29
A Job e Padavisua Nina Totu Dou Tana Idana
1 Ma Job e tuturiga tugua na goko me tsaria,
2 “!Ke dou sosongo vaniau nomoa ti vaga na mauriqu inau ke vaga tugua tana idana
kalina God e reitutuguau dou!
3 Tana tagu ia ma God e totu sailagi koluau inau,
me mararasia niqu sautu kalina au liu i laona na rodo.
4 Eo, au padavisua moa kalina au mane vaolu moa,
ma God e kulaga dou sosongo vaniau me reitutugudoua na valequ popono.
5 Aia God Susuliga Sosongo e totu koluau tana tagu ia,
migira sui na dalequ ara totu polipoliau.
6 E dadanga dou na tsutsuqira niqu buluka ma niqu naniqoti,
ma niqu gai na olive ara viri kutsudato atsa moa ara dato tana kao vatuvatuga.
7 Me pipi kalina ara totu saisai igira na tinoni lokiloki tana matsapana na veraloki,
minau au ba totu tana sasaqu i laoqira,
8 migira na tinoni vaolu ara tu tabaligi kalina ara reiau au mai,
migira na tinoni lokiloki ara tutû moa tana kukuni taniaqu.
9 Eo, migira gaqira ida na toga ara totu muimui kalina inau au tuturiga na goko,
10 me atsa moa igira na tinoni tangirongo mara mui lê goto.
11 “Igira sui ara morosia na omea inau au naua, mara rongomia na omea inau au tsaria,
ara gini tsonikaeau.
12 Mi kalina igira na tinoni ara tau tamanina sa omea ara ngangaidato vaniau, minau au sangagira;
mau sangagira goto na baka tinamate igira e tagara kesa ke sangagira.
13 Migira ara totu tana rota loki me varangi kara seko pitsu ara reia niqu sasanga mara gini tsonikaeau,
mau sangagira goto na daki tinamate na totu bibiu dou.
14 Pipi kalina moa inau au naugira na omea dou me gotolaka.
15 Mau lia vaga moa ti na mataqira na tinoni koko,
ma na tuaqira na tinoni logu.
16 Mau vaga goto na tamaqira na tinoni ara tau tamanina sa omea,
mi tana pede inau au sogogaqira na tinoni inau au tau donaginigira.
17 Mau adipukalia gaqira susuliga igira na vanga rotasi tinoni,
mau laumaurisigira gaqira lamuta tania na limaqira.
18 “Mau amesia moa laka kau mauri oka,
ma kau mate dodo moa i laona valequ.
19 Au vaga saikesa moa na gai na kô e malobusi sailaginia na lamuna,
ma na kolobu e porisia na arana tana bongi popono.
20 Na tinoni sui ara tau kuti na tsonikaeaqu,
ma na susuligaqu e dato vaolu babâ moa.
21-22 “Kalina inau au saua niqu totogoko vanigira na toga, migira ara totu mui moa,
mara rongomi vatavigira dou na omea au tsaria.
Ma niqu tsaqina goko ara sage i laona na tobaqira,
vaga saikesa moa na kukuduna na usa e tsuna me sage i laona na kao.
Mi kalina inau au goko sui, migira ara tau lele goto tamanina sa goko kara paboginia.
23 Migira sui lakalaka ara gini mage niqu tsaqina goko,
vaga moa na tamanina na uta ara gini magemage na usa murina na aso papara.
24 Mi kalina inau au goko dou vanigira na tinoni ara tau nogo padâ kesa ke galuvegira,
mi tana e gini pidi na tobaqira, mara gini malagaitugua.
25 mau votavanigira na omea kara naua,
mau ida vanigira vaga moa kesa na taovia tsapakae e ida vanigira nina mane vaumate,
mau veregira vaga moa kesa e veregira igira ara tangisia kesa na kulaqira.”