54
ፅዮነ ስንꬃ ቦንቹዋ
1 ናተ፥ የሎና ማይን፥ የፃ!
ናተ፥ እቀታ ኤሮናረ፥ ኡፋይሳን እልላ!
አዝናራ ደእያ ማጫሰ ናይታፐ
ባርካ ደእያ ማጫሰ ናይት ዳራና።
2 ነ ዱንካንያ በሳ ዳልግሳ፤
ዱንካንያ ገሸታ ፕድ ኦꬃዳ ምጫ፤
ፁምሶፓ፤ ዎዶሩዋ አዱሳ፤ ꬍሽያ ምንꬃ።
3 ኔኒ ኡሻችነ ሀድርስ ዳልጋና፤
ነ ኮቻት ካዎተꬃታ ላታና፤
ባይሳትዳ ኤንታ ካታማታን ኬፅድ ዳና።
4 “ያዮፋ፤ ኔኒ ዬላታካ፤
ዳጋሞፋ፤ ኔኒ ካዉያካ።
ነ ያላጋተꬃ ዬላ ኔኒ ዶጋና፤
ነ አምኤተꬃ ቦርያ ህዛፐ ጉየ ሀሳያካ።
5 ነ አዝናይ ነና መꬍዳይሳ፤
እያ ሱንꬃይ ኡባፈ ዎልቃማ ጎዳ።
እስራኤለ ጌሻይ ነና ዎዝዳይሳ፤
እ ቢታ ኡባ ፆሳ ጌተታና።
6 አዝን አግን፥ ዶገታዳ አዛንያ ማጫሳዳ፥
ያላጋተꬃን አዝና ሶፐ ከይዳ፥
ማጫሳዳ ኔኒ ሀናዳ ደእሽን፥
ታኒ ጎዳይ ነና ዛራዳ ፄጋስ።
7 “ጉꬃ ዎደ ታኒ ነና አጋስ፥
ሽን ግታ ቃን ታኒ ነና ዛራዳ ኤሀና።
8 ሱልያ ሀንቆን ታኒ ታ ሶምኡዋ
ኔፐ ጉꬃ ዎደስ ገንꬃስ።
ሽን መርና ማሮተꬃን ታኒ ነዉ ቃታና”
ያጌስ ነና ዎዝያ ጎዳይ።
9 “ሀይስ ታዉ ኖሄ ዎድያ መላ፤
ሄ ዎደ ታኒ ꬋዮ ሃꬃን
ዛራዳ ሳኣ ꬋይስከ ጋዳ ጫቅዳይሳዳ፥
ዛራዳ ነ ቦላ ሀንቀቶና መላነ
ሴሮና መላ ታኒ ጫቃስ።
10 ደረት ቃፃናዉ፥ ዙማት ባንታ በሳፈ ክቻናዉ ዳንዳኦሶና፤
ሽን ታ መርና ሲቆይ ኔፐ ሻከተና፤
ታ ሳሮተꬃ ጫቆይ ኔፐ ክቸና”
ያጌስ ነዉ ቃትያ ጎዳይ።
11 “ነኖ፥ መቶትዳ ካታመ፥ ጎተይ ያነ ሃነ ሾጭዳረ፥
ምንꬅያባይ ꬋይዳረ፥
ሄኮ፥ ታኒ ነና ቦንቾ ሹቻን አሌቅሳዳ ኬፃና፤
ነ ባሱዋ ሳንፓረ ሹቻን ሂፃና።
12 ነ ሹቻ ግምብያ ቁስትያ ዞኦ እንቆ ሹቻን፥
ነ ፐንግያ ጶልያ አልኦ ሹቻን፥
ነ ድርሳ ቦንቾ ሹቻን ግምባና።
13 ነ ናይት ኡባይ ጎዳፐ ታማራና፤
ነ ናይታ ሳሮተꬃይ ዳራና።
14 ኔኒ ፅሎተꬃን ምናዳ ኤቃና፤
ገነይነ ኡንኤꬆይ ኔፐ ሃካና።
ነና ያሽስያባ ዴና፤
ዳጋም ኔኮ ሺቀና።
15 ነና ኦላናዉ ደንደይ ደእኮ፥ ሄስ ታፐ ግደና፤
ነና ቆሀናዉ ኮየይ ደእኮ፥ እ ኩንዳና።
16 “ሄኮ፥ ሁበን ታማ ሁብድ፥
ባ ቆፕዳ ኦላ ሚሽያ ቆፅያ ኡራ ታኒ መꬋስ፤
ꬋይሳና መላ ꬋይሰይሳ መꬍዳይ ታና።
17 ነና ቆሀናዉ ኦሰትዳ አይ ሚሸይካ ነ ቦላ ኦና፤
ነና ሞትያ እንፃርሳ ኡባስ ነ ዛሮ እማና።
ጎዳ አይለታ ላታይ ሀይሳ፤
ታፐ ኤንቲ ኤክያ ፅሎ ሀይሳ” ያጌስ ጎዳይ።