40
1 Ma na Taovia e tsarigotoa:
2 “A Job, inau na God Susuliga Sosongo, migoe o livusuguradi sosongo vaniau.
Mi kalina ia minau au pitugo moa igoe. ?Sauba ko tuguvisu vaniau niqu goko se tagara?”
3 Ma Job e gokovisu vania na Taovia me tsaria:
4 “?Inau au tau sa rongona tinoni, ma nagua goto tangomana kau gini gokovisu vanigo Taovia?
Me sauba kau tau goto tovoa na tsariana sa omea vanigo.
5 Inau au gini gokonogoa danga sosongo na omea, me tau goto tuguau kau tsarigotoa sa omea.”
6 Mi laona na viru loki ma God e tû me gokovisu vania a Job me tsaria:
7 “Ko tû nogo kalina ia, mo ko goko mala mane,
mo ko tuguvisu vaniau na omea inau kau veisuaginigo.
8 ?Me laka igoe o ngaoa ko tovoa na tsodoana laka inau au vô na pedegoto,
me laka inau au sasi migoe segenimu moa o goto?
9 ?Me laka igoe o susuliga atsa koluau inau?
?Me laka na tatangina na liomu e dona ke poda loki vaga na lioqu inau?
10 Me ti ke vaga ia, migoe ko adia na sasaqu inau,
mo ko gini popolo gamu tangisoa ngiti inilau,
mo ko totu palakae liusigira na tinoni sui.
11 Mo ko morotsuna bâ i koniqira igira na vanga kaekae;
mo ko qetu tsuna vanigira na koremu mo ko pukaliginia niqira kaekae.
12 Eo, ko moro bâ i koniqira mo ko tsogori tsunaligira;
mo ko bingi rutugira igira na vanga tsutsukibo i tana nogo ara totu.
13 Ko munugira sui lakalaka tana kao;
ma na barangengo na mate ke poia na mataqira.
14 Mi tana ti inau saikesa nogo na kesanina kau ida na tsonikaeamu igoe a Job,
ma na tsariana laka igoe segenimu nogo e managamu mo tangomana.
15 “Mo ko reia bâ na Behomot, aia na tuqana vigo na omea atsi.
Inau nogo au volâ aia, mau volago goto igoe.
Maia e gani gana buruburu vaga na buluka.
16 !E patsotso takuti na konina aia, me susuliga sosongo!
17 Ma na kalina e tudato vaga moa na gai na sida,
ma na potena tuana ara kakai takuti.
18 Na sulina ara kakai vaga moa na tapalamila,
ma na tuana ara vaga moa na takutina na tapalalaka katsikatsi.
19 “!Maia saikesa nogo e susuliga liuliu bâ i laoqira na omea tuavati sui inau au volagira!
Inau nogo au aqosia, te inau segeniqu moa au tangomana kau adipukalia gana susuliga.
20 Ma na buruburu na mani palaginiana ara viri dato i kelana tetena
i tana ara sisinagi bamai igira na omea tuavati atsi.
21 Aia e tsatsaro i vavana na gai kokonaga,
me taopoi i laoqira na vuluvulu tana bokoboko.
22 Na gai kokonaga ma na gai melu ara dato liligina na kô
e tabegara na araqira mara ravisiginia.
23 Maia e tau matagu kalina e tatave loki na kô
me tsaro dodo rago moa kalina na Kô Jordan e tatari me tsirikia na matana.
24 ?Masei tangomana ke dokolivania na matana me ke tangolia?
?Se ke kautsiginia na salili na tsotsouna?”