27
Uwazar Izo ize'eg izupe
27:1-12
Nazapo kwaw ikatu 'ym ma'e ihe, i'i Izo a'e
1 Izo uze'eg putar a'e nehe kury.
2 Amume'uahy putar ko ma'e Tupàn upuner wera'u ma'e her rehe ihe kury.
Na'ipurumume'u wer kwaw hekatu haw rehe a'e.
Umynehem hepy'a iro haw pupe.
3 Ukàgaw ihewe imur mehe we,
Hemupytuhem kar a'e,
4 Hezuru numume'u pixik kwaw ikatu 'ym ma'e nehe.
Heapeku numume'u pixik kwaw temu'emaw nehe.
5 — Pemume'u ikatu 'ym ma'e heremiapo kwer nehe, ta'e azapo tuwe ikatu 'ym ma'e ihe xe, na'e pixik kwaw peme nehe.
— Nazapo kwaw ikatu 'ym ma'e ihe, a'e putar herekuwe mehe we nehe.
6 Namume'u kwaw amo ma'e nehe. — Heremiapo kwer ikatu, a'e putar hepytu'u 'ym pà nehe. Akwaw hekatu haw.
— Erezapo ikatu 'ym ma'e ne, na'e pixik kwaw hezeupe.
Tuwe Tupàn uzepyk heàmàtyry'ymar wanehe nehe
7 Hekatu 'ymaw imume'u har paw wà,
Heàmàtyry'ymar paw wà,
Tuwe Tupàn uzepyk wanehe ikatu 'ym ma'e ài nehe, iaiw ma'e ài nehe.
8 Tupàn o'ok putar hehe uzeruzar 'ym ma'e waneko haw wanuwi nehe.
Ma'e wàro putar i'ok ire wà nehe.
9 Aze waneko haw zawaiw katu wanupe nehe,
Tupàn nuenu kwaw wanehapukaz mehe wà nehe.
10 Ta'e Tupàn nuiko kwaw wamurywete kar har romo a'e xe.
Nuze'eg pixik kwaw upuner wera'u ma'e pe a'e wà.
11 Apumu'e putar Tupàn ipuner haw uhua'u haw rehe nehe.
Amume'u putar upuner wera'u ma'e hemiapo ràm peme nehe.
12 Nan. Namume'u kwaw nehe, ta'e pexak a'e ma'e paw rupi xe.
Màràzàwe tuwe pepyta xe iranaiw ma'e ài peze'eg pà.
Zopar uze'eg 4 haw rupi a'e
27:13-23
Tupàn uzepyk ikatu 'ym ma'e iapo har wanehe
13 Amume'u putar Tupàn upuner wera'u ma'e hemiapo peme nehe kury.
Uzepyk awa ikatu 'ym ma'e wanehe a'e, upuruzuka ma'e wanehe a'e no.
14 Wana'yr ima'uhez putar wà nehe.
Aze heta tetea'u wana'yr wà,
Nezewe rehe we umàno putar zeàmàtyry'ymawhu pe wà nehe.
15 Ipaw ire wikuwe wiwi ma'e umàno putar uma'eahy pà wà nehe.
Wanemireko kwer nuzai'o kwaw wanehe wà nehe.
16 Iaiw ma'e upuner parat tetea'u imono'ogaw rehe nehe.
Upuner putar kamir tetea'u ipyhykaw wà nehe. Upuner putar ma'e tetea'u imono'ogaw rehe uzeupe azeharomoete nehe.
17 Amo 'ar mehe amo teko ikatu ma'e umunehew putar a'e kamir a'e wà nehe.
Amo awa imunar 'ym ma'e wiko putar a'e parat izar romo wà nehe no.
18 Aze awa ikatu 'ym ma'e uzapo wàpuz nehe,
Na'arewahy u'ar putar nehe. Nuzawy kwaw zanu kyhaw. Upaw tàrityka'i.
Ko rehe uzekaiw ma'e uzapo tàpuzràn uker haw romo ko pe. Upaw na'arewahy. Tàpuz awa ikatu 'ym ma'e hemiapo kwer nuzawy kwaw agwer tàpuzràn.
19 Awa ikatu 'ym ma'e oho uker haw rehe hemetarer katu ma'e romo.
Noho wi kwaw nezewe nehe.
Ume'e mehe nuexak kwaw wemetarer, ta'e oho izuwi xe.
20 Ikyzeahy haw nuzawy kwaw 'y ko imimar. Typy haw wà. Upyk putar imumaw pà.
Pyhaw ywytuaiw àmàn inuromo har omomor putar muitea'u nehe.
21 Ywytuaiw kwarahy heixe haw wi ur ma'e
O'ok putar a'e awa hàpuz wi nehe.
22 Na'arewahy ur putar ikutyr ipuhareko 'ym pà.
Uzapo ma'e tetea'u uzepyro pà ywytu wi.
23 Awa uzàn a'e. Ywytu utymyze'eg a'e no. Umukyze katu kar ukàgaw ma'e ikaika haw pupe.