26
1 Ga yana liŋgu‐u‐u ga ŋula nhäthana gandarrkurruna wiripu‐guḻku'yuna ḏarramuwurruyu ḻakaraŋala Djolwa bitjarrana, “Daypit ga nhanŋu yolŋu'‐yulŋu ŋunha ya' djuḻu'‐djuḻuḻ'yun marrtji ŋunha ŋanhdharkŋura wäŋaŋura ŋayilpiŋura.”
2 Bala yuwalkthi Djolyunydja nhanŋuway garr'yurruna miriŋunha bala marrtjina dhawaṯthurrunana, ḻarruŋala Daypitkuna.
3-7 Daypitthunydja ŋäkula ŋunhi Djol yukurrana ḻarruŋala nhanŋu bunharawu, bala yana ŋulinyaramirriyu munhakuna ŋayi garr'yurruna nhanŋuway djämamirrinha ḏarramunha yäkunha Yapitjaynha, ga yana maṉḏa marrtjina yuḻwutjtjurrunana bala, yurru gurrum'nha bäymana dhika gayulnha, ŋulana bala yuḻwutjtjurrunanydja maṉḏa marrtjina‐a‐a Djolwalana wäŋakurru dhaḻakarr‐yarpuŋala, yana liŋgu‐u‐u ga ṉapuŋga' yana dhika ŋunhi ŋayipi Djol yukurrana ŋorrana ŋunhili. Nhanŋu garanydja yukurrana djingaryurruna munatha'ŋura galki ḻiyaŋura nhanukala, ga djäkamirri yolŋu yäku Yapana, walalanydja marrtjina ŋorra'‐ŋurrana rrambaŋi walala miriŋu nhanbala ŋunhi ḻiw'maraŋala ŋanya ŋunhi Djolnha gungaŋala.
8 Ŋayi Yapitjaynydja waŋana Daypitkala bitjarrana, “Wäy! Nhäŋa yakurrnha dhuwala ŋayi yulŋunydja. Godthunydja liŋguna wekaŋala nhokalana goŋlili. Ŋarra bumana ŋanya ŋi? . . . dhiyaŋuna nhanukiyingalana garayu?”
9-10 Ŋayi Daypittja waŋana bitjarra, “Yaka ŋanya wutthurra, liŋgu ŋayinydja dhuwala waṉa‐nherraṉara Godkuŋu; ŋayi yurru rakunydhirri Garraywala yana goŋdhu.
11 Ŋali maṉḏa yana djaw'yundja yurru dhuwala nhanŋu gara ga buthulu gapuwuy, bala marrtjina.”
12 Bala yana maṉḏa yuwalknha märraŋala ŋunhi garanydja ga buthulu gapuwuy, bala marrtjinana. Bäyŋuna ŋula yolthu nhäŋalanydja; warrpam'nha walala yakurrmirrina, liŋgu ŋayipi Garrayyu yakurr wekaŋala walalaŋgu, ŋonuŋ dhika yakurr.
13 Ga Daypit marrtjinanydja, ŋunhi märr‐barrkulili bitjarra ya' wiripuŋulilina gali'lili,
14 bala ŋayi ŋunhalanydja yatjurrunana yukurrana waŋanana. “Wäy Yapana! Ŋämaŋga nhe yukurra ŋarranha yulŋunydja?” bitjarra.
Yapananydja dhuwala djäkamirri ŋunhi Djolwu gaŋgathinanydja, bira'yurrunanydja ŋayi, bala dhä‐wirrka'yurruna bitjarrana, “Yol dhika yatjurrunanydja?”
15-16 Ga ŋayi Daypittja ŋulaŋurunydja waŋana, yatjurruna biyapul, “Wäy Yapana! Nhä dhuwali nhe ŋamakurru' djäkamirrinydja? . . . bay' yätj warray ŋiniya? Nhä warray ŋuli nhe yaka djäka dhiyaku giŋgu ŋamathaŋunydja? Be yol yolŋu marrtjina bala djuḏapthurruna giŋguna buŋgawawuna, ŋayi bini bunha ŋanya murrkay'thanhana. Wanhaka dhika Djolwu garanydja? Ga wanhakana dhika nhanŋu buthulu gapuwuynydja?”
17-20 Ŋayi Djolnydja bira'yurrunana, ŋäkulanydja ŋayi dharaŋara warray Daypitnha rirrakaynydja. Ŋayi gaŋgathinanydja, bala waŋana bitjarra, “Yol dhuwala nhe yolŋunydja? . . . ŋarraku gäthu? . . . Daypit?” bitjarra.
“Yo, yuwalk dhuwala,” bitjarra ŋayi Daypittja. “Nhäku dhuwala nhe ŋupandja‐dharra ŋarranha bunharawunydja? Nhä dhika ŋarra yätjtja djäma?”
21 Ga Djolnydja waŋana buku‐ruŋiyinmaraŋala, “Ŋarrapi dhuwala yätjthirri yukurra. Go ŋali roŋiyirrina. Yaka ŋarra nhuna yurru buma dhuwala, liŋgu nheŋga bini ŋarranha dharpunhanydja, yurru bäyŋu warray. Ŋarrapi yana yätjthinanydja.”
22-24 Ga ŋayi Daypittja buku‐ruŋiyinmaraŋala bitjarra, “Dhuwala nhuŋu garanydja ga gapuwuynydja buthulu. Djuy'yurrana lili balaŋu yolŋunhana, ŋayi märramana.”
25 Ga ŋayi Djolnydja waŋana Daypitkala bitjarra, “Godthu nhuna yurru guŋga'yundja bukmaklili nhälili malanyŋulili.”
Bala ŋuliŋuruyinydja Daypit marrtjina wiripulilina wäŋalili, bala ŋayi Djolnydja roŋiyina wäŋalili nhanukiyingalana.