ⅬⅡ
Ekiina kia Nyasae, na obuya bwaye bw’amaabera
(Ogoteera gwa Daudi ekero Doegi Omoedomu achierete Saulo komotebia ng’a Daudi ochire mw’Abimeleki)
Ⅰ Aye omonto ore nokobua, nase ki ogwetogeria amabe aya ogokora?
Obwanchani bwa Nyasae nigo bogendererete kare na kare.
Ⅱ Aye omong’ainereria,
oromeme rwao nigo rokoroberia amang’ana ’ogosaria;
nigo ronga buna omoyio otukia omwoge.
Ⅲ Aye nigo bwanchete amabe kobua amaya,
nigo bwanchete gokwana oborimo kobua ekeene.
Ⅳ Aye ore noromeme rw’obong’ainereria,
nigo bwanchete gokwana amang’ana agosaria.
Ⅴ Nyasae nakoiyerie inse kare na kare,
nakobwate na kogotaboria korwa nyomba mwao,
nagosimore korwa ase ense y’abare moyo.
Ⅵ Abanyene oboronge mbarore ayio boboe, bamosekerere bateebe;
Ⅶ “Rora, omonto oyo bwangete gokora Nyasae abe obotamero bwaye,
nigo egenete obonge bw’obonda bwaye omonyene,
na akeenenia ase chinguru chiaye chi’ogosaria.”
Ⅷ Korende inche nigo inga buna omozeituni osebogete ase enyomba ya Nyasae ime.
Nigo nsemeretie obwanchani bwa Nyasae botari koera goika kare na kare.
Ⅸ Aye Nyasae, ngokoiraneria ng’a mbuya mono kare na kare,
ekiagera gwakorire ayio.
Ase amasio ’abaanto bao bare abegenwa
nindarie erieta riao, ekiagera nerigiya.