10
Hereko haw rehe aze'eg putar ihe nehe kury
1 Hekene'o hereko haw wi.
Amume'u putar hema'enukwaw paw ihe nehe kury,
Iro haw hepy'a pe har imume'u pà nehe kury.
2 O Tupàn, ezepyk zo herehe nehe.
Emume'u heremiapo kwer ikatu 'ym ma'e ihewe nehe.
3 Ne ae heapo pe ne.
Màràzàwe tuwe ma'erahy ihewe ipuraraw haw ikatu newe. Màràzàwe tuwe heretykaw ikatu newe.
Màràzàwe tuwe teko ikatu 'ym ma'e wanemiapo ikatu newe.
4 Heta urereha urewe. Aipo heta nereha newe no.
Uruexak ma'e ure. Aipo erexak ma'e ne no.
5 Aipo nereko haw iaikwera'i urereko haw ài.
Aipo nekwarahy heta haw nuzawy kwaw teko wakwarahy heta haw.
6 Màràzàwe tuwe erezeagaw heremiapo kwer ikatu 'ym ma'e paw ikwaw pà.
Màràzàwe tuwe nepurukwaw wer ikatu 'ymaw heremiapo kwer rehe.
7 Erekwaw ikatu 'ym ma'e iapo 'ymar romo hereko haw.
Ni amo nupuner kwaw nepo wi hepyro haw rehe wà.
Nepo hemumaw iko kury
8 Nepo heapo. Umur herexakaw ihewe no.
Ko 'ar rehe a'e nepo hemumaw iko kury.
9 Nema'enukwaw ko ma'e rehe nehe. Heapo pe ywyzuwa ima'ema'e pà.
Aipo ywy imuku'i pyrer romo hemuigo kar wi putar pe nehe no.
10 Hemuzàg kar pe heru pe hehy rehe we.
Umur hereko haw ihewe wà.
11 Erema'ema'e hekagwer herazuk rehe we heretekwer romo iapo pà.
Erepyk heretekwer hero'o pupe, hepir pupe no.
12 Eremur herekuwe haw ihewe. Eremur puruamutar haw ihewe no.
Erezekaiw iko herehe, a'e rupi hemuigo kar pe iko.
13 Akwaw neremiapo ràm nepy'a pe
Imonokatu pyrer ihe kury.
14 — Aipo Izo uzapo putar ikatu 'ym ma'e a'e nehe, ere nezeupe.
— Aze uzapo nehe, namunàn kwaw izuwi nehe, ere nezeupe.
15 Aze aiko ikatu 'ym ma'e iapo har romo, heityk pyrer romo aiko.
Aze naiko kwaw ikatu 'ym ma'e iapo har romo, nahekàg kwaw ihe, napuner kwaw heàkàg hupir haw rehe.
Ta'e hemaranugar iaiw ma'e ihewe uzeapo ma'e kwer rehe heme'e mehe xe.
16 Aze aupir heàkàg hekatu haw rehe wiko wera'u ma'e ài,
Ne erezur heraikweromo zàwàruhu iriàw ài.
Erezapo te purumupytuhegatu kar haw hemumaw pà.
17 Tuweharupi erereko heremiapo kwer ikatu 'ym ma'e imume'u har ne wà.
Ihewe nekwahy haw uhu wera'u tuweharupi no. Hekutuk pe nepytu'u 'ym pà.
Ereiko zauxiapekwer imono'og pyrer wazàwe heàmàtyry'ym mehe.
Heputupykahy zo Tupàn
18 O Tupàn, màràzàwe tuwe hemuzexak kar pe ne.
Aze mo àmàno purupe hezexak kar 'ym mehe we, ikatu wera'u mo ihewe.
19 Aha mo hehy hie wi hetymaw pe.
Aiko mo wiko pixik 'ym ma'e romo.
20 Hereko haw uhem etea'i iahykaw rehe.
A'e rupi, hemuigo kar pe puruàmàtyry'ym 'ymaw rehe nehe.
Tuwe turywete haw pixika'i ma'e uhem ihewe nehe.
21 Ata putar nehe. Nazewyr kwaw a'e re nehe.
Ata putar ipytunaw heta haw pe nehe. Aha putar ipytunahy haw pe nehe. Tuwe herurywete heata 'ym mehe we nehe.
22 Ata putar ywy i'àgaw heta haw pe. Nuzeapo kwaw ikatu ma'e a'e pe.
Tatainy a'e pe har nuzawy kwaw ipytunahy haw.