24
1 Me goko baba moa a Job me tsaria,
“?Megua God ti aia e tau titia na tagu i tana ke tinetedougira na tinoni,
me ke naua na pedegoto vanigira igira ara aqodou vania?
2 “Na tinoni seko ara dona na tavongani ratsuana na votavota rongona ke gini dama bâ niqira kao;
mara komia niqira sipi na tinoni tavosi mara molosagegira i laona niqira bara na sipi segeni.
3 Mara lauvanigira niqira asi na baka tinamate,
mara tangoligotoa nina buluka kesa na daki tinamate poi tsau kalina aia ke tsonia na matena popono nina kaoni.
4 Ara surukeliligigira igira ara tau tamanina sa omea
mara turugira kara tsogo ma kara ba taopoi.
5 “Me vaga ia, migira ara vaga kiki moa na asi atsi
mara lalave bamaia nagua kara gania i laona na kaomate mamatsa lê;
me tagara goto sa nauna tavosi i tana kara ba tsodoa na mutsa vanigira na daleqira.
6 Me kilia kara ba aqo tana niqira uta na tinoni tavosi,
ma kara pitsua na vuana uaeni i laona niqira uta na uaeni igira na tinoni vanga tsutsukibo.
7 Mi tana bongi ma kara maturu lê,
rongona e tagara sa omea kara gini tsatsavu me ke gini papara na koniqira.
8 Me porisigira lê na kô na usa e sarara tsuna mai talu tana vungavunga,
me tagara sa valeqira mara ba kapitsa bamai moa tana babana vatu agana kara gini totu raviravi.
9 “Migira na tinoni vanga nauseko ara ba laugira na baka tinamate tania na tinaqira,
mara tû, mara adigotoa na daleqira igira ara tau tamanina sa omea ngiti tuguna niqira kaoni.
10 Migira na tinoni ara tau tamanina sa omea ara vano lê moa me tagara sa polo ke tsavua na koniqira;
Mi kalina ara ba tsakosaigira na uiti i laona niqira uta na tinoni vanga nauseko, migira ara aqo vitoa lê moa.
11 Mi kalina ara gotsa niqira olive gana na oela, mara rapasia niqira vuana uaeni gana na inu,
migira segeniqira ara gini rota na marou.
12 Mi laoqira na veraloki igira ara boka mara ngari mate
ara ngangaidato vania God ke sangagira,
maia God e tau goto gini boe na rongomiana niqira nonginongi.
13 “Mara totu goto visana tinoni igira ara sove tania na marara,
mara tau lele goto donaginia, se kara liu bâ i tana aia e idagana vanigira.
14 Mi tana matsaraka bongibongi maia na mane labupoi e mamata tsaku
me vano na labumatesiaqira igira ara tau tamanina sa omea,
mi tana bongi maia e tû me vano goto na komi.
15 Ma na mane vanga kiboga e pipitua kalina ke sû na aso ti ke ba tsaro kolua na tauna kesa na mane tavosi,
me tsavupoia na matana rongona ke gini tau reigadoviginia ke kesa.
16 Mi tana bongi migira na mane komikomi ara ba ratsia na valeqira na tinoni tavosi,
mara sage i laona mara komia niqira omea levo,
mi tana dani male migira ara ba taopoi tania na marara.
17 Igira ara matagunia na liu tana mararana na dani,
vaga nogo na tinoni tavosi ara matagunia na liu tana rodo.
Ara reingaoa moa na totu tana rodo pulipuli.
18 “Migamu amu tsarivaniau moa, ‘Igira na vanga tsutsukibo e taveligira popono na obo,
maia God e ketsogira niqira kao;
ke gini tau goto bâ ke kesa na aqo tana nina uta na uaeni.
19 Kalina e dato na aso, ma na paparana e rangia na lavo me tsaku e nanga lê.
Me vaga goto na barangengo na mate, aia e lauligi tsaku lea na tinoni vanga nauseko.
20 Me atsa moa ti na tinana segeni nogo ia, maia e tau nogo padavisua;
ma na meri ara ganisuia na konina,
ma nina nauseko ara puka lê sui vaga moa na gai ara kavia me puka lê.’
21 “Eo, e gini laba vaga vania ia, rongona aia e malapekegira sosongo na daki tinamate,
me tau goto galuvegira na daki ara tau tamani daleqira.
22 Tana susuligana segeni nogo aia God e adipukaliginigira na tinoni tangirongo;
mi tana nina aqo moa God, mara gini mate na tinoni vanga tsutsukibo.
23 Me tau utu God ke tamivanigira kara totu bibiu dou, me ke tau laba vanigira sa omea seko;
maia e tuvigira pipi kalina moa.
24 Me atsa moa ti ara tinoni tangirongo kalina ia,
me ke tau oka me sauba kara mate vaga goto igira na tinoni sui;
vaga nogo kalina e ganoga na uiti ma na tinoni ara pitsuligigira sui.
25 ?Me ti ke tau laba vaga ia, masei tangomana ke sauvulagia laka inau au pero,
me tagara rongona lê niqu goko au tsaria?”