23
Garray dhuwala ŋilimurrumbala djäkamirri
23:1–6 (The Lord is my shepherd)
1 Garraynydja dhuwala djäkamirri ŋarraku,
ga ŋarranydja dhuwala balanyara bitjan wäyin bembi nhanŋu.
Ŋayi ŋuli yukurra ŋarraku dharray ḻatju'kuma,
yakana ŋarra yukurra nhina dhäpark ŋula nhämiriw.
2 Ŋayi ŋuli ŋarranha yorrkumanydja ḻatju'lili mulmulilinydja,
ga nhinanydja ŋarra ŋuli maranhuna yana;
Gämanydja ŋarranha ŋayi ŋuli wurrkurrum'lili gapulili,
wurkthundja ŋarra ŋuli, bala ŋoynydja yal'yunna.
3 Ŋunhi ŋarra ŋuli djawaryundja, ganydjarrmiriwyirrinydja,
ŋayinydja ŋarranha ŋuli ganydjarrmirriyamayi, buŋgaṯthunmaramayi yurru.
Gämanydja ŋayi ŋuli ŋarranha dhukarrkurrunydja dhunupa'kurru yana,
liŋgu yuwalk muka ŋayi ŋamakurru' djäkamirri.
4 Wiripunydja ŋarra ŋuli marrtji buku‐munha'kurru dhukarrkurru,
bitjan warraw'yu rakunydhinyaramirriyu ŋarranha ŋuli monyguma,
yurru ŋarranydja yurru yakana beyaṉiyirri ŋula nhäku,
bili nhena ŋuli Garray galki ŋarrakala bitjan liŋgu.
Nhenydja yukurra gäma dharpa wutthunarawu ŋula yolku miriŋuwu,
ga ŋarrakunydja nhe yukurra gäma wapitja weḻaŋ'thunarawu, ḻaw'maranharawu ŋarraku.
Ŋarra ŋuli marrtjinydja yukurra marrparaŋ'nha, beyaṉumiriwnha,
nhokalaynha yana djäkakurru' ga goŋgurru.
5 Nhe ŋuli ŋäthilimirriyama wäŋa ŋarraku ḻatju' dhika, ŋatha‐guḻku'mirri;
Miriŋuyu walalay ŋuli ŋarranha ḻiw'maramana djingaryun, ŋayan'mirrinydja walala,
yurru ŋarranydja ŋuli marrtji mukthunna ḻuka ŋathanydja ga gapunydja,
beyaṉumiriwnha dhika wal'ŋu.
Nhe ŋuli ŋarraku gumurr‐ŋamathirri marrkapthun manapan,
bitjanna bitjan galkiwuywu gurruṯu'mirriwu.
Ga ŋayaŋunydja ŋarraku ŋuli marrtji dhaŋaŋdhirri galŋa‐djulŋithinyarayunydja,
ŋanbaw'‐ŋanbawyunna marrtji ŋuli.
6 Yuwalk muka ŋayi yurru Garraynydja galki yana ŋarrakala,
bitjanna liŋgu nhanukalay märr‐ŋamathinyarayunydja ga ŋoy‐wuyunaramirriyunydja ŋarranha yurru yukurra gäma,
ga ŋarra boŋguŋu nhininydja dhiyaliyina Garraywala wäŋaŋuranydja,
biyakuna liŋguna, gupaḏalnha‐wala.