9
Nhanderuete pe Jó nombovai kuaaia rami ijayvuague
1 Ha'e ramo Jó ombovai vy aipoe'i:
2 — Anhetẽ, xee voi aikuaa rã ha'e rami ae.
Ha'e rami teĩ marã rami vy 'rã tu avakue onhemboeko porã Nhanderuete renonde?
3 Mba'eta xapy'a rei hexeve avakue nhombojovake ramo
mil-kue oporandua regua neĩ peteĩve ma nombovai kuaai 'rã.
4 Ha'e ma opy'a py oikuaapa ha'e ipo'akapave va'e.
Mava'e tu hexe opu'ã reiague gui oo porã ju 'rã?
5 Ha'e ma oipe'a 'rã yvyty ikuai va'e oikuaa okuapy e'ỹ re.
Opoxya py ombovaipa 'rã.
6 Ha'e ma yvy omomyĩ vy oguerova 'rã oĩa gui,
ha'e ramo ijyta oĩ va'e oryryipa 'rã.
7 Kuaray pe ha'e ijayvu rã ndojopevei 'rã.
Omo'ã 'rã guive jaxy-tata ikuai va'e.
8 Ha'e ae'i oipyo va'ekue yva,
ha'e ye'ẽ áry rupi oguata 'rã oikovy.
9 Ha'e ma jaxy-tata apoare: Ursa, Hendy guaxu va'e,
Eixu, jaxy-tata kuaray ijapu'a'ia katy ikuai va'e guive.
10 Ha'e ma mba'emo tuvixa va'e oikuaapy e'ỹ apoa,
mba'emo porã omombe'u kuaapy e'ỹ guive.
11 Ma'ẽ, xapy'a rei xeyvy'iry rupi ha'e oaxa rã xee ndaexai 'rã.
Xerenonde rupi ete oiko teĩ xee ndaikuaai 'rã.
12 Mba'emo ha'e oipe'a ta ramo mava'e tu ojoko 'rã?
Mava'e tu aipoe'i 'rã ixupe: “Mba'e tu rejapo?”
13 — Nhanderuete ma nomboaxa rivei 'rã opoxya.
Ha'e ramo henonde rupi ojero'a 'rã okuapy Egito pygua pytyvõa kuery.
14 Ha'e ramo mba'exa tu xee ambovai ta?
Mba'exa tu aikuaa 'rã xeayvurã, hexeve ajogueroayvu aguã?
15 Xee xereko porã va'e rire teĩ ixupe ma ndaxeayvu kuaai 'rãgue.
Ha'e rami 'rãgue py xemboayvuarã pe ajerure 'rãgue xemboaxy aguã re.
16 Hery rupi ajapukai rã ombovai teĩ
xee aikuaa rã noendui 'rã ajerurea.
17 Mba'eta xemou'ũ yvytu atã va'e py,
ha'e mba'e re'ỹ xemoingo axyve tema.
18 Ha'e ndoejai xepytuẽ aguã rive.
Ha'e rami 'rãgue py xere ombou xereko axyarã.
19 Xapy'a rei ipo'akaa re aikuaa potaxe ramo ma ha'e aipoe'i 'rã: “Apy ma aĩ.”
Ha'e gui anhemboeko porãxe ri ramo “Mava'e tu xerenoĩ?” he'i 'rã.
20 Xee ma heko porã va'e aiko va'e rire teĩ xeayvu py ae rive 'rãgue aexa uka xereko vaia.
Anhetẽ rupi xepy'a teĩ ae ma ha'e xekuaa 'rã otekoavy va'e rami.
21 — Ha'e rami avi xee ma anhetẽ rupi xepy'a va'e, xenhe'ẽ py ndajeayvuveikue py aiko,
neĩ xerekove re ae ma voi napenai.
22 Xevy pe ma opa mba'e peteĩ'i rami meme merami.
Ha'e rami vy aipoa'e: “Ha'e ma joo rami 'rã omomba anhetẽ rupi ipy'a va'e ha'e heko vai va'e”, ha'e.
23 Mba'emo vai jojuka xapy'a ramo
ha'e ojojai 'rã ojejavy e'ỹ va'e ojexavai rã.
24 Heko vai va'e kuery po py omboaxaa ma yvy
teĩ Nhanderuete omo'ã joguerekoa kuery rova.
Ha'e'ỹ ri ha'e nunga moingoa oiko ramo mava'e tu omoingo?
25 — Xe'ára aikoa ma onha va'e gui oaxa pojavave.
Oaxa vyvoi, ha'e rã ndaexai xembovy'aarã va'ekue.
26 Oaxa pojava ovy kanoã jai rogue gui ojapo pyre rami,
ha'e taguato vixo'i re oguejy xapy'a va'e rami.
27 Xapy'a rei xee aipoa'e 'rã: “Xee xerexarai 'rã ajexavaia re,
ajepe'a 'rã xeporiaua gui, ha'e vy avy'a 'rã”, ha'e.
28 Ha'e rami va'e rire teĩ haxy aendu va'e xemongyje teri 'rãgue,
mba'eta aikuaa porã ndee xekuaa 'rã heko porã va'e rami e'ỹ.
29 Ha'e rami vy xembopaga 'rãe.
Ha'e ramo mba'erã tu anhea'ãve ta?
30 Xapy'a rei yro'y rykukue py ajau,
ha'e kavõ py xepo aiky'a'o
31 teĩ ndee yapo py ju 'rã xemombo.
Ha'e ramo xeao ae voi ojapo 'rã xegui ojeguarua aguã rami.
32 Mba'eta Nhanderuete ma xee ramigua ava e'ỹ oiko.
Ha'e rami e'ỹ va'e rire xee ambovai 'rãgue oremboayvu aguã katy rojoguerua rupi ma voi.
33 Ndoikoi orembyte
ore mokoĩve re opo omoĩ va'erã.
34 Xe'áry rupi gui yvyra po'i'i ha'e oipe'a,
ha'e naxemongyjevei ma va'e rire
35 ha'eve 'rãgue akyje e'ỹ re xeayvu aguã.
Ha'e rami e'ỹ rã nda'evei xevy.