Nhanderuete ayvu iky'a e'ỹ va'e Zacarias 4

Mokoĩ oliveira rembypy mbyte py tataendy'y hi'aĩ va'e oexaague

1 Ha'e gui teĩgue ju anjo xereve ijayvu va'ekue ou vy xemomyĩ imo'amy, avakue okeague gui omomyĩa rami.

2 Ha'e rami vy oporandu xevy:

— Mba'e nunga tu rexa?

Ambovai:

— Xee aexa peteĩ tataendy'y ouro guigua hi'aĩ va'e, ha'e gui hi'áry oĩ peteĩ azeite ryru. Tataendy'y re ma sete tataendy renda ikuai, ha'e sete ikuai avi tataendy rykue raperã, peteĩ-teĩ tataendy peve azeite ovaẽ aguã.*

3 Ha'e nunga yvýry ma mokoĩ oliveira rembypy hi'aĩ. Peteĩ ma azeite ryru oiporu kuaa regua re, ha'e rã amboae ma oiporu kuaa e'ỹa re hi'aĩ — ha'e.*

4 Ha'e gui xee aporandu ju anjo xereve ijayvu va'e pe:

— Xeruvixa, mba'erã tu peva'e?

5 Ha'e ramo anjo xereve ijayvu va'e ombovai:

— Ndee ndereikuaai teri va'e ty'y peva'e nunga mba'erã paa?

Xee ambovai vy — Any, xeruvixa — ha'e.

6 Ha'e ramo ijayvuve vy aipoe'i xevy:

— Peva'e ma Zorobabel pe Senhor ixondaro reta va'e aipoe'iague: “Ndee ae mbaraetea rupi e'ỹ 'rã mba'emo rejapo, ndee ae po'akaa rupi e'ỹ guive, ha'e rã Xenhe'ẽ rupi ae 'rã rejapo”, he'iague.†

7 Ha'e gui ndee yvyty tuvixa va'e, marã ramigua tu ndee? Mba'eta Zorobabel renonde ma yvy joja reia rive 'rã repyta. Mba'eta ita opa vy guarã Zorobabel omoĩ ramo pavẽ oguerovy'a vy “Tomoingo porã! Tomoingo porã!” he'i 'rã okuapy.

8 Teĩgue ju xevy pe Senhor ombou oayvu. Ha'e vy aipoe'i:

9 — Zorobabel ma opo py ae kova'e oo omboypy rire ha'e ae ju 'rã omomba, ha'e rami peikuaa aguã Senhor ixondaro reta va'e pendea py xembouague.

10 Ha'e gui mba'emo kyrĩ'i va'e anho ojapoa rã amongue oexa vy nombovarei teĩ ha'e kuery ae ju 'rã oguerovy'a oexa vy Zorobabel opo py peteĩ ixã oo mbotya ra'ãa oiporu ramo — he'i. Ha'e gui sete texa ikuai va'e ma Senhor rexa yvy jave rupi oexa pota oikovy va'e.‡

11 Ha'e gui xee aporanduve ju ixupe:

— Mba'erã tu mokoĩ oliveira rembypy oiporu kuaa ha'e oiporu kuaa e'ỹa re tataendy'y jovaive re hi'aĩ va'e?

12 Teĩgue ju xeayvu vy aporandu avi:

— Ha'vy mba'erã tu mokoĩ oliveira rakãgue yvy'iry azeite iju porã rei va'e rape ouro guigua oĩ va'e?

13 Aipoe'i:

— Ndereikuaai teri va'e ty'y?

Xee ambovai vy

— Any, xeruvixa — he'i.

14 Ha'e ramo aipoe'i:

— Peva'e mokoĩ ma Senhor yvy jave re ipo'aka va'e pe omba'eapo va'erã omoĩ mbyre — he'i.

* 4:2 Judas 9 * 4:3 Apocalipse 11.3-4 py oĩa rami mokoĩ oliveira rembypy ma mokoĩ ava Nhanderuete pegua, Nhe'ẽ rupi vy mba'emo ojapo kuaa va'e. Apy ma Josué ha'e Zorobabel 'rã jaikuaa (versículos 13-14 py). † 4:6 Ha'e va'e jave ma Zorobabel oĩ Israel kuery ruvixa Jerusalém py. Sacerdote yvateve va'e Josué reve Zorobabel ojapo ju Nhanderuete pegua templo oity pyre, amboae regua kuery ndojapo ukaxei teĩ (Esdras 3-6). ‡ 4:10 Templo omboyta jave py hetarã kuery amongue ojae'o rei templo yma guare tuvixave ete va'ekue re ima'endu'a vy (Esdras 3.10-12). Sete texa ikuai va'e re ma ijayvu ju 'rã Apocalipse 5.6 py.