110
Tuwihawete Tupàn hemixak kwer
Zegar haw Tawi hemiapo kwer
1 Tupàn Tuweharupi Wiko Ma'e uze'eg tuwihawete hezar pe.
— Eapyk heawyze har rehe nehe.
Amono putar neàmàtyry'ymar nepy iwy pe ihe wà nehe, i'i izupe.
2 O tuwihawete, Tupàn Tuweharupi Wiko Ma'e umuhàmuhàz putar nepuner haw a'e nehe.
Uzypyrog imuhàmuhàz tà Zeruzarez pe nehe. — Eiko neàmàtyry'ymar wazar romo nehe, i'i.
3 Amo 'ar mehe ereàmàtyry'ym putar ne wà nehe, o tuwihawete.
A'e 'ar mehe teko neremiruze'eg ur putar newe zauxiapekwer romo wiko pà wà nehe.
Zuwiri uzexak kar izi'itahy a'e.
Nezewegatete uzemono'og putar kwàkwàmo oho ywytyr newe imonokatu pyrer rehe wà nehe, neàwàxi pà wà nehe.
4 Tupàn Tuweharupi Wiko Ma'e umume'u ko ma'e wemiapo ràm a'e.
Nuzewyr kwaw uze'eg awer wi nehe.
— Ereiko putar xaxeto romo tuweharupi nehe,
Mekizetek haikweromo har romo nereko pà nehe, i'i Tupàn.
5 O tuwihawete, Tupàn wiko neawyze har rehe.
Weityk putar amogwer tuwihawete wikwahy haw 'ar mehe wà nehe.
6 Umume'u putar teko ywy nànànar wanemiapo kwer paw rupi nehe.
Upyk putar ywy zeàmàtyry'ymawhu pe har umàno ma'e kwer wanetekwer wapupe nehe.
Weityk putar ywy nànànar wanuwihawete wà nehe.
7 Pe rupi tuwihawete uwi'u putar 'y yrykaw pe har pupe a'e nehe.
Upu'àm putar teko paw waneitykar romo wiko pà nehe.