।
खीजी चु ताँ स्योंम् ओंनोंन् था सेल् पिंइँमुँ।’
19 “छतसि परमेश्वरउँइ सैं एबै अरू ह्रेंमैंलाइ ङ्योइ दुःख आपिंले बिब ङए सैं मुँ,
20 दिलेया चमैंए ल्हागिरि चु ताँ प्लि प्ह्रिमिंले: कुलाइ चडिसि जुट् तबै सै चमैंइ आचरिगे, ब्यभिचार आलरिगे, खर्जी ङिसि सैबै खेदोए से आचरिगे, धै को या आचरिगे।
21 तलेबिस्याँ ओंसोंबै पुस्ता ओनोंन् सहर सहरजरे मोशाए ठिम प्रचार तरिइमुँ, तलेबिस्याँ प्रिबै त्हिंइ ह्रोंसे चु ताँ च्हों धिंमैंर खेरिइमुँ।”
अरू ह्रेंर्बै बिश्वासीमैंलाइ पिमिंबै प्ह्रिछ्या (चिट्ठि)
22 च लिउँइ कुल्मिंबै चेला चिब्मैं, एल्डरमैं नेरो ताँन् चर्चर्बै म्हिमैं क्ह्रिसि खेंमैंए न्होंउँइँले को-कोइ म्हिमैं त्हाँसि पावल नेरो बारनाबासने एन्टिओखियार कुलल् त्हुइ बिसि मैंइ, च म्हिमैं न्होंरि यहूदा बिबै बारसाबास नेरो सिलास त्हाँइ। प्रभुए फिर बिश्वास लब्मैं न्होंरि चमैं ङ्हिं अगुवामैं मुँल।
23 झाइले बिश्वासीमैंइ पिमिंबै प्ह्रिछ्यार चु छाबै ताँमैं मुँल:
“एन्टिओखिया, सिरिया नेरो किलिकियार मुँबै येशूए फिर बिश्वास लबै अरू ह्रेंर्बै अलि-अङाँमैंलाइ कुल्मिंबै चेला चिब्मैं नेरो एल्डरमैंउँइँले जय मसीह मुँ।
24 ङिए न्होंर्बै को-कोइ म्हिमैं चर ह्यासि स्योलिबै ताँमैं क्हेमैंलाइ लोमिंसि क्हेमैंए सैं ङ्हिरि लवासि दुःख पिंइ बिब ङिइ थेइमुँ। च म्हिमैं ङिंइ कुलब आङिं।
25 छतसि ङि ताँनइ सल्ला लसि ङिंए ताँमैं क्हेमैं ङाँर बिमिंबर ङिए न्होंर्बै कोइ म्हिमैं त्हाँसि ङिए खोबै थुमैं बारनाबास नेरो पावलने क्हेमैं ङाँर कुलब छ्याँब ङ्हाँइ।
26 बारनाबास नेरो पावलइ ह्रोंसए ज्युए म्हाँया आलल्ले प्रभु येशू ख्रीष्टउँइँले खबै सैं तोंबै ताँ बिप्रइ।
27 छतसि ङिइ चुमैं ङ्हिंने यहूदा नेरो सिलास कुलइमुँ, ङिंइ प्ह्रिबै ताँमैं चमैंज्यै क्हेमैंने बिमिंब्मुँ।
28 चु चैदिबै ताँमैं बाहेकक अरू ति क्हेमैंलाइ नोल् पिंब आत बिसि पबित्र प्ल्ह नेरो ङिइ छ्याँब ङ्हाँइ:
29 कुलाइ चडेबै सै तोइ आचद्, को या थुँब-चब् आलद्, खर्जी ङ्हेसि सैबै खेदोए से आचद्, धै ब्यभिचार आलद्। छाबै केमैंउँइँले स्योले टिइ बिस्याँ छ्याँब तब्मुँ। जय मसीह।”
30 च लिउँइ चमैं ह्यासि एन्टिओखियार फेनेइ, धै चर्बै चर्चर्बै म्हिमैं खागु लसि च प्ह्रिछ्या पिंइ।
31 प्ह्रिछ्यार प्ह्रिबै अर्थिए ताँमैं थेसि चमैं सैं तोंइ।
32 यहूदा नेरो सिलास अगमबक्तामैं तबइले चर्बै अलि-अङाँमैंलाइ परमेश्वरए ताँउँइँले ल्हें अर्थि बुद्धिए ताँमैं लोमिंसि चमैं प्रभुए फिर बिश्वास लबर भोंब् लमिंइ।
33 चमैं दे त्हिंइ समा चर टिबै लिउँइ चर्बै अलि-अङाँमैंइ चमैंलाइ कुल्मिंबै चेला चिब्मैं ङाँर्न कुलमा “छेनाले ह्याद् ओ!” बिसि बिदा लइ।
34 [दिलेया सिलासइ बिस्याँ चर्न टिब छ्याँब ङ्हाँइ।]
35 पावल नेरो बारनाबास बिस्याँ दे त्हिंइ समा एन्टिओखियार टिसि अरू ल्हें म्हिने प्रभुए ताँ बिमिंदै लोमिंदै टिइ।
पावल नेरो बारनाबास फ्रेयाब
(चेला चिब्मैंए केमैं १३:१-३; १८:२३-२८)
36 दे त्हिंइ लिउँइ पावलइ बारनाबासने बिइ, “ह्याले, ङ्योइ प्रभुए ताँ बिमिंबै सहरजरे हयासि प्रभुए फिर बिश्वास लबै अलि-अङाँमैंने त्होले, धै चमैं खै तरिगे बिसि ङ्ह्योले।”
37 बारनाबासइ मर्कूस बिबै यूहन्ना खेंमैंने बालु बोबै सैं लइ।
38 दिलेया पावलइ मर्कूस खेंमैंने बालु बोयाब आतलै ङ्हाँइ, तलेबिस्याँ चइ लल् त्हुबै के पूरा आलल्ले ओंसोंन् पामफिलिया ह्युलउँइँले चमैंने फ्रेसि एह्याल।
39 च ताँइ लमा चमैं न्होंरि सैं ख्रेलेयासि चमैं फ्रेयाइ। धै बारनाबास मर्कूस किंसि मा ङ्युँइए क्याँ ततै साइप्रस बिबै टापूर ह्याइ।
40 पावलइ बिस्याँ खीने बालु ह्याबर सिलास त्हाँइ। झाइले बिश्वासीमैंइ “परमेश्वरए दयाम्हाँया क्हेमैंए फिर तरिगे!” बिसि चमैंलाइ पर्मेश्वरए योर पिंसि बिदा पिंइ।
41 चमैं सिरिया नेरो किलिकियाजरे स्युरदै बिश्वासीमैं भोंब् लमिंदै प्रइ।