50
እስራኤለ ናጋራነ አይልያ ኪተተꬅ
1 ጎዳይ ያጌስ፤
“ታኒ ህንተ አይዉ የድዳ ፕርማ ዎርቃተይ አዉን ደኢ?
ታኒ ኦደስ ህንተና ባይዛድና?
ሄኮ፥ ህንተ ናጋራ ግሾ ህንተ ባይዘትደታ፤
ህንተ ናቁዋ ግሾ ህንተ አይያ የደታሱ።
2 ታኒ ይዳ ዎደ፥ ሀይሳን አስ አይስ ꬋይዴ?
ታኒ ፄግዳ ዎደ፥ ‘ዬ!’ ጋናዉ አይስ አስ ꬋይዴ?
ታኒ ህንተና ዎዛናዉ ታ ኩሸይ ቃንዬ?
ህንተና አሻናዉ ታዉ ዎልቅ ባወዬ?
ታኒ አባ ሴራዳ መልሳይስ፤
ሻፋታ መላ ቢታ ኦꬃይስ።
ሃꬅ ꬋይን ኤንታን ደእያ ሞሎት ዎቆሶና፤
ሳሞይ ዎꬍን ሀይቆሶና።
3 ታኒ ሳሎታ ꬉማ ማይዛይስ፤
ኤንታ ካማይ ካዮ ማኦ ዳኔስ” ያግስ።
4 ዳቡርዳይሳ ታኒ ቃላን ምንꬆ ኤራና መላ፥
ኡባ ሃርያ ጎዳይ ታዉ ታማርዳ እንፃርስ እሚስ።
እ ታና ዎንታ ዎንታ ባርክስድ፥
ታኒ ታማረዳ ስአናዳ ታ ሀይꬃ ዶዬስ።
5 ኡባ ሃርያ ጎዳይ ታ ሀይꬃ ዶይስ፤
ታኒ ጌላ ግዳብከ፤ ጉየ ስማብከ።
6 ታኒ ታ ዞኩዋ ሾጨይሳታስ፥
ታ ቡቻ ሾደይሳታስ
ታ ጋጩዋ አꬃዳ እማስ።
ታ ቦላ ጩተይሳታፐነ ታና ካዉሸይሳታፐ
ታ ሶምኡዋ ገንꬃብከ።
7 ኡባ ሃርያ ጎዳይ ታና ማድያ ግሾ፥
ታኒ ዬላትከ።
ታኒ ታ ሶምኡዋ ሳሎ ሹቹ ኦꬃስ፤
ታኒ ዬላቶናይሳ ኤራይስ።
8 ታዉ ፕርደይስ ማታን ደኤስ፤
ያትን፥ ታና ሞተይ ኦኔ?
አነ ታራ ሞተታናዉ ኤቆ!
9 ኡባ ሃርያ ጎዳይ ታና ማዴስ፤
ያትን፥ ታ ቦላ ፕርደይ ኦኔ?
ኤንቲ ኡባይ ማኦዳ ጭማና፤
ኤንታ ብል ማና።
10 ህንተ ግዶፈ ጎዳ ያየይ፥
እያ አይልያ ቃላስ ኪተተይ ኦኔ?
ꬉማን ሄመተይነ ፖኦይ ባይናይ እ ኦኔ?
ሄ ኡራይ ጎዳ ሱንꬃን አማነቶ፤ ባ ፆሳን ዘምፖ።
11 ህንተኖ ታማ ኤꬅያ ኡባቶ፥
ላጮ ፆምፐ ህንተዉ ሺሸይሳቶ፥
ህንተ ኤꬅዳ ታማ ፖኡዋን ሄመትተ።
ላጮ ፆምፕያን ስመረትተ፤
ህንተ ታ ኩሸፐ ኤካናዉ ደኤይ ሀይሳ፤
ህንተ ዎልቃማ መቶ ሴላን ዝንአና።