19
Na Butona Kao Ara Sauvania na Puku Konina a Simeon
1 Na rukanina sasau ara naua e gado i koniqira na vungu tana puku konina a Simeon. Ma niqira butona kao igira e tsau bâ i laona na butona kao ara sauvaninogoa na puku konina a Juda.
2 E adisaigotoa i Beerseba, Seba, Molada,
3 Hasar Sual, Bala, Esem,
4 Eltolad, Betul, Horma,
5 Siklag, Bet Markabot, Hasar Susa,
6 Bet Lebaot mi Saruhen: igira sui kolu ara sangavulu tolu na verabau, kolugira goto na vera tetelo ara totu polipoligira.
7 Mi tugira goto i Ain, mi Rimon, mi Eter, mi Asan: tugira tu vati na verabau, kolugira goto na vera tetelo ara totu polipoligira.
8 E adisaigira sui na vera tetelo ara polipoligira na verabau girani poi tsau i Baalat Beer se i Rama tabana i ata. Iani nogo na butona kao ara sauvanigira na vungu tana puku konina a Simeon kara aditamaniqira.
9 Me rongona e loki sosongo na butona kao ara tamanina igira na puku konina a Juda, te ara saua na turina niqira kao vanigira na puku konina a Simeon.
Na Butona Kao Ara Sauvania na Puku Konina a Sebulun
10 Na tolunina sasau ara naua e gado i koniqira na vungu tana puku konina a Sebulun. Ma na butona kao ara sauvanigira igira e tsau bâ i Sarid.
11 Me tû i tana, ma niqira votavota e votu tsau bâ i Mareal, me vataragi bâ i Dabeset mi tana kô tetelo tabana i longa i Jokneam.
12 Mi tabana bâ i Sarid, e longa bâ me tsau tana vovotana na Kislot Tabor, mi muri me liu bâ i Daberat me dato bâ i Japia.
13 Me tû i tana, me longa babâ goto tsau i Gat Heper mi Etkasin, me pilokalea i Nea tana sautu e vano i Rimon.
14 Mi vava ma na votavota e pilokalea i Hanaton, me ba vosa tana Qou ni Iptahel.
15 Me adisaikolugotoa i Katat, Nahalal, Simron, Idala, mi Betlehem: igira sui kolu ara sangavulu ruka na verabau, kolugira goto na vera tetelo ara totu polipoligira.
16 Igirani nogo na verabau ma niqira vera tetelo ara totu i laona na butona kao ia, ara sauvanigira na vungu tana puku konina a Sebulun kara aditamaniqira.
Na Butona Kao ara Sauvania na Puku Konina a Isakar
17 Na vatinina sasau ara naua e gado i koniqira na vungu tana puku konina a Isakar.
18 Niqira butona kao igira e adisaikolugotoa i Jesreel, Kesulot, Sunem,
19 Haparaim, Sion, Anaharat,
20 Rabit, Kision, Ebes,
21 Remet, Enganim, Enhada mi Betpases.
22 Niqira votavota e vataragi bâ goto i Tabor, mi Sahasuma mi Bet Semes, me ba vosa tana Kô Jordan. Migira sui kolu ara sangavulu ono na verabau, kolugira goto na vera tetelo ara totu polipoligira.
23 Igirani na verabau ma niqira vera tetelo ara totu i laona na butona kao ia, ara sauvanigira na vungu tana puku konina a Isakar kara aditamaniqira.
Na Butona Kao Ara Sauvania na Puku Konina a Aser
24 Ma na tsegenina sasau ara naua e gado i koniqira na vungu tana puku konina a Aser.
25 Niqira butona igira e adisaikolua i Helkat, Hali, Beten, Aksap,
26 Alam Melek, Amad, mi Misal. Mi tabana i tasi e vataragi bâ i Karmel mi Sihor Libnat.
27 Mi kalina e pilo longa, ma na votavota e ba tsau i Betdagon, me vataragi bâ i Sebulun mi tana Qou ni Iptahel me liu bâ tana sautu i vava e kalea i Betemek mi Neiel. Me tave babâ moa me ba tsau i Kabul,
28 Ebron, Rehob, Hamon, mi Kana, me tsau bâ i Sidon.
29 Mi muri, ma na votavota e pilokalea i Rama, me tsau bâ tana verabau loki i Tire ara barapoliginia na baravatu kakai; mi muri me pilokalea i Hosa, me ba vosa tana Tasi Mediteranean. Me adisaikolugotoa i Mahalab, Aksib,
30 Uma, Apek mi Rehob: migira sui kolu ara rukapatu ruka na verabau, kolugira goto na vera tetelo ara totu polipoligira.
31 Igirani nogo na verabau kolugotoa niqira vera tetelo, ara totu i laona na butona kao ara sauvanigira na vungu tana puku konina a Aser kara aditamaniqira.
Na Butona Kao Ara Sauvania na Puku Konina a Naptali
32 Ma na ononina sasau ara naua, e gado i koniqira na vungu tana puku konina a Naptali.
33 Niqira votavota igira e tû i Helep, me liu bâ i Saananim tana gaitabu, me bâ i Adaminekeb mi Jamnia, me tsau bâ i Lakum, me ba vosa tana Kô Jordan.
34 Mi tana, ma niqira votavota e pilovotu me bâ tsau i Asnot Tabor, me tû i tana me ba tsau i Hukok, me vataragi bâ i Sebulun tabana i ata, mi Aser tabana i tasi, mi tana Kô Jordan tabana i longa.
35 Migira na verabau loki ara barapoliginigira na baravatu kakai igira nogo i Sidim, Ser, Hamat, Rakat, Kineret,
36 Adama, Rama, Hasor,
37 Kedes, Edrei, Enhasor,
38 Iron, Migdalel, Horem, Betanat mi Bet Semes: igira sui kolu ara sangavulu siu na verabau, kolugira sui na vera tetelo ara totu polipoligira.
39 Igirani nogo na verabau kolugotoa niqira vera tetelo, ara totu i laona na butona kao ara sauvanigira na vungu tana puku konina a Naptali kara aditamaniqira.
Na Butona Kao Ara Sauvania na Puku Konina a Dan
40 Ma na vitunina sasau ara naua, e gado i koniqira na vungu tana puku konina a Dan.
41 Niqira butona kao igira e adisaikolugira i Sora, Estaol, Irsemes,
42 Saalbim, Aijlon, Itla,
43 Elon, Timna, Ekron,
44 Elteke, Gibeton, Baalat,
45 Jehud, Beneberak, Gatrimon,
46 Mejarkon, mi Rakon, kolugotoa na butona kao polia i Jopa.
47-48 Migirani sui na verabau girani, ma niqira vera tetelo ara totu i laona na butona kao, ara tamanina igira na vungu tana puku konina a Dan. Me visana tagu i muri ma gaqira gala ara tangolia niqira kao. Mara tû igira na Dan, mara ba i Lais mara bokia na vera ia mara tangolia, mara labumatesigira sui na tinonina, mara aditamaniqira na vera ia. Mara totuvia i tana, mara tau nogo soaginia i Lais, ara soaginia moa i Dan, tamavuginia na soana a Dan na mumuaqira.
Na Butona na Kao ara Sauvania a Josua
49 Mi kalina igira na tinoni ni Israel ara suilavagininogoa na votakao, ara tû mara sauvania a Josua na dalena a Nun kesa na turina na kao gana ke tamanina segeni.
50 Vaga nogo na omea e ketsalia na Taovia, ara sauvania a Josua na verabau aia segenina nogo e nongia: aia nogo i Timnat Sera tana kao vungavungaga i Epraim. Maia e logotugua na verabau ia me totu i tana.
51 Ma Eleasar na manetabu, ma Josua na dalena a Nun, migira sui na tinoni lokiloki tana vungu sui tana puku ni Israel, ara saugira na butona kao girani, mara gini aqo na tsonikutsu i Silo i matana na Taovia tana matsapana na Valepolo. Mi tana ara suilavaginia na aqona na votakao.