8
1 Kiki, ke dou sosongo ti vaga igoe na tasiqu manana,
ma na tinaqu goto moa inau e tsutsugo.
Me ti ke vaga ia, mi kalina kau ba tsodogo i sautu loki
me tau utu inau kau domigo, me ke tagara goto ke kesa ke pada sa rongona.
2 Ma kau adivanogo i valena tinaqu,
i tana igoe ko sasaniginiau na galuve.
Me sauba kau sauvanigo na uaeni
au lalokoluginia na papasa puipui,
gana ko inuvia.
3 Igoe o moloa na limamu mauli i vavana na lovaqu,
ma na madoamu o kasoginiau.
4 Igamu na daki ni Jerusalem kamu vatsa vaniau inau
laka sauba kamu tau goto adikae gokona na vainaugi
poi kalina ke tsau segeni nina tagu.
Na Ononina Linge
Na Alaala na Daki
5 ?Asei daki vaga ia e maimai talu tana kaomate,
me kulakula kolunogoa nina udu?
Na Daki
Inau nogo au ba galisigo i vavana na gai na gaviga,
i tana nauna nogo igoe o botsa.
6 Ko laka goto na ngaoana sa daki segeni, minau segeni moa;
mo ko laka goto na kasoana sa daki segeni, inau segeni moa.
Na galuve e susuliga vaga saikesa moa na mate;
ma na vaikiligi e susuliga vaga goto na mate.
Maia e botsadato vaga moa na lapina lake
me iru vaga moa na lake loki e vô mate.
7 Me tau goto tangomana na kô ke tsi matesia;
me tagara goto sa obo ke tangomana na munuana.
Me ti vaga kesa ke tovoa na voliginiana na galuve nina omea tatamani,
maia e utu saikesa ke tangomana, me sauba moa kara peâ.
Na Tasina na Daki
8 I tugita tu tamanina kesa tasida vaolu,
ma na tsutuna ara ka tau vati tû moa.
?Ma nagua vaga sauba ka tu nauvania
kalina ke ngaoa sa mane na taugaana?
9 Ti vaga aia na tasida ke vaga na baravatu,
migita sauba ka logovania kesa na kusudato ma ka inilauginia na siliva.
Me ti aia ke vaga na matsapakapu,
migita sauba ka dilaginia na pava ara aqosiginia na gai na sida.
Na Daki
10 Inau na baravatu,
ma na tsutsuqu ara ka vaga ruka na kusudato.
Ma niqu udu e donagininogoa laka kalina inau au totu kolua aia
me rago dou na tobaqu.
Na Mane
11 Aia Solomon e tamanina kesa nina uta na uaeni
tana nauna ara soaginia i Baal Hamon.
Migira ara ngaoa na aqo i laona nina uta na uaeni ia
e kilia kara tusuvania kesa toga na tavina siliva.
12 E dou moa ti a Solomon ke aditamanina nina toga na tavina siliva,
migira na mane aqouta kara aditamaniqira ruka sangatu vaga na vovolina niqira aqo.
!Minau au tamanina kesa niqu uta na uaeni segeni!
13 Igoe niqu udu o totu nogo i laona na uta,
minau au ngaoa kau rongomia na tatangina na liomu,
migira goto gaqu duli ara pitugotoa kara rongomia kalina ko goko.
Na Daki
14 Kiki niqu udu, ko visumai tsaku,
vaga moa na dia vaolu e ulo gaukuti mai tana kelaqira na vungavunga
i tana ara dato na gai sisigini dou.