23
Daypit djuḻuḻ'yurruna
23:14–29 (David and his men were hiding from Saul)
14-15 Daypittja djuḻuḻ'yurruna yukurrana nhinana ŋunhalana buku'‐wukumirriŋura wäŋaŋura dhika, ga bitjanana liŋgu ŋayi ŋuli Djolnydja ḏukṯukthinya yukurranha warrya'yuna nhanŋu bitjanana liŋguna, ḏukṯukthinya bunharawu nhanŋu murrkay'kunharawuna, yurru Godthunydja yakana Daypitnha goŋlili wekaŋala ŋurikala Djolwalanydja.
16 Ga Djonathan wiripunydja marrtjina ga bunana nhanŋu Daypitku, ga ganydjarr‐wekaŋala nhanŋu marrparaŋ'kuŋala ŋoy‐ḏälkuŋala bitjarra waŋana,
17 “Yaka barrariyanydja. Godthuna nhuna yukurra gunganhamirriyamanydja, märr yurru ŋarrakala bäpa'mirriŋuyu yaka nhuna maḻŋ'marama, ga baymatthun nhuna. Ŋarraku bäpa'mirriŋunydja marŋgina nhuŋu, ŋunhi nhe yurru buŋgawayirri nhanukala dharapullili wapthun.”
18 Ga biyapul maṉḏa dhawu'‐nherraṉmina, ŋunhi maṉḏa yurru bitjan liŋgu guŋga'yunmirri maṉḏanhay maṉḏa bala‐lili'yunmirri. Bala ŋayi Djonathandja marrtjina wäŋalilina roŋiyinana, ga Daypittja ŋunhala bäyma yukurrana nhinana ŋunhili wäŋaŋura.
19-20 Yurru wiripu‐guḻkuny'tja ḏarramuwurru marrtjina, ga ḻakaraŋala nhanŋu Djolwa, “Ŋunha Daypittja ya' nhina yukurra, ŋanapurru yurru nhuna guŋga'yundja, bala maḻŋ'maramana ŋanya.”
21-26 Yuwalkthi walala Djol ga ŋunhi ḏarramuwurru marrtjinana ḻarruŋala yukurrana Daypitkuna. Marrtjinanydja walala‐a‐a, galkina ŋunhilina ŋunhi wanhami yukurrana Daypit djuḻuḻ'yurruna, walala bini ŋanya mulkanha muka.
27 Yurru be yol bunana nhanŋu Djolwu, ga ḻakaraŋala bitjarra, “Go, waḏutja roŋiyiya. Ŋunha Bilitjiyapuyŋunydja marrtji yukurra lilina ya', walala yurru djaw'yun nhumalaŋgu wäŋana.”
28 Bala yana gatjpaḻ'yurrunana ŋayi Djolnydja, gonha'yurrunana Daypitnha, bitjarra bala ŋayi bilyurruna marililina Bilitjiyawuywuna marimirri marrtjina, ga yakana ŋayi biyapul ḻarruŋala Daypitkunydja.
29 Bala yana Daypitthunydja wäŋa ŋunhiyinydja gonha'yurruna, bala marrtjina wiripuŋulilina wäŋalili nhäyikayuna gam' Yingadililina wäŋalili, ga ŋunhalanydja ŋayi nhinanana yukurrana ga djuḻuḻ'yurruna yana yukurrana mathirraŋurana nhinana.