8
ላፑንꬃ ማታሜይ ዶዬቲስ
1 ዶርሳይ ላፑንꬃ ማታሚያ ዶዪዳ ዎዴ ባጋ ሳቴ ጊዴይሳ ሜላ ሳሎይ ሲዒ ጊስ።
2 ሄሳፌ ጉዬ፥ ታኒ ላፑን ሞይዜቲ ኢሜቲዳ ላፑን ኪታንቾታ ፆሳ ሲንꬃን ኤቂዳይሳታ ቤዓስ።
3 ኢፃኔ ጩዪሲያ ዎርቃ ሻቴ ኦይኪዳ ሃራ ኪታንቾይ ዪዲ፥ ያርሾ ቤሳ ማታን ኤቂስ። ኢ ኣራታ ሲንꬃን ዴዒያ ዎርቃ ያርሾ ቤሳ ቦላ ጌሻታ ኡባ ዎሳራ ጉጂዲ ያርሻና ሜላ ኢያው ዳሮ ኢፃኔይ ኢሜቲስ።
4 ኢፃኒያ ጩያይ ጌሻታ ዎሳራ ኢሲፌ ኪታንቹዋ ኩሼፔ ፑዴ ፆሳኮ ኬዪስ።
5 ሄሳፌ ጉዬ፥ ኪታንቾይ ኢፃኔ ጩዪሲያ ሻቲያ ኤኪዲ፥ ኢያን ያርሾ ቤሳፌ ቦንቆ ታማ ኩንꬂዲ ሳዓ ዱጌ ሆሊስ። ያቲን ዴሾይ፥ ዎልዓንꬂ፥ ጊርሲኔ ቢታ ቃፆይ ሃኒስ።
ላፑን ሞይዜታ
6 ሄሳፌ ጉዬ፥ ላፑን ኪታንቾቲ ባንታ ሞይዚያ ፑናናው ጊጌቲዶሶና።
7 ኮይሮ ኪታንቾይ ባ ሞይዚያ ፑኒያ ዎዴ ሻቺኔ ሱꬃራ ዋላኬቲዳ ታሚ ሳሎፔ ቡኪስ። ሳዓፔ ሲኮይ ፁጌቲስ፤ ሚꬃፌ ሲኮይ ፁጌቲስ፤ ጪልዖ ማታ ኡባይ ፁጌቲስ።
8 ናምዓንꬆ ኪታንቾይ ባ ሞይዚያ ፑኒዳ ዎዴ ዎልቃማ ዴሬ ዳኒያባይ ታማን ኤፂሼ ኣባን ዬጌቲስ። ያቲን፥ ኣባፌ ሲኮይ ሱꬁ ጊዲስ።
9 ኣባን ዴዖን ዴዒያ ሜꬌቴꬃፌ ሲኮይ ሃይቂስ፤ ማርካቤታፔ ሲኮይ ꬋይስ።
10 ሄꬓንꬆ ኪታንቾይ ባ ሞይዚያ ፑኒዳ ዎዴ ፆምፔዳ ኤፂያ ዎልቃማ ፆሊንቶይ ሻፋፔ ሲኩዋ ቦላኔ ፑልቶታ ቦላ ሳሎፔ ዎꬊስ።
11 ሄ ፆሊንቱዋ ሱንꬃይ ጫሞ ጌቴቴስ። ሃꬃፌ ሲኩዋ ጫሚሲስ፤ ሃꬃይ ጫሚዳ ጊሾ ዳሮ ኣሳይ ሄ ሃꬃ ኡዪዲ ሃይቂዶሶና።
12 ኦይዳንꬆ ኪታንቾይ ባ ሞይዚያ ፑኒስ። ኣዋፔ፥ ኣጌናፔኔ ፆሊንቶታፔ ሲኩዋ ዴቺስ፤ ኤንታ ፖዑዋፔ ሲኮይ ꬉሚስ። ጋላሳፔ ሲኮይ፥ ቃማፌካ ሲኮይ ꬉሚስ።
13 ኢሲ ኣርጋንꬂ ሳሎ ꬎቁ ጊዲ፥ ፒራꬊሺን ቤዓስ። ሄ ኣርጋንꬃይ ባ ቃላ ꬎቁ ኦꬂዲ፥ «ኣቲዳ ሄꬑ ኪታንቾቲ ባንታ ሞይዚያ ፑናናው ዴዒያ ጊሾ ሳዓን ዴዒያ ኣሳ ኣዬ! ኣዬ! ኣዬ!» ያጊሺን ሲዓስ።