4
Jó pe Elifaz ijayvu eteague
1 Ha'e ramo Temã pygua Elifaz ombovai. Ha'e vy aipoe'i Jó pe:
2 — Xapy'a rei amongue ndevy ijayvu ramo nerendui 'rã ri ty'y?
Ha'e rami avi mava'e tu ojejoko 'rã ijayvu e'ỹ aguã?
3 Ma'ẽ, ndee ma mbovy e'ỹ rei rekombo'e va'ekue,
ha'e ipo kangy va'e remombaraete kuerei va'ekue.
4 Ndeayvua py reipytyvõ va'ekue onhepyxanga va'e kuery,
ha'e remombaraete ju va'ekue henapy'ã kangy va'e.
5 Ha'e rã aỹ ma ndere ju ha'e nunga ou ramo ndee nerenduxei 'rã.
Ndee rejexavai vy nanderekorãvei.
6 Nhanderuete renonde rejererokyjea rupi ve'ỹ ri ty'y rejerovia,
rearõ reikovya ha'e ndereko porãa rupi ve'ỹ ri ty'y reiko?
7 — Nema'endu'a pota ke: Ojejavy e'ỹ va'e pa okanhy 'rã?
Mamo tu heko porã va'e omombaague?
8 Xee aexaa rami, mba'emo vai nhotỹare kuery ma
ha'e nungakue ae ju 'rã omono'õ.
9 Nhanderuete ipytuẽ ramo rive ha'e kuery ikuai axy 'rã.
Opoxya rupi oipeju rã okanhymba 'rã.
10 Ha'e ramo guary kuery voi inharõ teĩ okyrirĩ 'rã okororõa gui,
guary ra'y kuery raĩ guive opẽmba 'rã.
11 Ha'e rami vy guary kuery ikangy 'rã oje'oivy mba'eve ndojukavei vy.
Guary kunha ra'y kuery voi opa rupi 'rã oaĩmba.
12 — Peteĩ ayvu aendu xee ae'ia py omombe'ua rã.
Haxy'i py aendu kuaa xeapyxa py ijayvua mbegue rã.
13 Pyávy, ajexa ra'ua re aikuaa pota ete reve,
avakue oke vaipa jave
14 ou karamboae xemondyi ha'e xemboryryipaarã.
Xekãgue eteve voi oryryipa.
15 Ha'e ramo peteĩ nhe'ẽ oaxa xerenonde rupi.
Ha'e rami vy ojapo xe'a xerete rupi ikuai va'e opu'ãmba aguã rami.
16 Ha'e va'e opyta ho'amy va'eri ndaexa kuaai hova.
Peteĩ mba'e rive ojekuaa aexaa py.
Jypy nonhendui mba'eve. Ha'e gui ma aendu peteĩ aipoe'i va'e:
17 “Imarã va'e kuery nda'u heko porã 'rã Nhanderuete renonde?
Avakue nda'u iky'a e'ỹ va'e 'rã oiko imoingoare renonde?
18 Ma'ẽ, Nhanderuete ma guembiguai kuery re ndojeroviai 'rã.
Mba'eta guembiguai anjo kuery re eteve voi oikuaa teko vai oĩa.
19 Ha'e rã yapo guigua py hoo va'e re katuve ma.
Ha'e kuery ma yvyku'i gui rive ojapo pyre,
ha'e tanambi rami rive ju 'rã omou'ũa.
20 Aje'ive ha'e kuery itui'i 'rã, ha'e gui ka'arukue ju omombaa 'rã.
Okanhy 'rã raka'e rã peve guarã, avave rei oikuaa pota e'ỹ re.
21 Ha'e kuery rekove oipe'aa ramo
omano 'rã 'arandua oupity e'ỹ re”, he'i.