20
વિજય માટે પ્રાર્થના
મુખ્ય ગવૈયાને માટે. દાઉદનું ગીત.
1 સંકટના સમયે યહોવાહ તારી મદદ કરો;
યાકૂબના ઈશ્વરનું નામ તારું રક્ષણ કરો.
2 પવિત્રસ્થાનમાંથી તને સહાય મોકલો
અને સિયોનમાંથી તને બળ આપો.
3 તે તારાં સર્વ અર્પણોનું સ્મરણ કરો
અને તારું દહનીયાર્પણ માન્ય કરો.
4 તે તારા હૃદયની ઇચ્છા પ્રમાણે આપો
અને તારી સર્વ યોજનાઓ પૂરી કરો.
5 તારા ઉદ્ધારમાં અમે આનંદ માનીશું
અને આપણા ઈશ્વરને નામે આપણી ધ્વજાઓ ચઢાવીશું.
યહોવાહ તારી સર્વ અરજો સ્વીકારો.
6 હવે હું જાણું છું કે યહોવાહ પોતાના અભિષિક્તને બચાવે છે;
તે પોતાના પવિત્ર આકાશમાંથી પોતાના જમણા હાથની
તારકશક્તિથી તેને જવાબ આપશે.
7 કોઈ રથ પર ભરોસો રાખે છે અને કોઈ ઘોડા પર,
પણ આપણે આપણા ઈશ્વર યહોવાહના નામનું સ્મરણ કરીશું.
8 તેઓ નમીને પડી ગયા છે;
પણ આપણે ઊઠીને ઊભા થયા છીએ.
9 હે યહોવાહ, રાજાને વિજય આપો;
જ્યારે અમે વિનંતિ કરીએ, ત્યારે અમને મદદ કરો.