64
1 አቤት ጎዳዉ፥ ሳሎታ ዳካዳ ዱገ ዎꬋ፤
ደረት ነ ስንꬃን ኮኮሮ።
2 ታም ኤፅድ ሃ ፐንትሰይሳዳ ዱገ ዎꬋዳ፥
ነ ሱንꬃ ነ ሞርከታ ኤርሳ፤
ካዎተꬃታካ ነ ስንꬃን ኮኮርሳ።
3 ካሰ ኑኒ ናግቦና ማላታታ
ኔኒ ኦꬅዳ ዎደ ዎꬋዳሳ፤
ደረት ነ ስንꬃን ኮኮርዶሶና።
4 በንፐ ዶምድ፥ ነና አማነትድ፥
ናገይሳታስ ማላታታ ኦꬅዳይ ኔፐ አትሽን፥
ሀራ ፆሲ፥ አሳ ሀይꬅ ስእቤና፤
አሳ አይፈይ በእቤና።
5 ኡፋይትድ ፅሎተꬅ ኦይሳታነ
ነ ኦግያ ቆፐይሳታ ኔኒ ማዳዳሳ።
ሽን ኑኒ ናጋራ ኦሶ አጎና እፅዳ ዎደ
ኔኒ ሀንቀታዳሳ፤ ኑኒ ዋንድ አታኔ?
6 ኑኒ ኡባይ ቱና አስ ግድዳ፤
ኑ ፅሎተꬃ ኦሶ ኡባይ ቱና ጩርቃ መላ።
ኑ ኡባይ ቦንጮዳ ቆለትዳ፤
ኑ ናጋራይ ኑና ጫርኮዳ ፕትድ ኤፍስ።
7 ኔኒ ነ ስንꬃ ኑፐ ገንꬃዳሳ፤
ኑ ናጋራይ ኑና ꬋይሳና መላ አጋዳሳ።
ነ ሱንꬃ ፄገይ ዴና፤
ነና ምንꬅድ ኦይካናዉ ኮየይ ባዋ።
8 ግዶሽን፥ አቤት ጎዳዉ፥ ኔኒ ኑ አዋ፤
ኑኒ ኡርቃ፤ ነ ኡርቃ መꬋዳሳ፤
ኑኒ ኡባይ ነ ኩሸን መትዳ።
9 አቤት ጎዳዉ፥ ዳሮ ሀንቀቶፋ፤
ኑ ናጋራ መርናዉ ቆፖፋ።
ኑኒ ኡባይ ነ አሰ ግድያ ግሾ፥
ኑና በአ።
10 ነ ጌሻ ካታማት መላ ቢታ ግድዶሶና፤
ፅዮነ ካታማይ መላ ቢታ፥
የሩሳላመይ ባይሳ ግድስ።
11 ኑ አዋት እያን ነና ጋላትዳ ጌሽነ
ሎኦ ግድዳ ኑ ፆሳ ኬꬃይ ታማን ፁገትስ፤
ኑ ሎኦ በሳ ኡባይ ላለትስ።
12 አቤት ጎዳዉ፥ ኔኒ ሀይሳ ኡባ በአሸ ስእ ጋኔ?
ሀ ኡባይ ሀንን፥ ኑኮ ስምኪ?
ኔኒ ስእ ጋዳ ዛው ባይና ሴራኔ?