66
Tupàn imuwete haw
Zegar haw
1 Tuwe teko ywy nànànar umume'u Tupàn ikatu haw urywete haw rehe uhapukaz taw pupe wà nehe.
2 Pemuzàg zegar haw ikatu haw rehe har izupe nehe.
Pemono ikatu haw rehe imume'u haw ipuràg eteahy ma'e nehe, izupe nehe.
3 Peze'eg nezewe Tupàn pe nehe.
— Neremiapo kwer umupytuhegatu kar teko a'e wà.
Nekàgaw uhua'u tuwe no.
Te neàmàtyry'ymar ukyze newi uzeamumew pà nerenataromo wà.
4 Ywy nànànar nemuwete katu wà.
Umuzàg zegar haw nekatu haw rehe wà no.
Teko paw umuzàg zegar haw nerer ikatu haw rehe a'e wà, peze Tupàn pe nehe.
5 Pezur Tupàn hemiapo kwer hexak pà nehe.
Pepytuhegatu ikatuahy ma'e teko wanupe iapo pyrer hexak mehe nehe.
6 Uzapo yryhu ywy uxinig ma'e romo a'e.
Zaneipy wahaw yrykawhu upy rehe wata pà wà.
Zanerurywete katu hemiapo kwer rehe.
7 Upureruze'eg putar tuweharupi upuner haw rupi nehe.
Ume'egatu teko ywy nànànar wanehe, weha pupe a'e.
Tuwe ni amo nuzàmàtyry'ym kwaw Tupàn a'e wà nehe.
8 Tuwe ywy nànànar paw umume'u zanezar ikatu haw wà nehe.
Tuwe umuzàg zegar haw ikatu haw rehe har wahy haw rupi wà nehe.
9 Zanemuikuwe kar a'e.
Nazanemu'ar kar kwaw.
10 O Tupàn, ureagaw pe ne.
Teko umukatu parat tata pupe imupyràn pà wà. Nezewegatete uremukatu pe ureagaw pà ne.
11 Uremu'ar kar pe purupyhykaw pupe.
Ereraha kar ma'e ipuhuz katu ma'e urekupe pe ne no.
12 Eremupyrog kar ureàmàtyry'ymar urerehe ne wà.
Oroho tata rupi. 'Y rupi oroho no.
Ko 'ar rehe kury, urererur pe uremimaw pe muite ureàmàtyry'ymar wanuwi ne kury.
13 Araha putar ma'ea'yr hapy paw pyràm neràpuz me ihe nehe.
Amono putar heremimume'u kwer newe nehe.
14 Amume'u ma'e newe imono pyràm ma'erahy ipuraraw mehe ihe.
Amono putar tuwe a'e ma'e newe nehe.
15 Araha putar àràpuhàràn hawitu ma'e kuzà ihe wà nehe, ma'ea'yr hapy haw rehe hapy pyràm romo ihe wà nehe.
Azuka kar putar tapi'ak awa ihe wà nehe. Àràpuhàrànete azuka kar putar ihe wà nehe no.
Wanàtàxiner uzeupir putar ywak rehe nehe.
16 Pe Tupàn wi ukyze ma'e paw pe wà, pezur pezeapyaka katu pà nehe.
Amume'u putar Tupàn ihewe hemiapo kwer peme ihe nehe.
17 Ahapukaz ihe, hepytywà àwàm henoz pà ihe.
Na'e amume'u ikatu haw hezegar pà.
18 Aze mo amonokatu hema'enukwaw paw ikatu 'ym ma'e hepy'a pe,
Ne hezar naherenu iwer mo pe ne.
19 Herenu katu zote Tupàn a'e.
Uwazar heze'eg awer ihewe.
20 Amume'u Tupàn ikatu haw ihe, ta'e wenu katu hereminozgwer tuweharupi a'e xe.
Nahekyty'ym kwaw a'e.
Heamutar katu a'e.