6
Eliseu peteĩ haxa ovu aguã rami ojapoague
1 Ha'e gui profeta kuery remimbo'e kuery ikuai va'e aipoe'i okuapy Eliseu pe:
— Apy ndereve orekuaia ma nhanemboty rei'i ete.
2 Ha'e nunga rupi toroo Jordão yakã re, ha'e gui peteĩ-teĩ rogueru aguã yvyra, peteĩ oo nhandekuai atyrã rojapo aguã.
Ombovai:
— Tapeo ha'vy — he'i.
3 Ha'e ramo ha'e kuery va'e regua peteĩ aipoe'i:
— Ha'eve 'rã ndee voi reo aguã ore nerembiguai kuery reve.
Eliseu ombovai:
— Xee aa avi 'rã — he'i.
4 Ha'e rami vy oo ha'e kuery reve.
Jordão yakã rembe re ha'e kuery ovaẽ vy oake'o okuapy yvyra.
5 Ha'e gui peteĩ yvyra hi'aĩ va'e oake'o vy haxa oity yy py. Ha'e ramo ojapukai vy aipoe'i:
— Aikore xeruvixa! Haxa ma nhomba'e aiporu va'ekue — he'i.
6 Ha'e ramo Nhanderuete remimbo'e oporandu:
— Mamo tu ho'a ra'e?
Ha'e gui ixupe oexa uka ramo Eliseu peteĩ yvyra ojaya vy omombo yy py. Ha'e vy ojapo ferro guigua ovu aguã rami.
7 Ha'e vy
— Emoatã ju ke — he'i ramo okuave'ẽ vy ojopy.
Síria pygua kuery reve joguero'aa jave Eliseu nhopytyvõague
8 Ha'e gui Síria pygua huvixa opu'ã Israel kuery rovai. Ha'e vy yvatekueve reve nhomongeta vy peteĩ henda re onhembopy'aa rupi aipoe'i:
— Ha'e py 'rãe ha'eve japyta ranhe aguã — he'i.
9 Ha'e rami teĩ Israel pygua huvixa pe Nhanderuete remimbo'e aipoe'i uka:
— Penheangu ke ha'e rupi peaxa e'ỹ aguã, mba'eta ha'e py 'rã Síria pygua kuery oo — he'i uka.
10 Ha'e ramo Nhanderuete remimbo'e omombe'u ma voi rire ijayvuague katy Israel pygua huvixa voi omondouka guembiguai kuery oikuaa pota va'erã. Ha'e rami vy oo jepe nho. Ha'e va'e ramigua ma mbovykue rei e'ỹ oiko.
11 Ha'e nunga rupi Síria pygua huvixa opy'a py nda'evei etea oendu. Ha'e vy guembiguai kuery oenoĩ vy aipoe'i ha'e kuery pe:
— Pemombe'u na xevy nhande kuery va'e regua mava'e tu Israel pygua huvixaa katy oo va'e.
12 Ha'e ramo hembiguai va'e regua ombovai:
— Xeruvixa, avave rei ndorooi ri. Ha'e rami avi profeta Eliseu Israel re oĩ va'e ae ri Israel pygua huvixa pe omombe'u kuerei 'rã rekeaty py ndeayvua voi — he'i.
13 Ha'e ramo aipoe'i:
— Tapeo, pexa pota mamo pa oĩa re, xee ajopy uka aguã — he'i.
Ha'e gui ma ixupe
— Dotã tetã py rima oĩ — 'ea.
14 Ha'e ramo ha'e katy omondouka kavaju, karóxa ha'e xondaro kuery ipy'a guaxukueve. Pyávy ha'e kuery ovaẽ vy ojokopa tetã.
15 Ha'e gui ma Nhanderuete remimbo'e rembiguai aje'ive'i reve ovy vy oẽ vy oexa mbovy rei e'ỹ ikuai va'e, kavaju árygua ha'e karóxa revegua kuery. Jovaive re ojokopa ra'e. Ha'e ramo hembiguai aipoe'i Eliseu pe:
— Aikore xeruvixa! Mba'e tu jajapo ta?
16 Eliseu ombovai:
— Ekyje eme. Mba'eta ha'e kuery reve ikuai va'e gui nhanderevegua kuery hetave — he'i.
17 Ha'e gui ma Eliseu onhembo'e vy aipoe'i:
— Senhor, ajerure hexa reipe'a aguã oexa kuaa aguã rami — he'i. Ha'e ramo hembiguai rexa Senhor oipe'a ramo Eliseu yvýry rupi oexa tata revegua kuery kavaju árygua ha'e karóxa yvy'ã rupi ikuai va'e.
18 Ha'e gui ma hovaigua kuery ha'e kuery rovai ou ramo Eliseu onhembo'e ju Senhor pe. Ha'e vy aipoe'i:
— Ajerure ndevy: Embogue ke ha'e kuery rexa oexa e'ỹ aguã — he'i ramo Eliseu ijayvuague rami vy omboguepa hexa, ndoexai aguã rami.
19 Ha'e gui ma ha'e kuery va'e regua pe Eliseu aipoe'i:
— Kova'e tape ma ha'evea ramigua e'ỹ, neĩ kova'e tetã oĩ va'e voi. Peju xerakykue, ha'e rogueraa 'rã ava peka va'ea katy — he'i. Ha'e rami vy Samaria tetã py ogueraa.
20 Ha'e gui ma Samaria tetã py ha'e kuery ovaẽ ma ramo Eliseu aipoe'i:
— Senhor, eipe'a ju kova'e avakue rexa, ha'e kuery oexa ju aguã — he'i. Ha'e ramo ha'e kuery rexa Senhor oipe'a ramo oexa rã Samaria tetã mbyte py ra'e ma ikuai.
21 Ha'e nunga Israel pygua huvixa oexa vy oporandu Eliseu pe:
— Xeru, ajukapa 'rã? Tajukapa pa?
22 Ombovai:
— Any teve, ejuka eme. Rejuka aguã ha'eve va'e ma ndee ae kyxe ha'e nderapa reve rejopy va'ekue anho. Ha'e rã kova'e kuery pe ma eru ruka mbojape ho'u va'erã ha'e yy oy'u aguã. Ha'e gui ma tojevypa ju nguvixaa katy ae — he'i.
23 Ha'e ramo ha'e kuery pe huvixa ojapo ngaru tuvixa ete va'e. Ha'e ramo okaru ha'e oy'u okuapy. Ha'e ramo mae omondoukapa rã nguvixaa katy ju oje'oi. Ha'e rami rire Síria pygua kuery ndouvei ranhe Israel yvy re mba'emo oipe'a aguã.
Samaria py karuai oikoague
24 Ha'e va'e rire Síria pygua huvixa Ben-Hadade va'e ma teĩgue ju ojeupegua xondaro kuery omboaty ramo oje'oi vy ojokopa okuapy Samaria tetã.
25 Ha'e nunga rupi Samaria py oiko karuai vaikue. Ojokopaa rã tetã mbyte py mburika'i kãgue rive ovende 'rã oitenta hatã'i va'e prata re, ha'e apykaxu'i repoxi mboapy rai teĩ cinco re 'rã ovende.
26 Ha'e gui ma Israel pygua huvixa tetã kora rupi oaxa ovy jave ixupe ojapukai nhendu peteĩ kunha va'e:
— Xepytyvõ ke, xeruvixa — he'i.
27 Huvixa ombovai vy aipoe'i:
— Senhor nanepytyvõi ri ramo magui tu xee ajou 'rã roipytyvõ aguã? Mba'emo moa'yĩaty gui, tyrã pa uva onhamiaty gui teve 'rã ajou?
28 Huvixa oporanduve ju ixupe:
— Mba'e tu ha'vy rereko?
Kunha va'e ombovai:
— Kova'e kunha xerevegua aipoe'i va'ekue xevy: “Eme'ẽ ndepi'a'i ja'u va'erã, ha'e gui ko'ẽ ramo ma xepi'a ju 'rã ja'u”, he'i va'ekue xevy.
29 Ha'e rami vy xepi'a'i ranhe nhamomimoi vy ja'u. Ha'e rami teĩ ko'ẽ jevy ixupe xee “Aỹ ma ndepi'a ju eme'ẽ ja'u aguã”, ha'e ramo onhomi — he'i.
30 Ha'e rami kunha va'e ijayvu rã huvixa oendu vy omondoro oao tetã kora rupi oaxa ovya pyve. Ha'e ramo heta va'e kuery oexa rã oao guýry huvixa onhemonde ra'e ajukue voxa guigua py rive.
Eliseu “Heta mba'e ju 'rã pejou”, he'iague
31 Ha'e ramo huvixa aipoe'i:
— Kurive Safate ra'y Eliseu akã ijaxi'y áry gui aipe'a e'ỹ rã Nhanderuete taxemoingo axy oipotaa rami — he'i.
32 Ha'e rami vy huvixa peteĩ ava omondouka Eliseu-a katy, ngoo py oguapy oiny ramo nhomongeta va'ety kuery reve. Tembiguai ovaẽ e'ỹ mbove ma voi Eliseu aipoe'i nhomongeta va'ety kuery pe:
— Pexa 'rã jojuka rive va'e ra'y xeakã ayaarã ombou va'e. Pexa pota ke, tembiguai ovaẽ jave pemboty okẽ, pejoko guive. Ha'e va'e rakykue rupi ou avi 'rã ri huvixa. Ipy ambua pendu 'rã — he'i.
33 Ha'e kuery reve ijayvu teri jave ovaẽ nhendu tembiguai. Ha'e gui huvixa voi ovaẽ, mba'eta aipoe'i: “Kova'e mba'emo vai ma Senhor-a gui ae ou ramo mba'e re tu xee arõve ta orerepy aguã?” he'i.