22
Na Tolunina na Vaigokovigi
(22:1–27:23)
1 Me goko sui a Job, me tû a Elipas ni Teman me tsaria,
2 “?Laka e tangomana sa tinoni ke sangâ God kesa tana aqo
atsa moa ti aia e sasaga loki sosongo?
3 ?Me laka e pelua God Susuliga Sosongo sa omea tana rongona nogo e gotolaka nimu sasaga igoe?
?Se laka nimu sasaga dou igoe o sangaginia aia?
4 Me tau nomoa tana rongona laka igoe o kukuni tania God
ti aia e gini totosasaga kakai vanigo me kedeginigo.
5 Tagara, mi tana rongona moa igoe o tsukigira danga sosongo na sasi,
ma na omea tabaruga sui o naugira.
6 E tau ngatsu utu ti igoe o sove na tusuqolo vaniana kesa na kulamu aia e kilia na sasanga i konimu,
poi ke sauvanigo talu na polona popono ngiti papadana laka sauba ke tuguvisu vanigo nimu qolo,
me gini tau totuvisu vania sa polona gana na tsavuginiana na konina.
7 Igoe o tongoa na kô vanigira ara kolae mara marou,
mo sove goto na palaaqira igira ara vitoa.
8 Igoe o gini aqo na susuligamu ma gamu tangirongo
na tangoli visuginiana na kao popono.
9 Igoe o tau moa sove na sangaaqira na daki tinamate,
mo ba peqogira goto na baka tinamate.
10 Maia nogo na rongona ti na taviti ara totu polipoligo gana ko gini sogo i laona
me tavongani dangaligo na matagu loki.
11 Eo e rodo popono nogo me gini utugana vanigo na moro,
me taveligo na obo.
12 “A Job, ko morodato mo ko reigira na veitugu ara totu i gotu vasau,
maia God e totu paladato bâ i baragata,
me morotsuna mai i koniqira.
13 Migoe o tû mo veveisua moa, ‘?Nagua nogo e dona God?
?Maia e totu popoi tana parako, me sauba ke koegua ti aia ke pede gotosigita?
14 Na parako matolu e didia me gini utu vania na moro,
kalina aia e liu bamai i kelana na masaoka.’
15 “?Megua igoe a Job laka o padakuti matena moa na liu babâ moa
i tana ara lavu na liu bâ igira na tinoni vanga tsutsukibo?
16 Me atsa moa ti e tau vati tsau mai moa niqira tagu na mate,
migira sui popono e salaligigira sui nogo na obo.
17 Tana idana migira nogoria ara sove tania God mara tsarivania, ‘!Ko mololegami, ma kami totu segenimami!’
Mara tsarigotoa, ‘?Laka nagua vaga na God Susuliga Sosongo tangomana ke nauvanigita igita?’
18 Maia segenina nogo God e naua ti igira ara gini tamani omea levolevo danga.
Minau moa e utu kau padagadovia niqira papada igira na tinoni vanga tsutsukibo.
19 Igira na tinoni dou ara gini magemage, migira e male dou na tobaqira ara kiakia,
kalina ara reigira na vanga tsutsukibo ara gadovikede.
20 Mara tsaria, ‘Pipi sui niqira omea tatamani igira na vanga tsutsukibo ara toroutsa sui,
ma na omea ara kauvisu na lake e ganigira sui lakalaka.’
21 “Mi kalina ia, me dou ti igoe a Job ko naua na vaigotosigi koluana God;
mo ko mololea na nauvaniana vaga ti aia gamu gala.
Me ti vaga igoe ko nauvaganana ia, me sauba ko douvisutugua.
22 Ko tabedougira na omea aia e sasaniginigo;
ma nina tsaqina goko sui ko mololakagira i tobamu.
23 Eo, ma nimu aqo nomoa ko totu palatsuna mo ko pilovisu bâ i konina God,
mo ko tsidavaginigira sui lakalaka na sasaga tabaru tania na valemu.
24 Ko tsoniligigira sui nimu qolumila,
ma nimu qolumila laka ni Opir i laona na kô tatave.
25 Mo ko tamivania moa na God Susuliga Sosongo ke lia ngiti nimu qolumila,
ma nimu siliva angaanga.
26 Mi tana nogo ti sauba igoe ko tsodovulagia laka God nogo na pukuna nimu magemage,
mo ko totu dou i matana.
27 Mi kalina ti ko nonginongi, maia sauba ke rongomia nimu nonginongi,
migoe sauba ko gini mage na manaliana na omea o gini veke na nauana,
28 mo ko tangomana pipi sui tana omea o ngaoa na nauana,
ma na marara sauba ke mararasi sailaginia nimu sautu.
29 Igoe o dona nogo laka God e dona ke molotsunaligira na vanga kaekae
me ke molokaegira igira ara totu palatsuna.
30 Maia God sauba ke maurisigo igoe ti vaga o totu male saikesa i matana,
ma na omea o naugira ara goto dou sui.”