13
Ḻakarama yukurra wiripuŋunhana giŋnha buŋgawanha walalanha Yitjuralpuyŋuwu
13:1–25 (Telling about other kings of Israel)
13:1–9
Ga ŋulinyaramirriyunydjayi waluyu ŋunhala Yitjuralnydja Djiwayatjana giŋ yukurrana nhinana, ga ŋayinydja nhinana yukurrana buŋgawa Yitjuralpuyŋuwu ga 17 dhuŋgarra ŋupara, yurru ŋayi yukurrana djämanydja yätjnha ŋunhi malanha, ŋurru‐warryurruna yukurrana ŋayinydja Yitjuralpuyŋunhanydja ŋunhimalana yätjlilina wal'ŋu romlili, bitjarra yana liŋgu bitjarra ŋayi giŋ Djirapawumdhu ŋäthili ŋunhala. Yakana ŋayi ŋula ŋanydjaḻa'yurruna ŋulaŋuru nhanukiyingala yätjŋuru malaŋuŋuru romŋuru, bitjarrana liŋgu ŋayi ga nhanbala yolŋu'‐yulŋu yukurrana buku‐ŋal'yurrunanydja wiripuŋuwuna waŋarrwu malaŋuwu. Bala ŋayi Garraynydja wirrkina ŋaramurrthina walalaŋgu Yitjuralpuyŋuwunydja. Yo, bitjarrana liŋguna yukurrana ŋunhiliyi wäŋaŋura marina yukurrana marrtjina yana.
10-13 Ga ŋunhi ŋayi Djiwayatja rakunydhinana, bala nhanŋu gäthu'mirriŋunhana Djiwatjnha dharapullilinydja wapthurruna, yurru ŋayinydja ŋunhi yana balanyara liŋgu yätj yana, bitjan bäpa'mirriŋu nhanŋu. Ga ŋayinydja nhinana yukurrana buŋgawa ga 16 dhuŋgarra ŋupara.
14 Bala ŋayi Yelatjiyanydja, Godkunydja yolŋu rirrikthurrunana nhinana ŋorrana, galki ŋayi yurru rakunydhirrina. Bala ŋayi Giŋ Djiwatjtja bunanana, withiyarana ŋanya lili, gumurr‐watjmara ŋanya, ga waŋananydja ŋayi bitjarrana, “Bäpa ŋarraku, bäpa ŋarraku. Nhe yukurrana nhinananydja dhiyala Yitjuralpuyŋuwunydja bitjan nhe gunganharamirrina ŋanapurruŋgu.” Bitjarranydja ŋayi yukurrana waŋana ŋunhi ganurukurruna dhaḻakarrkurru.
15-19 Bala ŋayi Yelatjiyayunydja ḻakaraŋala nhanŋu ŋuriki giŋgu bitjarrana, “Nhenydja yurru dhuwala bitjanna bitjan bonarra' Garraywalanydja goŋŋura; ŋayi nhuna yurru gämanydja yukurra bunharawu ḏaḏawmaranharawu ŋuruku miriŋuwu Djiriyapuyŋuwunydja, märr yurru walala yakana djuḻkmarama Yitjuralpuyŋunhanydja.”
20 Ga ŋuliŋurunydja dhäŋuru Yelatjiya rakunydhinana, bala walala ŋanya moluliliyaŋalana rumbalnydja.
Bitjana liŋgu dhuŋgarra ŋupana yolŋu'‐yulŋu ŋulaŋuru bala Mawappuy miṯtji marrtjinya ŋuli bala Yitjurallili ŋathawuna mana'‐manaŋinyarawu, ga bitjanayi liŋgu walala ŋuli bunhayi yolŋunhanydja walalanha ŋunhala.
21 Waŋganymirriyunydja waluyu walala marrtji gäma yolŋunha rumbal bala molulili ŋunhi, ga ŋunhi walala nhämanydja ŋunhi yolŋu'‐yulŋunha Mawappuyŋunhanydja, walala marrtji lili wäŋgama, bala yana walala barrarirrina dhika wirrkina, bat‐gay ḏupthunna ŋunhi yolŋunhanydja rumbalnydja ŋunhimalana molulili ŋunhi wanhamala walala Yelatjiyanha marŋgitjkuŋala rumbal ŋäthili. Ga dhunupana yana ŋunhi rumbal rakunydja yolŋu ŋal'yun nhanukalana Yelatjiyawalana ŋarakalili, bala ŋayinydja marrtji ŋunhi rakunydja yolŋu ga biyapul dhärra walŋathirriyi dhuwala, bala marrtji wäŋalilina.
22-25 Bitjarrana liŋguna Djiriyapuyŋunydja miriŋu yukurrana yana mari‐wunanana Yitjuralpuyŋuwunydja, yurru Garraynydja wirrkina yukurrana dhika wuyurruna walalaŋgu, guŋga'yurrunana walalanha yukurrana, liŋgu ŋayi guyaŋina ŋunhiyi dhawu'‐nherraṉminyarawuy ŋunhi ŋayi ŋäthili nherrara Yipurayimgala ga Yitjakkala ga Djaykupkala; yakana ŋayi ŋula meṉguŋala nhanŋuwaynydja ŋayi ŋunhi miṯtjinha.
Yo, Djiwatj nhinana yukurrana giŋ Yitjuralpuyŋuwuna, ga ŋunhi ŋayi rakunydhinana, bala yana nhanŋu gäthu'mirriŋuna Djirapawum‐2‐na giŋdhina, dharapulŋura nhanukalanydja.