7
ፆሳይ ዳዊታስ ገልዳ ቃላ
(1 ታር 17:1-15)
1 ካዎይ ባ ጋꬎን ዎፑ ግድ ኡትዳፐነ ጎዳይ እያ ዩሹዋን ደእያ እያ ሞርከታፐ ሸምፕስዳፐ ጉየ፥
2 ናብያ ናታናኮ፥ “ታኒ ዝጋፐ ኬፀትዳ ኬꬃን ደአይስ፥ ሽን ፆሳ ታቦተይ ዱንካነን ደኤስ” ያግስ።
3 ናታን፥ “ኦꬃናዉ ነ ዎዛናን ቆፕዳባ ኡባ ኦꬃ፤ ጎዳይ ኔራ ደኤስ” ያግስ።
4 ሽን ሄ ቃማ ጎዳ ቃላይ ናታናኮ ይድ፥
5 “ባዳ ታ አይልያ ዳዊታ ሀይሳዳ ያጋ፤ ‘ታኒ ዳና ኬꬃ ኬፃናይ ነና ግዳካ።
6 ታኒ እስራኤለታ ግብፀ ቢታፈ ከስዳ ዎደፐ ዶማዳ ሀች ጋካናዉ ኬꬃን ደአብከ፤ ታኒ ዱንካነን ያነ ሃነ ዩያሸ ደአስ።
7 ታኒ እስራኤለ አሳራ ዩይዳ በሳ ኡባን ታ አስ እስራኤለ ሄማና መላ ታኒ ሹምዳ፥ “ታዉ ዝጋ ምꬃን አይስ ኬ ኬፃብኪ?” ጋዳ ኦይቻብከ’ ያግስ።
8 “ህዛ፥ ታ አይልያ ዳዊታስ ኦዳ፤ ‘ኡባፈ ዎልቃማ ጎዳይ ኔኮ ሀይሳዳ ያጌስ፤ ታኒ ነና ሄንꬃ በሳፈ፥ ዶርሰ ሄምያ ሶፐ ደንꬃዳ ታ አሳ እስራኤለ ካለꬃና መላ ኦꬃስ።
9 ኔኒ ብዳ በሳ ኡባን ታኒ ኔራ ግዳስ፤ ነ ሞርከታ ኡባ ነ ስንꬃፈ ꬋይሳስ። ሀእ ዛራዳ ታኒ ሀ ሳአን ኤረትዳ ግታ አሳታዳ ነ ሱንꬃ ግታያና።
10 ታኒ ታ አሳ እስራኤለስ በሰ እማዳ፥ ኤንታ ሄ በሳን ቶካና። ኤንቲ ባንታ በሳን ዳና፤ ናምአንꬆ ዳጋሞኮና። ካሰ ዳይናታ ዎደፐ ዶምድ ሀንዳይሳዳ ህዛፐ ጉየ ኤንታ ኢታ አስ ሃረና።
11 ታኒ ነና ነ ሞርከታ ኡባፈ ሸምፕሳና።
“ ‘ሄሳ ቦላ ጉጅድ ጎዳይ ባ ሁጰን ታኒ ነዉ ኬ ኬፃና ያግድ ኦድስ።
12 ነ ባረይ ዉርን፥ ሀይቃዳ ነ ማይዛታ ነ ጋክያ ዎደ ነ ጉልባታፐ ከይዳ ናአ ታኒ ደንꬃና፤ እያ ካዎተꬃ ምንꬃና።
13 ታ ሱንꬃስ ኬ ኬፃናይ እያ፤ ታኒ እያ አራታ መርናዉ ምንꬃ ኤሳና።
14 ታኒ እያዉ አዋ ግዳና፤ እካ ታዉ ናአ ግዳና። እ ባልያ ዎደ ታኒ እያ አሳ ፃምአን፥ አስ ሾጭያ ልሶን ሴራና።
15 ሽን ታኒ ነ ስንꬃፈ ድግዳ ሳኦላፐ ታ ኬሀተꬃይ ኤከትዳይሳዳ እያፐ ኩምꬅ ኤከተና።
16 ነ ኮቻትነ ነ ካዎተꬃይ ታ ስንꬃን መርናዉ ዳና፤ ነ አራታይ መርናዉ ምንድ ኤቃና’ ” ያጋ።
17 ናታን ጎዳይ እያዉ ቆንጨꬃን በስዳ ቃላ ኡባ ዳዊታስ ኦድስ።
ዳዊታ ዎሳ
(1 ታር 17:16-27)
18 ሄሳፈ ጉየ፥ ካዎይ ዳዊቲ ግዶ ገልድ ጎዳ ስንꬃን ኡትድ ሀይሳዳ ያግድ ዎስስ። “አቤት ታ ጎዳ ፆሳዉ፥ ሀች ጋካናዉ ኔኒ ሀይሳ ኡባ ኦꬃናዉ ታ ኦኔ? ታ ሶ አሳይካ አይቤ?
19 አቤት ታ ጎዳዉ፥ ፆሳዉ፥ ሀይስ ነ አይፈ ስንꬃን ጉꬃ ዳንን፥ ስንꬃፈ ነ አይልያ ኮቻታስ ኦꬃናባ ኦዳዳሳ። ታ ጎዳ ፆሳዉ፥ ኔኒ አሳራ ኦደትያ ኦገይ ሀይሴ?
20 “ሀይሳፈ አꬍያባ ታኒ፥ ዳዊቲ አይ ጋናዉ ዳንዳእያና? ታ ጎዳ ፆሳዉ፥ ኔኒ ታና ነ አይልያ ኤራሳ።
21 ኔኒ ነ ቃላ ግሾ፥ ነ ዎዛና ቆፋዳ ሀ ግታባ ኦꬃዳ ታና ነ አይልያ በሳዳሳ።
22 “አቤት ታ ጎዳ ፆሳዉ፥ ኔኒ ግታ። ነ መል ባዋ፤ ኑኒ ኑ ሀይꬃን ስእዳይሳዳ ኔፐ አትሽን፥ ሀራ ፆሲ ባዋ።
23 ነ አሰ ኦꬃናዉ ግብፀፈ ዎዝዳ ነ አሳ እስራኤለ ዳንያ ሀራ ካዎተꬅ ሳአ ቦላ ባዋ። ኔኒ ኤንታዉ ኦꬅዳ ግታነ ማላልስያ ኦሶታ ጋሶን ነ ሱንꬃይ ቢታን ኤረትስ። ኔኒ ነ አሳ ስንꬃፈ ሀራ ካዎተꬃታነ ኤንታ ፆሳታ ጎዳ ከሳዳሳ።
24 ነ አሳ እስራኤለ መርናዉ ነባ ኦꬃዳሳ፤ ምንꬃዳሳ። አቤት ጎዳዉ፥ ነ ኤንታ ፆሳ ግዳዳሳ።
25 “አቤት ታ ጎዳዉ፥ ፆሳዉ፥ ኔኒ ነ አይልያስነ እያ ኬꬃስ ኦꬃና ጋዳ ገልዳ ቃላ መርናዉ ናጋ፤ ነ ቃላꬆ ኦꬃ።
26 ሄሳን ነ ሱንꬃይ መርናዉ ግታ ግዳና። አሳይ ነና፥ ‘ኡባፈ ዎልቃማ ጎዳይ እስራኤለ ፆሳ’ ያጋና። ነ አይልያ ዳዊታ ኮቻትካ ነ ስንꬃን ምንድ ኤቃና።
27 “አቤት ኡባፈ ዎልቃማ ጎዳዉ፥ እስራኤለ ፆሳዉ፥ ኔኒ፥ ‘ነ ኮቻት መርናዉ ካዎታና’ ያጋዳ ታዉ ነ አይልያስ ጫቃዳሳ። ሄሳ ግሾ፥ ታኒ ነ አይለይ ሀ ዎሳ ዎሳናዉ ፃላስ።
28 አቤት ታ ጎዳ ፆሳዉ፥ ኔኒ ፆሰ! ነ ቃላይ ቱማ፤ ኔኒ ሀ ሎኦባታ ኦꬃና ጋዳ ታዉ ነ አይልያስ ኦዳዳሳ።
29 ነ ስንꬃን መርናዉ ዳና መላ ነ አይልያ ኮቻ አንጃ። አቤት ታ ጎዳ ፆሳዉ ነ ግዳይሳዳ ነ አንጅኮ ነ አይልያ ኬꬃይ መርናዉ አንጀታና” ያግድ ዎስስ።