13
1 “Pipi sui na omea amu tsaria igamu, au rei idanogoa inau.
Eo, au donaginigira sui lakalaka.
2 Ma na omea sui amu donaginia, inau goto au donaginia.
Mamu tau lelê goto sasaga liusiau inau.
3 Inau au tau ngaoa na vaimangabarigi koluamui babâ moa igamu.
Au ngaoa moa na isutuguqu segeni i konina God Susuliga Sosongo.
4 Igamu amu dona moa na gini bulesi tinoni nimui goko peropero;
mamu vaga saikesa nogo na mane tatali e vô na tatali.
5 !Ke dou bâ ti kamu tau tsarigotoa sa omea, mi tana ti kara gini padâ na tinoni laka igamu amu sasaga loki sosongo!
6 “Kamu rorongovata kalina inau kau isutuguqu segeni.
7 ?Megua vaga ti amu totu matengana moa na peropero?
?Mamu pada ngatsua laka nimui tsaqina goko peropero nogo kamu sangaginia God?
8 ?Egua amu padâ laka kamu sanga tabana konina God
ma kamu isutuguna aia kalina e ngaoa na tineteaqu inau?
9 ?Me ti vaga God ke vilekea na laomui igamu, me laka sauba ke tsodoa sa omea dou?
?Egua amu pada ngatsua laka tangomana kamu bulesia God vaga nogo amu bulesigira na tinoni?
10 Me atsa moa ti kamu pada popoia moa i laona tobamui na omea vaga ia,
maia sauba ke taimatamui nomoa,
11 ma kamu vatsangia na susuligana loki ma kamu gini matagu mate.
12 Ma nimui goko tabana amu tsaria ara tau lelê tamani sa rongona,
ara vaga moa na papasa lê, ma na kao tsitsi e taqarusa lê.
13 Kamu totu mui dodo moa ma kamu tamivaniau kau goko,
me atsa moa ti nagua ke laba vaniau, minau e utu goto kau totu mui.
14 “Eo, au tau goto matagu. Au vangarau nogo kau goko vania God,
me ti vaga kau mate, me dou vaniau moa.
15 Me atsa moa ti vaga God ke labumatesiau, mi konina aia segeni lelê moa au dona kau vataragi,
Maia nogoria na rongona ti niqu aqo kau isutuguqu segeni i matana aia.
16 Me ti vaga inau kau tau matagu na goko vaniana God,
me sauba ti aia ke reigadovia laka au tau tsukia sa sasi,
me ke galuveau tugua me ke maurisiau.
Rongona e tagara sa tinoni vanga nausasi ke malagai na ba tû i matana God.
17 Mi kalina ia kamu rongomigira niqu tsaqina goko kau tsaritutugu vanigamu.
18 Inau au vangarau nogo kau isutuguqu segeni,
rongona au dona nogo laka e goto niqu sasaga.
19 ?Masei tangomana ke goko mataqu me ke katevulagi vaniau laka inau au sasi?
Me ti vaga ke totu kesa, minau au vangarau nogo na totu mui dodo ma na pituana moa na mate.
20 “God au nongigo ko tamivaniau me ke ruka moa na omea kau veisuago,
me sauba kau tau goto tovoa na taopoi taniamu.
21 Kiki ko mololea na kedeaqu, ma na molomatagu vaniaqu.
22 “Igoe God ko ida talu ko goko, minau sauba kau tuguvisu vanigo.
Se ko tamivaniau inau kau ida na goko, migoe ko tuguvisu vaniau.
23 ?Nagua gira niqu sasi? ?Ma na omea seko gua au naugira?
?Ma na tsutsukibo gua nogo au naua ti o kekeginiau?
24 “?Me rongona gua ti o poivaniau na matamu,
vaga moa ti inau kesa gamu gala?
25 ?Me laka e ulagana ko molo matagu vania na raurau lê e puasalâ na guguri,
se ko takuvia kesa na rau makede lê?
26 “Igoe o keli loki sosongo vaniau,
mo kateli vaniau goto na omea au naugira kalina inau au tinoni vaolu moa.
27 Mo soriginia na tuaqu na itai tapala;
mo tuvigira pipi sui niqu tsakutua,
mo vilekegotoa na maleaqu.
28 Igami na tinoni ami dona kami tavusa vaga moa na kubu tolatola,
ma kami nguta lê vaga moa na polo kalina e gania na mosu.”