124
શત્રુઓથી છુટકારો મળતાં સ્તુતિગાન
ચઢવાનું ગીત; દાઉદનું.
1 હવે ઇઝરાયલ એમ કહો,
“જો યહોવાહ અમારા પક્ષમાં ન હોત,”
2 જ્યારે માણસો અમારા પર ચઢી આવ્યા ત્યારે,
“જો યહોવાહ અમારા પક્ષમાં ન હોત,
3 તો તેઓનો ક્રોધ અમારા ઉપર સળગી ઊઠતાં
તેઓ અમને જીવતા જ ગળી જાત.
4 પાણીની રેલો અમને તાણી જાત,
પાણીએ અમને ડુબાડી દીધા હોત.
5 તે અભિમાની માણસોએ અમને પાણીમાં ડુબાડી દીધા હોત.”
6 યહોવાહની સ્તુતિ થાઓ,
જેમણે તેઓના દાંતનો શિકાર થવાને અમને સોંપ્યા નહિ.
7 જેમ પારધીની જાળમાંથી પક્ષી છટકી જાય, તેમ અમારા જીવ બચી ગયા છે;
જાળ તૂટી ગઈ છે અને અમે બચી ગયા છીએ.
8 આકાશ અને પૃથ્વીના સર્જનહાર,
યહોવાહ અમારા મદદગાર છે.