20
Ḻakarama yukurra Manatjawalaŋuwuy ŋunhi ŋayi mirithirrina wal'ŋu yätjnha yanana buŋgawa
20:1–11; 21:1–18 (Telling about King Hezekiah’s wicked son Manasseh)
20:1–3
Giŋ‐Yitjakanydja ŋunhi wirrkina dhika rirrikthurruna, ŋayi yurru galki rakunydhirrina, yurru ŋayi yukurrana dhika waŋana yulŋunydja bukumirriyaŋala, ŋäthinana marrtjina dhika, dhä‐ŋäŋ'thurrunana yukurrana wirrkina dhika. Ŋayi waŋananydja marrtjina bitjarrana dhä‐ŋäŋ'thurrunanydja, “God, guyaŋiya ŋarranha, ŋunhi ŋarra yukurrana djäma ŋamathaŋala yana yuwalkkuŋala nhuŋu, ga malthurruna nhuŋu yukurrana yuwalkkuŋala,” bitjarrana ŋayi yukurrana ŋunhi giŋdja ŋäŋ'thurruna Godnha.
4-11 Godthunydja ŋäkula ŋanya ŋunhi ŋäŋ'thunaranydja, ga buku‐ruŋiyinmaraŋalanydja ŋayi waŋana Yitjayawalaŋukurruna, bitjarrana gam' waŋana. “Ŋarra ŋäkula nhuna dhä‐ŋäŋ'thunaranydja, ga nhäŋala ŋarra nhuna ganurunydja. Ŋarra yurru nhuna ḏäwalakumana, ga nhe yurru nhinayi yukurra walŋayi 15 dhuŋgarra ŋupan, yurruna nhe yurru rakunydhirrinydja.”
Ga ŋayi Godthu walunydja balayi dhuḏi'yarrkmaraŋala, roŋiyinmaraŋalayi, märr‐gaŋga giṯmaraŋala, marŋgikuŋala ŋanya Yitjakayanha. Ga yuwalkthi dhika ŋayi ḏäwalathinanydja, yuwalknha wal'ŋu.