28
Yvy guýry mba'emo porã oĩ va'e avakue oguenoẽ kuaa re Jó ijayvuague
1 — Anhetẽ, prata re yvy jo'oa ikuai,
oĩ avi ouro ky'a'oaty.
2 Ferro guive oguenoẽa 'rã yvy gui,
ha'e rã overa va'e ma ita py ojoua.
3 Avakue omoexakã 'rã pytũ anaa rupi,
ha'e hexakãa opaa peve oo vy oeka 'rã ita porãgueve
pytũ anaa py oĩ va'e.
4 Ojo'o 'rã yvy oike aguã avakue ikuaia gui mombyry,
oguata va'e kuery oikuaa e'ỹa py.
Ha'e kuery ikuaia gui mombyry 'rã ikuai
peteĩ ixã re ovava-vava oinya py.
5 Yvy gui ma oiko 'rã tembi'u,
ha'e rã iguýry ma tata py okaiague rami 'rã ojekuaa.
6 Ha'e pygua ita re oĩ 'rã safira,
ha'e gui iku'ikue re ma ouro oĩ.
7 — Ha'e va'e tape ma guyra jo'ua kuery ndoikuaai,
taguato ndoexai va'e ae.
8 Vixo inharõ ha'e tuvixa va'e nopyrõi 'rã ha'e rupi,
guary ra'y voi ndoaxai ha'e rupi.
9 — Avakue opo py tembiporu oguereko va'e py ombota-mbota 'rã ita re,
ha'e vy yvyty ikuai va'e oipe'a 'rã iguy peve.
10 Ombokua 'rã ita rupi
oexa aguã hepyve va'e oĩ va'e ha'e javi.
11 Omboty 'rã yy rape ikuai va'e peteĩve henda py otyky e'ỹ aguã rami,
hexakãa katy oguerupa aguã hi'ã py oĩ va'ekue.
Arandu anhetẽ va'e me'ẽa Nhanderuete oikoa re Jó ijayvuague
12 — Ha'e rã 'arandua ma mamo tu oĩ?
Mamo tu oĩ mba'emo jaikuaa ete aguã?
13 Ha'e va'e repy ma avave ndoikuaai,
yvy re avakue ikuaia rupi ndojouai 'rãe.
14 Yvykua vaikue aipoe'i: “Xere ma ha'e nunga noĩ”,
ye'ẽ voi “Xea py noĩ avi” he'i.
15 Ouro oiky'a'o pyre re teĩ nda'evei jajogua aguã,
neĩ prata voi nda'evei hekovia japeja aguã.
16 Mba'eta ouro Ofir gui ogueru pyre ha'e javi gui ovareve va'e,
ônix hepyve va'e ha'e safira ikuai va'e gui guive.
17 Ouro teĩ ma 'arandu rami e'ỹ iporã va'e, neĩ itaendy ma voi.
Jeguaa ouro oiky'a'o pyre guigua re teĩ nanhamboekoviai 'rã.
18 'Arandu oĩa py ma ita coral ha'e itaendy ikuai va'e re nhanderexaraipa 'rã.
Pérola jajoua gui voi ha'eveve 'arandu jarekoa.
19 Etiópia gui topázio herua teĩ ha'e va'e ma 'arandu rami e'ỹ ovare,
neĩ ouro iky'a e'ỹ va'e voi.
20 — Ha'e nunga rupi magui tu ou 'arandu?
Mamo tu oĩ mba'emo jaikuaa aguã?
21 Mba'eta temimoingo ikuai va'e oexaa gui onhomia,
guyra yvate rupi oveve va'e gui guive.
22 Yvykua vaikue ha'e manoa aipoe'i:
“Oreapyxa py roendu rive 'arandu oikoa”, he'i.
23 Nhanderuete anho oikuaa 'arandua katy tape oo va'e,
ha'e ae oikuaa oĩa.
24 Mba'eta ha'e ma yvy apy rupi peve oexa pota,
yva guýry ikuai va'e ha'e javi 'rã oexapa.
25 Yvytu poyia ha'evea'i rami Nhanderuete oeja
yy guive ituia peve oa'anga jave,
26 oky nhavõ guarã oeja,
ha'e yapu overa reve va'e raperã omoĩ jave,
27 ha'e va'e jave py ae 'arandu oexa avi vy oikuaa uka raka'e.
Ha'e va'e re oikuaa pota ma vy omoĩ atã raka'e.
28 Ha'e vy aipoe'i avakue pe: “Pendu ke:
Senhor renonde pejererokyjea ma pene'arandurã oĩ,
ha'eve'ỹ va'e gui pejepe'a vy 'rãe peikuaa mba'emo”, he'i.