Ga ŋuliŋurunydja dhurrwaraŋuru ŋayi Djiyu marrtjina, ga bumara ŋunhi yätjnhana miyalknha Djitjapilnhana, ga bukmaknha yana ŋunhi *Wayapkuŋu guwar‐yalkthunaranhanydja, warrpam'nha yanana dhawar'maraŋalana, yakana ŋula waŋgany walŋathina. Ga bitjarrayi liŋgu ŋayi Djiyuyu bumarayi ḏalkarra'mirrinha walalanha yolŋu'‐yulŋunha ŋunhi walala yukurranha ŋuli buku‐ŋal'yuna †Bälwu, ga bumarana ŋayi marrtjina biḏiwiḏitjkuŋalana bukmaknha ŋunhi buku‐ŋal'yunaramirrinydja malanha wäŋa, ŋunhi walala ŋuli marrtjinya buku‐ŋal'yuna Bälwu walalaŋgu; yakana yukurrana biyapulnydja yolŋu'‐yulŋu buku‐ŋal'yurruna ŋurikiyi Bälwunydja waŋarrwu ŋunhala Yitjuralnydja. Yurru ŋayi Djiyu yukurrana yaka yuwalkkuŋalanydja wal'ŋu malthurruna nhanukalay ŋayi ŋayaŋuyu Garraywunydja, bala yakana ŋayi baḏuwaḏuyurruna ŋunhi garwarrwarrny'tja maṉḏanha wal'ŋu buliki' waŋarr, ŋunhi goŋbuy djämawuy walalaŋguŋu, ŋunhi ŋayi be ŋäthili ‡Djirapawumdhu nherrara ŋunhimala, ŋunhi ŋayi ŋäthili ŋurruthaŋala giŋdhina Yitjuralpuyŋuwu.

Yo, Djiyunydja yukurrana nhinana giŋ Yitjuralpuyŋuwunydja 28 dhuŋgarra ŋupara, bala yana ŋayi rakunydhinana. Ga ŋulaŋurunydja dhäŋuru gäthu'mirriŋuna nhanŋu §Djiwayatjana wapthurruna dharapullili nhanukala.