3
Jesús jare Moisés
1 Cherɨvɨ reta, Tumpa peñono tee iyupeguarã. Tumpa etei ara pe ico vae peparavo. Jáeramo pepɨa pe piyemɨngueta cavi Jesús re. Tumpa ombou Jesús umɨmbeu vaerã yandeve Tumpa regua, yande yarovia vaerã jese, jare añave Jesús ico Tumpa oĩ vae pe yanemborɨ vaerã yandepurugüɨrovia re, sacerdote tenondegua omborɨ Israel pegua reta rami.
2 Moisés uyapo cavi mbaravɨquɨ Tumpa umee chupe uyapo vaerã vae. Jae ramiño vi Jesús uyapo cavi mbaravɨquɨ Tumpa umee chupe uyapo vaerã vae.
3 Jare Jesús uyembutuichaca ete Moisés güi. Yamɨjaanga penti tenta. Moisés uyemɨjaanga tenta re. Ẽrei Jesús uyemɨjaanga tenta iyapoa re. Jecuaeño yambutuicha ete co tenta iyapoa tenta güi.
4 Jare penti penti tenta uyeyapoca tenta iyapoa pe. Ẽrei Tumpa uyapo opaete.
5 Moisés uyapo cavi mbaravɨquɨ Tumpa umee chupe uyapo vaerã vae. Jucuarãi uyeyocui cavi Tumpa pe, jare Tumpa uicuaaca cua yandeve yaicuaa vaerã quirãi opaete Moisés imiari Tumpa re vae añete co.
6 Ẽrei Cristo co jae Tumpa Taɨ jare jae co opaete Tumpa re güɨrovia vae reta iYa. Echa'ã yande vi co jae imbae, jecuaeño yave ñaneratangãtu jare yayerovia yave ñaãro ñaĩ vae re.
Tumpa imbae reta iputuu
7 Jáeramo pemandúa Espíritu Santo jei vae re. Echa'ã Tumpa iñee pe yamɨngueta quirãi Espíritu Santo jei yandetenondegua reta pe cuarãi:
“Cua ara piyapɨsaca chiñee re.
8-9 Jáeramo agüɨye piyemɨpɨatanta.
Echa'ã petenondegua reta uyemɨpɨatanta ñana pe ñugüɨnoi yave.
Jae reta chembɨavai jare chembɨarasɨ.
Jare cuarenta año uecha reta opaete ayapo vae.
10 Jáeramo chearasɨ petenondegua reta pe, jare che jae cuarãi:
‘Jecuaeño opia reta chegüi ipɨa pe.
Uipota'ã etei reta uyapo che aipota tẽi uyapo vaerã vae.’
Jucuarãi che jae.
11 Jáeramo chearasɨ chupe reta ramo, che jae cuarãi:
‘Añete co, jae reta ndarau uique Canaán pe.
Echa'ã joco pe uputuuta tẽi co.’
Jucuarãi che jae.”
Jucuarãi jei Espíritu Santo.
12 Jáeramo, cherɨvɨ reta, piñemoa, agüɨye vaerã pepɨa uñemɨtanta perovia'ã Tumpa ramo. Echa'ã pepɨa uñemɨtanta yave, peopiata Tumpa imeño mai ico vae güi.
13 Ẽrei pepuere rambueve, piñemɨatangãtungãtu opa ara rupi, agüɨye vaerã penti pepɨte pe oĩ vae yepe uyemɨpɨatanta mbaeyoa rupi. Echa'ã mbaeyoa ipuere yanembɨtavɨ yayemɨpɨatanta vaerã.
14 Echa'ã yande yayeyapo ma Cristo iĩru retarã jecuaeño yave ñaneratangãtu tenonde voi mburugüɨrovia ñanoi vae re.
15 Pemandúa cua Tumpa iñee pe uyecuatía oĩ vae re:
“Cua ara piyapɨsaca chiñee re” —jei Espíritu Santo—.
“Jáeramo agüɨye piyemɨpɨatanta.
Echa'ã petenondegua reta uyemɨpɨatanta ramo, chearasɨ chupe reta.”
Jucuarãi uyecuatía oĩ.
16 Yepe tẽi uyandu reta Tumpa iñee, ẽrei amocue yandetenondegua reta umbɨarasɨ Tumpa. Añete co, opaete Moisés güeru Egipto güi vae reta umbɨarasɨ Tumpa.
17 Jáeramo Tumpa iarasɨ cuarenta año jocua yandetenondegua reta pe, iyoa reta ramo. Jare jae reta umano ñana pe.
18 Echa'ã Tumpa jei cuarãi:
“Añete co, jae reta ndarau uique Canaán pe.
Echa'ã joco pe uputuuta tẽi co.”
Jucuarãi jei Tumpa. Jare jucuarãi uyeyapo chupe reta, güɨrovia'ã Tumpa ramo.
19 Jáeramo yaicuaa jae reta ipuere'ã co uique Canaán pe, güɨrovia'ã Tumpa ramo.