14
Nhanderekove oaxa pojava ovya re Jó ijayvuague
1 — Kunhague gui itui'i va'ekue ma xapy'a'i 'rã ikuai,
ha'e kuery re oĩ ojexavai aguã anho.
2 Itui'i 'rã yvoty ixorĩ va'erã rami rive.
Kuaray'ã rami okanhy vy ndojekuaavei 'rã.
3 Ha'e ramigua avakue re ri ty'y reikuaa pota ta,
ha'e nerenonde remboayvu ta?
4 Mava'e nda'u ha'eve'ỹa gui oguenoẽ kuaa ta mba'emo ha'eve va'e?
Avave rei.
5 Ha'e kuery ikuai aguã ára reipapa ma voi imoiny,
ndereve ae oĩ mbovy jaxy pa ikuai aguã.
Avakue rekove rejoko rire
ha'e va'e rovai ndoaxai 'rãe.
6 Ha'e kuery re ema'ẽve eme ikane'õgua'i aguã,
omba'eapo va'e rami o'ára opaa py ovy'a'i aguã.
7 — Mba'eta yvyra voi oguereko oarõ aguã,
mba'eta ojayaa ma teĩ hoky jevy nho 'rã,
mbovy rei e'ỹ 'rã ikuai henhoĩ ju va'ekue.
8 Yvy re hapo inhyma ramo,
ha'e yvy py hi'y ipiru ramo
9 yy reakuã gui rive ju 'rã henhoĩ.
Ha'e rami vy hapo ju 'rã ovy yvyra ipyau va'e rami.
10 Ha'e rã avakue ma omano ma vy itui tema 'rã.
Avakue omano rire mamo tu opyta?
11 Yupa py yy oĩ va'ekue typa,
ha'e yakã typa vy ipiru va'e rami,
12 ha'e rami ae avi avakue onheno vy nopu'ãvei ma 'rã.
Yva oime teria ja nomyĩvei 'rã,
okeague gui nombovya jevyi 'rãe.
13 Xenhono porãa ma ramo ndee xemo'ã 'rãgue,
xenhomi 'rãgue ndepoxya ára oaxa peve!
Ha'e gui peteĩ ára rea'anga 'rãgue
xere nema'endu'a ju aguã!
14 Avakue omano ma rire nda'u ovy ju 'rã ri?
Ha'e rami rã xee amba'eapo poyi aikovya pukukue re arõ 'rã aikovy
xerekoviarã ovaẽ peve.
15 Ndee xerenoĩ 'rã, ha'e rã xee ma rombovai 'rã.
Rexaxe ju 'rã neremimoingo ndepo py rejapo va'ekue.
16 Ha'e rami vy reipapapa 'rã aguataa,
ha'e nanema'endu'avei 'rã ajejavyague re.
17 Xereko vaiague re nderexarai 'rã voxa py omboyru pyre re rami,
rejao'ipa 'rã atekoavyague.
18 Ha'e rami avi yvyty iku'ipa ha'e ivaipa 'rã ovy,
itaova voi ho'a 'rã oĩague gui,
19 yy omomba 'rã ita,
ha'e tyguaxu vy ogueroxyry 'rã heravy yvy ku'i.
Ha'e rami ae avi ndee rembovaipa 'rã mba'emo avakue oarõ va'e.
20 Ha'e kuery re ndepo'aka riae ramo
ha'e kuery opa 'rã oje'oivy.
Ha'e kuery pe nderova amboae rami rexa uka reve
remondouka 'rã mombyry.
21 Ta'y kuery omboetea teĩ tuu kuery ndoikuaai 'rã.
Ha'e rami e'ỹ vy omo'yvyĩ'ia teĩ ae ma tuu kuery ndoikuaai 'rã.
22 Ha'e kuery ma guete re anho 'rã oendu haxy va'e,
ha'e guekovea re ae 'rã ojexavai — he'i.