11
पत्रुसइ यरूशलेमर ताँ क्होमिंब
1 अरू ह्रेंमैंज्यै या परमेश्वरए ताँ क्वेंइ रो बिबै ताँ यहूदीयार्बै प्रभु येशूजी कुल्मिंबै चेला चिब्मैं नेरो अरू बिश्वासीमैंइ थेइ।
2 झाइले पत्रुस यरूशलेमर खमा को-कोइ यहूदी बिश्वासीमैंइ चने त्होइ। चमैंइ “अरू ह्रेंर्बै बिश्वासीमैंलाज्यै या ट्हुबि क्ह्याँसि चिनु लल् त्हुम्” बिइ।
3 छतसि “ज्युर चिनु आलबै म्हिमैं ङाँर ह्यासि चमैंने बालु क्हिइ तले चब्-थुँब लल!” बिसि चमैंइ पत्रुसलाइ छ्याब् ल्हैदिइ।
4 छबिमा पत्रुसइ ताँन् ताँमैं तोंफ्यार्लै चमैंने बिबर होंइ:
5 “ङ योप्पा सहरर प्राथना लरिमा प्रभुने बेल्ले चेंदो तमा ङइ दर्शन म्रोंइ। च दर्शनर तन्ना धों तबै च्हो प्लिर क्हासि स्वर्गउँइँले क्युरु ङ ङाँर युरिल।
6 ङइ छेनाले ङ्ह्योमा चर प्हले प्लि प्ह्याबै खेदोमैं, क्ह्योंर्बै खेदोमैं, सर क्ल्याँसि प्रबै प्हँलाँ-प्हुँलुँ नेरो मुर्बै नमेमैं म्रोंइ।
7 झाइले ‘पत्रुस रेद्, धै च सैमैं सैसि चद्,’ बिबै कै ङइ थेइ।
8 दिलेया ङइ बिइ, ‘आङिं प्रभु! छाबै चोखो आरेब् नेरो चल् आतबै सै ङइ खोंयोंइ आचइमुँ।’
9 “ङ्हिखेबै लारै या, ‘परमेश्वरजी चोखो लमिंबै सैमैं क्हिइ चोखो आरे आबिद्!’ बिसि च कैइ स्वर्गउँइँले ङने बिइ।
10 सोंखे समा छान् तइ, धै च ताँन् सैमैं धबै स्वर्गउँइँन बोयाइ।
11 “च त्हेर्न कैसरिया नाँसउँइँले ङ ङाँर कुल्मिंबै म्हि सों ङि टिबै धिंर फेखइ।
12 झाइले पबित्र प्ल्हजी, ‘चमैंने बालु तोइ आङ्हाँन्ले ह्याद्,’ बिसि ङने बिइ। छबिमा चु अलिमैं टुग्लो या ङने बालुन् कैसरिया नाँसर ह्यासि ङि कर्नेलियसए धिंर होंइ।
13 धै कर्नेलियसइ ङिने बिइ, ‘स्वर्गदूत घ्रि ङए धिंर रायुसि, योप्पार म्हिमैं कुलसि पत्रुस बिबै म्हि हुइ पउ।
14 चइ क्हिने परमेश्वरए ताँ बिमिंब्मुँ, धै च ताँउँइँले क्हि नेरो क्हिए ताँन् परवामैं जोगेब्मुँ,’ बिइ।
15 “धै ङ च म्हिमैंने पोंबर होंमा ङिए फिर ओंसों पबित्र प्ल्ह तयुब् धोंलेन् चमैंए फिरै या तयुइ।
16 छतमा ‘यूहन्नाइ क्युइ बप्तिस्मा पिंइ, दिलेया तारे पिरु परमेश्वरए पबित्र प्ल्हजी क्हेमैंलाइ बप्तिस्मा पिंब्मुँ,’ बिसि प्रभुजी ओंसोंन् बिबै ताँ ङइ मैंइ।
17 ङ्योइ प्रभु येशू ख्रीष्टए फिर बिश्वास लमा परमेश्वरजी ङ्योलाइ खैबै बरदान पिंल, चमैंलाज्यै या छाबन् बरदान पिंसेरो ङइ परमेश्वरने ‘आपिंन्’ बिब ङ खाब् जा?”
18 चु ताँ थेसि यरूशलेमर्बै बिश्वासीमैंइ पत्रुसलाइ छ्याब् ल्हैदिब् पिवाइ, धै “तारे अरू ह्रेंर्बै म्हिमैंज्यै या मुक्ति योंरिगे बिसि परमेश्वरजी चमैंलाइ सैं एबै मौका पिंना!” बिसि चमैंइ ताँ क्होइ। झाइले चमैंइ परमेश्वरए मिं क्वेइ।
एन्टिओखिया सहरर प्रभुए फिर बिश्वास लब्मैं
19 स्तिफनस सैवाबै लिउँइ प्रभुए फिर बिश्वास लब्मैंलाइ ल्हाबइले ताँन् भौदियाइ। दिलेया को-कोइ फोनिके, साइप्रस नेरो एन्टिओखिया बिबै ह्युलमैं समा फेनेसि अरू ह्रेंमैंने आबिल्ले यहूदीमैंने मत्त्रे परमेश्वरए ताँ बिप्रइ।
20 दिलेया चमैंए न्होंरि को-कोइ साइप्रस नेरो कुरेनीर्बै म्हिमैं मुँल। चमैंइ एन्टिओखियार खसि अरू ह्रेंर्बै ग्रिकमैंने या प्रभु येशूउँइँले खबै सैं तोंबै ताँ बिमिंइ।
21 प्रभुए आशिक ने शक्ति चमैए फिर तबाइले ल्हें ल्हें म्हिइ प्रभु येशूए फिर बिश्वास लसि खी ङाँइ सैं एइ।
22 चु ताँ यरूशलेमर्बै बिश्वासीमैंइ थेइ। छतसि चमैंइ बारनाबास एन्टिओखियार कुल्मिंइ।
23 झाइले बारनाबास चर खमा परमेश्वरए आशिक नेरो दयाम्हाँया चमैंए फिर तब् म्रोंसि सैं तोंइ, धै चमैं ताँनने “खों न्होंउँइँलेन् प्रभुए फिर क्ह्रोंसेंन्ले बिश्वास लसि खी आपिल्ले टिरिल् त्हुम्,” बिसि चमैंए सैं भोंमिंइ।
24 तलेबिस्याँ बारनाबास पबित्र प्ल्हजी प्लिंब नेरो प्रभुए फिर बेल्ले थेबै बिश्वास लबै छ्याँबै म्हि मुँल। छतमा ल्हें म्हिइ प्रभुए फिर बिश्वास लइ।
25 झाइले बारनाबास शाऊल म्हैबर टार्सस बिबै सहर ह्याइ।
26 बारनाबासइ शाऊल टार्ससर त्होसि एन्टिओखियार पखइ। तिदिं समन् चमैं बिश्वासीमैंने त्होब्ब्रें लसि ल्हें म्हिलाइ लोमिंइ। एन्टिओखियार्न धाँसे ओंसों ख्रीष्टए चेलामैंने ख्रीष्टियान बिबै मिं थेंइ।
27 च त्हेर्न कोइ अगमबक्तामैं यरूशलेमउँइँले एन्टिओखियार युइ।
28 चमैंए न्होंरि अगाबस मिं मुँबै म्हि घ्रि मुँल। ताँन् ह्युलर थेबै अँङ्गल् तबि छेइमुँ बिसि लिउँइ तखबै ताँ पबित्र प्ल्हउँइँले चइ पोंइ। (च अँङ्गल् थेबै क्लौडियस म्रुँए पलोर तल।)
29 छाबै ताँ थेसि चेलामैं ताँनइ ह्रों-ह्रोंसइ पिंल् खाँबै सैमैं रेसि यहूदीयार्बै बिश्वासीमैं ल्होबर पिमिंबै सैं लइ।
30 झाइले चमैंइ छान् लसि रेबै सैमैं बारनाबास नेरो शाऊलए योउँइँले यरूशलेमर्बै एल्डरमैंए ङाँर चमैंइ पिमिंइ।