40
1 Na'e Tupàn uze'eg Izo pe kury.
2 Izo, aiko Tupàn upuner wera'u ma'e romo ihe. Nezewe rehe we heàmàtyry'ym pe ne.
Aipo erepytu'u putar nehe. Aipo erewazar putar heze'eg ihewe nehe.
Izo uwazar Tupàn ze'eg izupe pitài haw rupi
40:3-5
3 Na'e Izo uze'eg a'e kury.
4 O Tupàn Tuweharupi Wiko Ma'e, aiko ikàg pixik 'ym ma'e romo ihe.
Ma'e a'e putar newe neze'eg iwazar pà newe nehe.
Hepyta wer heze'eg 'ym pà.
5 Aze'eg tetea'u wera'u ihe.
Naheta kwaw amo ma'e heremimume'u ràm kury.
Tupàn uwazar wi Izo ize'eg izupe
40:6–41:34
Aipo nekàgaw nuzawy kwaw hekàgaw
6 Na'e ywytuhu àmàn inuromo har imyteromo Tupàn uwazar Izo ze'eg izupe kury.
7 Exak kar awa ipuruzukaiwahy ma'e romo nereko haw ihewe nehe kury.
Ewazar nerehe hepuranu àwàm ihewe nehe kury.
8 Aipo nepuruexak kar wer iko hekatu 'ymaw rehe purupe.
Aipo aiko ikatu 'ym ma'e iapo har romo. Aipo ereiko ikatu 'ym ma'e iapo 'ymar romo.
9 Aipo nekàgaw nuzawy kwaw hekàgaw.
Aipo neànoànogaw ikàg heànoànogaw ài.
10 Aze erepuner hezàwe, emunehew nekàgaw nepuràgeteahy haw inuromo nehe,
Nekatuahy haw inuromo nehe.
11 Eme'e wiko wera'u ma'e nànàn nehe.
Emopok nekwahy haw wakutyr nehe, ikàg 'ym ma'e romo wamuigo kar pà nehe.
12 Azeharomoete. Eme'e wanehe ikàg 'ym ma'e romo wamuigo kar pà nehe.
Ekamik iaiw ma'e waneko haw pe ne wà nehe.
13 Ezutym a'e teko paw ywy pupe ne wà nehe.
Ezàpixipixi paw rupi umàno ma'e kwer wapyta haw pe ne wà nehe.
14 Aze erezapo nezewe haw nehe, aiko putar nepuner haw imume'u àràm izypy romo ihe nehe.
— Azeharomo erezepyro nepo pupe ne, a'e putar newe nehe.
Mo upuner meemot ipyhyk haw rehe a'e
15 Eme'e miaruhu meemot her ma'e rehe nehe.
Uruapo ihe. Azapo meemot nezewegatete ihe no. U'u ka'api'i tapi'ak ài.
16 Nezewe rehe we ikàg tuwe a'e. Exak ikàgaw nehe.
Ho'o ikàg azeharomoete.
17 Upir uwaz. Huwaz tàtàahy ywyràkàxigyw hàkà ài.
Ho'o hetymà rehe har ikàgatu no.
18 Ikagwer tàtàahy takwar zàwenugar ita morog iapo pyrer ài.
Hetymà nuzawy kwaw ywyra hàkàgwer zàwenugar itaper iapo pyrer a'e.
19 Heremiapo kwer purumupytuhegatu kar wera'u ma'e romo hekon a'e.
Ihe aiko iapo arer romo ihe. Apuner heitykaw rehe no.
20 Hemi'u ka'api'i a'e, hezuz ywytyruhu rehe a'e.
Miar ipuruzukaiwahy ma'e uzemaraz a'e pe wà.
21 U'aw xu 'yw iwy pe.
Uzeàmim ywy yrykaw izywyr har rehe wywàràn inuromo.
22 Xu 'yw uzapo u'àgaw izupe wà.
Ka'akyr yrykaiwyr har umàmàn izywyr wà.
23 Aze typy, nukyze kwaw 'y wi.
Aze 'y Zotàw yrykaw pe har uzeupir ixi henaw, nezewe rehe we nukyze kwaw izuwi.
24 Mo upuner heha izo'okaw rehe wà. Mo upuner ipyhykaw rehe wà.
Mo upuner ixi ipyhykaw rehe miar pyhykaw pupe wà.