6
Jó onhemboeko porãa rupi ijayvuague
1 Ha'e ramo Jó ombovai:
2 — Ai! Xeayvua re anhetẽ oikuaa potaa va'e rire,
ha'e mba'emo opejaa py xeporiaua opejaa va'e rire
3 ha'e va'e ma anhetẽ ita ku'i ye'ẽ rembe rupi ikuai va'e gui ipoyive 'rãgue.
Ha'e nunga rupi ae xevai reve xeayvu va'ekue.
4 Mba'eta Ipo'akapave va'e ma guembiporu hu'y py xenhyvõmba,
ha'e ramo xenhe'ẽ py aendu veneno ramigua.
Xerovai meme Nhanderuete ombou xemongyjearã.
5 Mburika'i yvy'ãa rupigua nda'u nhuũ re okaru reve onhe'ẽ 'rã teve?
Vaka kuery nda'u onhe'ẽ 'rã okaru porãa py?
6 Juky e'ỹ re teve ja'u 'rã he'ẽ e'ỹ va'e?
Tyrã uru rupi'a xiĩa re oĩ 'rã teve heea?
7 Xenhe'ẽ py nda'uxei va'ekue
aỹ ajeguaru reve teĩ ha'u.
8 — Nhanderuete ajerurea ojapo va'e rire,
aipota va'e ha'e omoingo va'e rire!
9 Nhanderuete pe ha'eve va'e rire xemokanhy voi aguã,
opo oupi vy xejuka ete aguã!
10 Ha'e nunga oiko ma va'e rire xepy'a guaxu 'rãgue,
haxy aendu temaa py teĩ apo-apo 'rãgue avy.
Mba'eta xee ma Iky'a e'ỹ va'e ayvu rovai xeayvu va'e'ỹ.
11 — Mba'e tu arõve ta, xembaraete vy e'ỹ?
Mba'erã tu aikove riae ta, amano aguã rami tema aiko vy?
12 Xembaraetea nda'u ita rami hatã va'e?
Xero'o nda'u overa va'e guigua rami hatã va'e?
13 Any! Naendui ae xepytyvõarã.
Xegui oipe'apaa ma xembaraeterã va'ekue.
14 — Ojexavai va'e pe irũ kuery omboaxya'i oexa uka va'e rire,
Nhanderuete renonde ojererokyjea gui ojepe'a e'ỹ rã.
15 Ha'e rã xeryvy kuery ma anhetẽ rupi e'ỹ xerereko.
Ha'e kuery ikuai peteĩ yakã oxyry atã vy hembe rupi oĩa rami
16 yro'y ogueroxyry reve,
yro'y apĩ hyku ovy jave,
17 ha'e rami teĩ haku jave oxyry atã va'ekue typa rive va'e rami,
ndaevovovei ha'e oxyryague rupi ndoxyryvei va'e rami.
18 Ha'e ramo oguata va'e kuery yy rekaa rupi ojepekuavo 'rã jogueravy tape oo aguã va'ekue gui,
ha'e vy tekoa e'ỹa katy oje'oi vy omanomba 'rã ha'e py.
19 Temá yvy gui oguata va'e kuery oeka teĩ yy oxyry atã va'e,
Sabá gui oguata va'e kuery voi iporiaupa 'rã yy re.
20 Yy oĩ aguã re ojerovia va'ekue oxĩmba 'rã okuapy.
Oxyryague py ovaẽ vy ndoikuaavei rei 'rã okuapy.
21 Ha'e rami ae peẽ kuery voi xevy pe mba'everã ovare e'ỹ va'e pendekuai.
Mba'eta ajexavai rã pexa vy penhemondyipa rive.
22 Xee nda'u aipoa'e: “Peme'ẽ ke mba'emo xevy”, ha'e teve?
Tyrã pa “Peme'ẽ mba'emo pereko va'e xepytyvõ aguã”, ha'e teve?
23 “Xereraa jepe ke xemoingo axya po'akaa gui”,
e'ỹ vy “Xerepy ke porayvu e'ỹ va'e kuery po gui”, ha'e teve pẽvy?
24 — Xerekombo'e na, ha'e rã xee akyrirĩ 'rã.
Pemombe'u porãve na mba'e nunga py pa ajejavyague.
25 Anhetẽ ayvu ha'evea ramigua ma oenduxe vai pyrã meme!
Ha'e rã peẽ kuery ma mba'erã tu pendeayvu ete xevy?
26 Peẽ kuery xemongetaxe ri ty'y xeayvua re,
peteĩ ndaekorãvei va'e yvytu pe rive ijayvu va'e rami xeayvu rire?
27 Tyre'ỹ kuery re teve pexa 'rã xortea,
ha'e pejogueroayvu 'rã teve peneirũ repyrã re?
28 Ha'e gui aỹ peẽ kuery xemboaxy'i ri vy pema'ẽ porã xere,
ha'e pexa penerenonde ndaxeapuia.
29 Peikuaa pota ju ke, ajerure pẽvy, ha'eve'ỹa rami xekuaa e'ỹ aguã.
Peikuaa pota ju, ha'e vy peikuaa 'rã ha'evea rami aikoa.
30 Xeayvua py teve ha'eve'ỹa ramigua pendu?
Xejuru py ha'eve'ỹ va'e re xeayvu va'e rire nda'u xee voi ndaikuaai 'rãgue teve?