9
Djolyu maḻŋ'maraŋalana Djamiyulnha
9:1–26 (Saul met Samuel)
1-2 Yolŋu ḏarramu yäku Gitj nhinana yukurrana, yurru ŋayi ŋunhi bäpurruny'tja Bindjaman, ga Gitjku walkurnydja maḻŋ'thurruna yäku Djol. Djolnydja ŋunhi ŋanya dhika buku‐ḻatju' ḏarramu, ŋanya dhika waḻarr‐rumbalnydja ga ŋutu'na rumbalnydja dhika.
3 Waŋganymirriyu waluyu nhanukalaŋuwu mäḻu'mirriŋuwu wäyin winya'yurruna, bala dhikana‐wala waṉḏinana. Ŋayi Gitjthunydja djuy'yurruna Djolnhana, “Gatju marrtjiya ḻarru'‐ḻarruŋa wäyingu,” bitjarrana.
4 Bala yana ŋayi Djolnydja gaŋgathina, garr'yurruna nhanŋuway djämamirrinha, bala maṉḏa marrtjinana. Marrtjinanydja maṉḏa yukurrana‐a‐a, ḻarruŋala‐a‐a marrtjina‐a‐a wäŋalili wiripuŋulili, ga ŋuliŋurunydja ga wiripulili wäŋalili bitjarrana bala, wäŋakurru wäŋakurru ḻarruŋalana yukurrana, ga yakana maṉḏa ŋula maḻŋ'maraŋalanydja.
5 Mukthurrunaŋga yana maṉḏa marrtjina yukurrana ḻarruŋala baḏak, yana liŋgu‐u‐u, bala ŋayi Djolnydja waŋana bitjarrana ŋurikala djämamirriwalanydja, “Yana gonha'yurrana ŋi'. Ŋunha yurru mäḻuny'tja warwuyunna ŋitjalaŋguna.”
6-9 Ga ŋayi ŋunhi djämamirrinydja nhanŋu waŋana bitjarrana, “Wäy, bulnha ŋathili. Dhiyalaŋuminydja wäŋaŋura dhikayi yolŋu yukurra ḏarramu nhina, Godku yolŋu, marŋgi ŋayi warrpam' dhika yulŋunydja, ŋunhi ŋayi ŋuli ḻakaramanydja yuwalknha dhika wal'ŋu. Gul', ŋali dhä‐wirrka'yun ŋanya, ŋayi mak yurru ḻakarama ŋitjalaŋgu ŋunhi wäyinnha maṉḏanha.”
10-14 Bala maṉḏa marrtjinana, ga maḻŋ'maraŋala ŋunhiyi ḏarramunha Djamiyulnha. Yo, ŋunhi maṉḏa nhinana marrtjina, ga ŋunhi buṉbu‐mäypamirrina wäŋa ŋayathaŋala, dharr‐way nhäŋalana maṉḏa ŋanya Djamiyulnhanydja, ŋayi nhinana lili marrtjina mundhurrwu wekanharawu Garraywu.
15 Yo, dhä‐ŋäthiliŋga yana wiripuŋuyu waluyu, ŋayi Garrayyunydja ḻakaraŋala Djamiyulwu bitjarra,
16 “Goḏarrny'tja buŋgamanydja ŋarra boŋguŋu djuy'yurru yuṯanha ḏarramunha nhokala, yurru bäpurruny'tja ŋayi ŋunhi Bindjaman. Nhe yurru ḻiya‐ḻupmaraŋa ŋunhiyi ḏarramunhanydja weyika'yu, liŋgu ŋayina yurru ŋurruŋuyirri ŋarrakalaŋuwunydja miṯtjiwu Yitjuralpuyŋuwunydja; ŋayi yukurra yurru walalanha guŋga'yun, ga walŋakuma walalanha yukurra yurru ŋurukala Bilitjiyawuyŋuwala. Liŋguna ŋarra ŋäkulanydja ŋunhi walala dhä‐wurrupuruŋala waŋana yukurrana buŋgawawu yuṯawu.”
17 Yo, ŋunhi ŋayi Djamiyulyu nhäŋalanydja Djolnha, ŋayi nhinana lili marrtjina dhukarrkurru, dhunupana yana ŋayi Garrayyunydja ḻakaramana, “Dhuwalanhana ya' ŋarra ḏarramunha, nhuŋu ḻakaranhanydja yawungu, dhiyaŋuna gay' ḏarramuyu yurru yukurra ŋayathama ŋarrakunydja malanha.”
18 Ga ŋayi Djolnydja lili marrtjina, bala waŋana dhä‐wirrka'yurruna Djamiyulnha, “Marŋgi muka nhe yulŋunydja? Wanhaka dhika dhäwu'‐gänharamirrinydja yukurra nhina?”
19 Ga ŋayi Djamiyulnydja buku‐wakmaraŋala bitjarra, “Dhuwalaŋga ŋarra yulŋunydja. Nhuma dhiyaŋu maṉḏathu, nhuma yurru ḻuka ŋunhala ŋarrakala, ga goḏarrny'tja ŋarra nhumalanha boŋguŋu djuy'yurruna‐wala.
20 Yaka maṉḏa warwuyurra ŋuriki wäyingunydja maṉḏaku, liŋgu walala maḻŋ'maraŋala. Nhuŋuway yana rumbalwu dhuwala yolŋu'‐yulŋunydja Yitjuralpuyŋunydja ḏukṯuk.”
21 Ga Djolnydja waŋana, “Nhäku warray nhe waŋa yukurra bitjandja? Ŋarranydja dhuwala gali'wuy warray yolŋu, wakinŋu warray, ga ŋarraku ŋunha yindipulu gali'wuy warray walala, ḻurrkun' warray, ga bäpanydja ŋarraku ŋunha yaka warray dharrpal wal'ŋu yolŋu.”
22 Ŋayi Djamiyulyunydja yana garr'yurrunana Djolnha bala nhanukiyingala wäŋalilina, ga ŋunhi walala ḻukanharawuna nhina'‐nhinana, ŋayi Djamiyulyunydja Djolnhanydja nherrara ganaŋ'maraŋalana, ŋurruŋukuŋalana wal'ŋu, ga wekaŋalanydja ŋayi nhanŋu gänaŋuna wal'ŋu wäyin.
23-25 Ŋayi waŋana bitjarra, “Ŋay' ḻukiyana. Ŋarra nhuŋu dhuwala djarr'yuna ganaŋ'maranha yawunguŋga yana.” Bala ŋayi ḻukanana ŋunhalana Djamiyulwala wäŋaŋura, bala dhäŋuru ŋuliŋurunydja ŋayi ŋorranana ŋunhili nhanukalana wäŋaŋura.
26 Ga wiripuŋuyuna waluyu munhakumirrina, Djol ga ŋunhi wiripu ḏarramu djämamirri nhanŋu, gaŋgathinana marrtjinana, ga ŋayi Djamiyulyunydja gumurr‐waŋala maṉḏanha, yana liŋgu‐u‐u ga gonha'yurruna walala ŋunhiyi wäŋa.
Djamiyulyu ŋämirana weyika'yu ḻiya Djolnha
9:27—10:16 (Samuel anointed Saul as King)
27 Ga ŋayi Djamiyulnydja waŋana Djolnha bitjarra, “Way, dhuwala ŋayi djämamirrinhanydja ḏarramunha djuy'yurra ŋathil'yurrana, ŋayi yurru marrtji ŋäthilina bala, ga nhenydja nhiniya dhiyala bäyma, ŋarra nhuŋu yurru ḻakaramana nhaltjan Godthu yawungu ḻakarama ŋarrakala nhokalaŋuwuy.”