ⅩⅬⅠ
Ogosaba kw’omonto omorwaire
(Ogoteera gwa Daudi)
Ⅰ Nasesenirie omonto oyo ogwechandera abataka.
Ekero aranyorwe nemechando, Omonene namokonye.
Ⅱ Omonene amorende na komokorera agenderere koba moyo,
erinde arokwe oyosesenirie ase ense.
Omonene tagotiga ababisa bamokorere buna banchete.
Ⅲ Omonene namorende ekero are borere arwarete,
namogusuerie oborwaire bwaye.
Ⅳ Inche nigo nateebete: “Omonene, indorera amaabera,
ingwenie omoyo one, ekiagera nakorire ebibe asore.”
Ⅴ Ababisa baane nigo bagokwana amang’ana amabe igoro yane, bateba,
“Omonto oyo indi arakwe na erieta riaye riebwe kegima?”
Ⅵ Onde bwensi ogocha kondora nigo agokwana amang’ana yoborimo,
enkoro yaye nigo egosangereria amabe,
erio ogenda isiko oraria amang’ana ayio amabe.
Ⅶ Abwo bonsi bangechete nigo bakomonyererana igoro yane,
nigo bakorire omooroberio bw’ogonkora bobe.
Ⅷ Barabwo nigo bagoteeba: “Noborwaire boramoite bwamonyorire,
takoboka naende korwa ase araire”.
Ⅸ Nonya nomosani one negenete, tware koragera komo,
ong’akire chintacho.
Ⅹ Omonene, ndorera amaabera,
ngwenie, erinde ing’akane ababisa baane obobe bwabo.
Ⅺ Ababisa baane tibagochenga igoro yane.
Ase ayio nimanye ng’a aye nogokirie nainche.
Ⅻ Aye gwankonyire, ekiagera tindi na komocha,
kwambekire gotenena ase obosio bwao kogenderera botambe.
ⅩⅢ Omonene Nyasae bw’Abaisraeli, atogigwe,
buna yarenge korwa kare nabo erabe goika kare na kare.
Amina. Amina.