7
1 Ma Job e goko babâ moa me tsaria,
“Na maurina tinoni i lao eni e vaga saikesa moa ti na mauri tana rarai,
mi tana aqo kakai pipi kalina,
2 me vaga saikesa goto na tseka e rota loki na aqo tana aso
me ngao sosongolia ke totu raviravi;
me vaga moa goto kesa na mane aqoqolo e totupitua na vovolina.
3 Na vula ma na vula au tau lelê dona nagua au totu vania;
na bongi ma na bongi au totu vania moa na rota.
4 Mi kalina au tsaro laka kau maturu, me vaga moa ti e katsi sosongo na bongi;
au pilopilo sailagi moa na bongi popono mau amesia ke tsaku na dani.
5 Na koniqu e dangali poponoa na meri;
me viri palepale na kokoraqu,
ma na butongo e viri rutsu tana voraqu.
6 Ara liu tsaku sosongo na bongiqu, me varangi nogo kau mate,
mau tau nogo amesia laka sauba kau douvisutugua.
7 “Niqu God, ko padatugua laka na mauriqu e kurikuri lê vaga moa ti na magomago;
me utu goto kau dona na magemage tugua.
8 Igoe o morosiau kalina ia, me sauba e utu lelê goto ko reiau tugua.
Me ti vaga igoe ko lalaveau, me utu ko reilakaqu rongona inau kau nanga nogo.
9-10 Kalina na tinoni e mate me utu goto ke visumaitugua,
vaga saikesa moa na parako e lovoligi me vano;
migira sui ara donaginia ara padale saikesalia.
11 “!Tagara! !E utu goto kau totu mui!
Au kore sosongo me dato na tae i tobaqu.
Ma niqu aqo nomoa kau goko.
12 ?Na rongona gua ti igoe o totu pituau sosongo vaga ia?
?O pada ngatsua laka inau au vaga kesa na tuqana vigo na omea mamauri e totu i laona na tasi?
13 Mi kalina inau au padâ kau tsaro me ke gini bisi niqu sosongo,
14 migoe o totoposuliginiau na bolebole,
ma na omea mamataguniga au bolegira tana bongi,
15 poi tsau kalina inau kau padâ laka ke dou bâ moa ti kara ligotiau ma kau mate,
liusia bâ na mauri babâ moa tana koniqu marasibiga vaga ia.
16 Inau au qisi nogo na mauri.
Ko mololeau moa, mo ko laka goto na molorota vaniaqu, rongona na mauriqu e tau nogo katsi.
17 “?Egua vaga na tinoni ti igoe o padaloki sosongolia?
?Megua ti o gini boe sosongo na omea aia e naugira?
18 Migoe o vilekea nina sasaga pipi tana matsaraka,
mo tau goto kuti na tovoleana pipi kalina.
19 ?Sauba ke ngisa ti ko moroligi tetelo
me ke gini mangamanga vaniau na konomiana na luluvequ?
20 ?Egua laka na sasi au naugira inau ara sekoligo igoe na vanga tuvi tinoni?
?Megua ti inau au lia nimu omea na sasanigado?
?Me matena gua ti inau au ngoli sosongoligo igoe?
21 ?Me laka e utu vanigo ko padale vaniau niqu sasi
mo ko luvusile vaniau na omea seko au naugira?
Ke tau nogo oka minau sauba kau totu i laona na qiluqu,
migoe sauba ko lalaveau, me utu goto ko reilakaqu rongona inau kau nanga nogo.”