2
Hizqeela Xeegetethaa
1 I taako, “Asa na7aw, denda eqa. Ta neera odetanaw koyayis” yaagis.
2 I taara odetiya wode Xoossa Ayyaani ta giddo gelidi, tana ta tohuwan essis; I taw odeysa si7as.
3 “Asa na7aw, ta nena Isra7eele asaako, ta bolla makallida deriyako kiittayis. Entinne enta mayzati hachi gakanaw ta bolla makallida mela de7oosona.
4 Enti wozana muumenne yeelli baynayisata gidiya gisho, ta nena entako kiittayis. Taani, Ubbaa Haariya Goday haysada yaagayis.
5 Ha makallancho asay si7in, si7onna ixin, nabey enta giddon de7eysa enti erana.
6 Asa na7aw, entawunne enta qaalas yayyofa! Kinchoteynne xunduqey ne yuushon de7ikoka, qassi korneta giddon ne uttikoka yayyofa. Enti makallancho koche gidiya gisho entaw woyko enta qaalas yayyofa.
7 Enti makallancho koche gidiya gisho enti si7in, si7onna ixin ta qaala entaw oda.
8 Shin, asa na7aw, ta new odeysa si7a. Ha makallancho asaada neka makallancho gidopa; ne doona dooyada ta new immeysa ma” yaagis.
9 Ta xeelliya wode, Heko, taako micetida kushe be7as; he kushiyan xaatha maxaafi de7ees.
10 I ta sinthan he xaatha maxaafa billis; he maxaafas nam7u baggara yeehoy, azzanoynne zelelsi huuphe qofa gididi xaafetis.