ⅭⅩⅬⅠ
Ogosaba ng’a nkonywe korwa ase ababisa
(Ogoteera kwa Daudi)
Ⅰ Omonene, nigo ’ngokorangeria, ayerera oche bwango!
Tegerera oigwe eriogi riane ekero ’ngokorangeria.
Ⅱ Bwanchere ogosaba kwane buna ubani,
na amaboko aane aimokereirie igoro oyanchere buna ekeng’wanso kia mogoroba!
Ⅲ Aye Omonene, beeka omorendi ase omonwa one,
abe okorenda ebikoba biane.
Ⅳ Totiga enkoro yane egobere yanche amang’ana amabe.
Tontiga inare gokora ayaare amabe amo nabwo bagokora ebibe;
tingosanga amo nabarabwo ase emeyega.
Ⅴ Tiga oyore omonyaboronge ang’ake na antogonyere ase obwanchani,
okwo nigo konga buna amaguta akweakwa,
na omotwe one toyaanga.
Botambe nigo ogosaba kwane kore mamincha y’abakori amabe.
Ⅵ Ekero abagaambi baabo baraturunkanigwe ase egetare,
abanto ’mbaanche amang’ana aane ng’a n’amaya.
Ⅶ Amauga aito nigo asiareire ase egesieri n’erieta riikoro engencho yaye egesieri gose omogwa bw’embeera,
buna ebisamunye bie chiinko,
gose ebi’amagena bigosiarerwa ase riroba igoro.
Ⅷ Korende amaiso aane nigo arigereretie goocha asore, aye Omonene;
naye ’ngotamera, tibwanga omoyo one.
Ⅸ Indende korwa ase emeeto bantegeire;
na korwa ase amareba y’abakori amabe.
Ⅹ Tiga abakori amabe abwo bagwe ase ebichanga biabo abanyene,
korende inche ’ntooreke.