3
Garray waŋana Djamiyulwala
3:1–21 (The Lord spoke to Samuel)
1 Djamiyulnydja yutjuwaḻaŋ'ka yana ḏarramu, märr‐wakinnha wal'ŋu gurrmulnha, yurru ŋayi yukurrana mukthurruna yana djäma yulŋunydja, Garraywu yana nhanŋuway djäma yukurrana, guŋga'yurruna yukurrana Yelaynha ŋunhili Godkala Buṉbuŋura. Ŋulinyaramirriyunydja waluyu God yukurranha ŋuli yakaŋga waŋanha guḻku'wala, ḻaka'‐ḻakaranha ŋayi yukurranha ŋuli waŋanha yolŋu'‐yulŋuwala märr‐ḻurrkun'kala yana, ga nhänha ŋuli walala yukurranha mel‐yurthinyaranydja märr‐waŋga'‐waŋganymirri.
2 Ŋulinyaramirriyuyi waluyu Yelaynydja wirrkina worruŋuthina, ga bambaynha nhinana yukurrana. Waŋganymirri munhaku Yelaynydja ŋorrana nhinana ŋunhala, ŋayipi gäna ŋorrana nhinana,
3 ga ŋayinydja Djamiyulnydja ŋorrana ga ŋunhili Godkala Buṉbuŋura, galki Dhawu'‐nherraṉminyarawuyŋura Bathiŋura. Ŋorrananydja maṉḏa yukurrana ŋunhili munhakuŋga yana, ga baḏayalany'tja yukurrana lanhdhirrany'tja nhärana mukthurruna.
4 Bala ŋayinydja marrtjina Godtja wäthurruna ŋurikiyi gurrmulwu ḏarramuwu, yäku ḻakaraŋala ŋanya “Djamiyul,” bitjarra.
Ga Djamiyulnydja buku‐wakmaraŋala waŋana bitjarra, “Gay! Nhäku nhe ḏukṯuktja?”
5 Ŋayinydja birrka'yurruna yanapi ŋayi Yelay, bala ŋayi ŋuliŋurunydja gaŋgathinana, bala ṉaŋ'thurruna bala Yelaywalana, bala waŋana bitjarra, “Dhuwala ŋarra. Nhe wäthurrunanydja ŋarraku.”
Ga ŋayi Yelaynydja waŋana buku‐ruŋinyamaraŋala nhanŋu bitjarra, “Yaka warray ŋarra nhuŋu wäthurruna,” bitjarra. “Gatjala balayi marrtjiya, ga yukirriya.” Bala ŋayi Djamiyulnydja balayi roŋiyina ŋorranharalili.
6-7 Ga biyapul Garray wäthurruna nhanŋu, yurru yaka ŋayi marŋginydja, bili yaka yukurranha ŋuli nhanukala ŋäthili Garray waŋanha. Bala ŋayi gaŋgathina, ga marrtjina balayi Yelaywala. Ŋayi waŋana bitjarra, “Nhe wäthurruna ŋarrakunydja. Dhuwalana ŋarra.” Ga Yelaynydja waŋana nhanukala, “Yaka ŋarra nhuŋu wäthurruna. Gatjala marrtjiya balayi.”
8 Ga biyapul ŋayi God wäthurruna nhanŋu Djamiyulwu, ga biyapul ŋayi gaŋgathina, ga balayi marrtjina withiyara Yelaynha, ga waŋana bitjarra, “Yuwalk muka nheŋga ŋarraku wäthurrunanydja. Dhuwalana ŋarra,” bitjarra. Ga yurruna Yelaynydja marŋgithina, ŋunhi ŋunhiyinydja ŋayipi Garray yukurrana wäthurruna nhanŋu ŋuriki gurrmulwu.
9 Bala ŋayi waŋana nhanukala ŋurikalayi Djamiyulwala bitjarra, “Gatjuy nhe yurru marrtjiya balayi yukurranharalili, ga ŋuli ŋayi yurru biyapulnydja nhuna yäku‐ḻakarama ga nhenydja yurru waŋiya biyaka, ‘Waŋiyana lili Garray. Ŋarranydja nhuŋu dhuwala djämamirri, ga buthuru‐witjun ŋarra yukurra nhuŋu.’ ” Ga bitjarra ŋayi yukurrana Yelay dhäruk‐wekaŋala Djamiyulwunydja, bala yana ŋayi Djamiyulnydja marrtjina balayi yukurranharawuna.
10 Ga biyapul Garraynydja yarrupthurruna, ga dhärrana nhanukala gali'lili, bala yäku‐lakaraŋalana wäthurruna nhanŋu, “Djamiyul, Djamiyul,” bitjarra. Ga ŋayinydja Djamiyulnydja waŋana buku‐ruŋiyinmaraŋala bitjarra, “Waŋiyana lili Garray. Ŋarranydja nhuŋu dhuwala djämamirri, ga buthuru‐witjun ŋarra yukurra nhuŋu.”
11-14 Ga Garrayyu ḻakaraŋala nhanŋu Djamiyulwu bitjarra, “Yelaywunydja ŋunha gäthu'mirriŋu maṉḏa wirrkina dhikana yätjnha maṉḏa, raypirri‐waḏatjnha maṉḏa; maṉḏa märr‐yätjkuŋala ŋarranha. Yelaynydja marŋgi maṉḏakalaŋuwu yätjku romgu ŋuriki, yurru yaka ŋayi yukurrana maṉḏanha guḻmaraŋalanydja, bala ŋarranydja yurru dhuwala bumana rakunygumana walalanha ŋunhi gäthu'mirriŋunha walalanha bukmakkumana yana, walala boŋguŋu murrmurryurrunydja.” Ga bitjarra yukurrana Garrayyu ḻakaraŋala Djamiyulwu, bala ŋayi marrtjina balayi.
15 Ga Djamiyulnydja mukthurruna yukurrana nhinana ŋunhili bili, yana liŋgu ga djaḏaw'yurruna, yurruna ŋayi gaŋgathinanydja ga ḻapmaraŋala ŋunhiyi Garraywu Buṉbu. Beyaṉiyina ŋayi märr bitjarra ya' Yelaywunydja ḻakaranharawu, nhä ŋunhi nhanŋu yukurrana Garrayyu ḻakaraŋala.
16 Yurru ŋayinydja Yelaynydja wäthurruna nhanŋu Djamiyulwu, ga Djamiyulnydja marrtjinana‐wala, ga waŋana bitjarra, “Gäy', dhuwala ŋarra,” bitjarra.
17 Ga Yelayyu waŋana dhä‐wirrka'yurruna bitjarra, “Nhä nhuŋu Garrayyunydja ḻakaraŋala? Ḻakaraŋa lili ŋarrakunydja? Bukmak yana ŋarraku ḻakaraŋanydja biyakana; yaka yana nhe yurru djuḻuḻ'maraŋa ŋula nhä bukmak.”
18 Bala ŋayi Djamiyulyunydja ḻakaraŋala bukmaknha nhä malanha ŋunhi, warrpam' yana ḻakaraŋala marrtjina ŋayi.
Ga Yelaynydja waŋana bitjarra, “Ŋayi muka ŋunhi God Garray wal'ŋu. Ŋayipina yurru djäma nhanŋuway ŋunhiyinydja, nhä ŋunhi ŋamakurru'.”
19-20 Yo, Djamiyulnydja ŋuthara wakindhina ḏarramuyinana wal'ŋu, ga Garraynydja ŋunhala galkina nhanukalana. Bukmakthu Yitjuralpuyŋuyunydja ŋäkula nhanukalaŋuwuy Djamiyulwalaŋuwuy, ga walalana ŋanya dharaŋaranydja ŋäkula, ŋunhi ŋayinydja dhäwu'‐ḻakaranharamirri Godku.
21 Ga Garraynydja yukurrana bitjarrana liŋguna maḻŋ'maranhamina ŋunhala Djälawnydja, ŋunhalayi liŋgu yana wäŋaŋura dharapulŋura ŋunhi ŋayi ŋäthili maḻŋ'maranhamina Djamiyulwala. Ga ŋunhi ŋayi yukurrana Djamiyul waŋananydja dhäruktja ga bukmaktthunydja yukurrana yana ŋäkulana ŋanya dhäruknha.