ⅬⅩⅩⅩⅣ
Okoba namaiga ase enyomba ya Nyasae
(Ogoteera kwa basinto ba Kora)
Ⅰ Aye Omonene bw’Emeganda,
naki obomenyo bwao bore oboseera!
Ⅱ Omoyo one nore namaiga amange kobeera ase chigoora chia Omonene;
enkoro yane na omobere one nigo bigoterera Nyasae ore moyo nomogooko omonene.
Ⅲ Enchiro nigo ekonyora obomenyo,
na egesingororo nigo gekwenyorera egeswa
ase amage aye akobeera, agwo ase egesasiimero kiao,
aye Omonene bw’Emeganda,
aye Omorwoti one, na Nyasae one.
Ⅳ Mbarenomogooko abanto abwo bamenyete ase enyomba yao,
abwo bakona‐goteera botambe ase okogotogia.
Ⅴ Mbare nomogooko abanto abwo bakonyora chinguru chiabo korwa asore;
abwo chinkoro chiabo chiganetie kogenda Sayoni.
Ⅵ Ekero abanto abwo bagoeta ase Rigoko ria Baka,
nigo bakorikora riaba aase e chinsoko chi’amaache;
na embura ye ritang’ani nigo ekorirentera ogosesenigwa okonge.
Ⅶ Barabwo mbabe bakomenta koba ne chinguru kogenderera botambe,
mbarore Nyasae ayobuete chinyasae agwo Sayoni.
Ⅷ Aye Omonene, Nyasae bw’Emeganda, igwa ogosaba kwane,
tegerera onyigwe, aye Nyasae o Yakobo.
Ⅸ Aye Nyasae ore enguba yaito,
origererie obosio bw’omoakwa amaguta oo.
Ⅹ Mbuya kobeera ase enyomba yao rituko erimo rioka
kobua kobeera amatuko chilifu chinyinge aande onsi;
mbuya koba omorendi bw’egesieri ki’enyomba yao aye Nyasae one,
kobua kobeera ase obomenyo bw’abakori amabe.
Ⅺ Omonene nigo are erioba na enguba,
ere nigo agotoa amaabera na obonene;
ere takorina abare ne chinkoro chindonge gento kende gionsi kere ekiya.
Ⅻ Aye Omonene bw’Emeganda,
nasesenirie omonto okwegenete.