19
God waŋana Yelatjawala ŋunhala wäŋaŋura Djäniya yäkuŋura
19:1–18 (Elijah on Mount Sinai)
1 Ŋunhi ŋayi Wayap ŋunhalana liŋguna bunanana Djitjarilnha wäŋaŋura, ga ḻakaraŋalanydja ŋayi nhanukalaŋuwa miyalkpa Djitjapilwanydja, ŋunhi nhaltjarra yukurrana Yelatjayu ŋunhala, ga nhaltjarra ŋayi yukurrana ŋunhi bumara Bälwu dhäwu'‐gänharamirrinha walalanha.
2 Djitjapilnydja bena dhikana maḏakarritjthina, bala ŋayi waŋananydja bitjarrana, “Ŋarranydja yurru bumana ŋanya. Goḏarrny'tja ŋayi boŋguŋu rakunynha.”
3 Yelatjayunydja ŋäkula ŋunhiyi, bala ŋayi barrarinana, bala ṉaŋ'thurrunana, walŋana‐djaw'yunmina ŋanyapinyay ŋayi. Garr'yurruna ŋayi nhanŋuway djämamirrinha, bala waṉḏinana nhinana‐a‐a, yana liŋgu ga bur‐way bunana ŋunhala Biratjipa wäŋaŋura. Ga waŋana ŋayi ŋunhalanydja nhanukalaŋuwala ḻundu'mirriŋuwala bitjarra, “Dhiyala nhenydja yurru nhiniya.”
4 Ga ŋayi Yelatjanydja mukthurrunana nhinana bala marrtjina ŋunhana‐wala ŋanhdharklilina wäŋalili. Marrtjina ŋayi nhinana bala‐a‐a, guḻ ŋayi, dhuṯ nhinana dharpalilina, ga waŋana ŋayi bitjarra, “Garray, ŋarranydja ḏukṯuk, ŋarra yurru rakunydhirrina. Nhäku yurru ŋarra nhina yukurra walŋanydja yana?”
5 Bala ŋayi ŋorranana, bala yakurrnha nhanŋu bunana. Bala ŋayi ŋuliŋurunydja dhäŋuru djiwarr'wuynha dhika yolŋu bur‐way bunana nhanŋu, ga dhirr'yurruna ŋanya mulkana. “Yi' yi'! Gaŋgathiyana, ga ḻukiyana,” bitjarra.
6 Ŋayi Yelatjanydja gaŋgathina, ga nhäŋa'‐nhaŋala ḻiw'maraŋala, dharr‐way nhäŋala ŋatha ga gapu. Ḻukananydja ŋayi, ga balayi yukurrana.
7 Ga biyapul djiwarr'wuy yolŋu bunana nhanŋu, ga dhirryurruna waŋana ŋanya, “Gaŋgathiyana, ga ḻukiyana ŋathana, liŋgu nhe yurru dhuwala weyin marrtji bala.”
8 Bala Yelatjayu ḻukana ŋathanydja ŋunhiyi, ga ŋarkula wurkthurruna, ga ŋuriŋinydja ganydjarrmirriyaŋala ŋanya marrtjinyarawuna walu‐ŋupanarawuna, ga 40‐na walunydja ŋayi warr'‐warryurruna marrtjinanydja nhinana bala, yana liŋgu‐u‐u, mulkana ŋunhi wäŋa buku Djäniyawuy.
9 Ga ŋunhalanydja ŋayi marrtjina bala, ga gärrina mathirralilina, ga ḏo'‐way ŋorrana.
Bala yana Garraynha bunana nhanŋu ga waŋana bitjarrana, “Yelatja gay. Nhäkuŋga dhuwala nhe dhiyalaŋuminydja?”
10 Ga ŋayi Yelatjanydja buku‐ruŋiyinmaraŋala waŋana, “Garray, ŋarranydja dhuwalanydja ŋarrapina waŋganynha nhuŋunydja. Bitjanna liŋgu ŋarrapi ŋuli warkthunnanydja nhuŋuway yana waŋganygu, liŋgu dhiyaŋunydja ŋunhi yolŋu'‐yulŋuyu ŋuli Yitjuralpuyŋuyunydja bak‐bakmaranha yukurranha nhuŋu dhäruknha, yakana walala malthurruna nhuŋuway dhärukku. Walala bak‐bakmaraŋala nhuŋu ŋunhi buku‐ŋal'yunaramirrinydja wäŋa malanha, ga bumarana walala liŋguna nhuŋu dhäwu'‐gänharamirrinhanydja walalanha. Ŋarrapina dhuwala waŋganynha walŋanydja, ga walala yukurra dhuwala ŋupanna ŋarranha, bumana walala yurru ŋarranha rakunygumana.”
11 Ga Godthu waŋana ŋanya bitjarra, “Dhawaṯthurrana nhe yurru dhipuŋuru warraŋullilina, ga dhärriya ŋunha bukulili ya', liŋgu ŋayi yurru Garraynydja ḻäy‐yuḻkmarama marrtji.” Dhunupa ŋayi wata bo'yurruna ŋutu'na dhika bäymana, ga guṉḏanydja dhika barr'‐barryurrunana marrtjina, yurru ŋayipinydja Garraynydja yaka ŋunhiliŋumi wataŋura. Watanydja liŋgu ḏaḏawyurruna bo'yunaraŋuru, bala yukurrana gur'kuryurruna wäŋana, yurru ŋayinydja Garraynydja yaka ŋunhiliŋumi gur'kuryunaraŋura.
12 Ga dhawar'yurruna gur'kuryunaraŋuru gurthana marrtjina ŋutu'na dhika, yurru ŋayipinydja Garraynydja yakana ŋunhiliŋumi gurthaŋura. Ga dhäŋuru ŋuliŋurunydja gurthaŋurunydja, ŋäkula rirrakaynha dhika, giyalkiyalnha rirrakay.
13 Ŋunhi ŋayi Yelatjayu ŋäkulanydja, bala marŋgithinana ŋayi ŋunhiyinydja, bala ŋayi dhawaṯthurrunana yana ŋuliŋuru mathirraŋurunydja, bala ŋayi dhärrana dhurrwaralilina mathirralili. Ga ŋunhiyi rirrakaynydja waŋana nhanŋu Yelatjawu bitjarra, “Yelatja, nhäkuŋga dhuwala nhe dhiyalaŋuminydja?”
14 Ga Yelatjanydja waŋana bitjarra, “Ŋarranydja dhuwalanydja ŋarrapina waŋganynha nhuŋunydja. Bukmakthunydja yolŋuyu walalay liŋguna gonha'yurruna nhuna, ga dhuwalanydja walala yukurra ḏukṯukthirri ŋarraku bunharawuna.”
15 Ga Garraynydja waŋana nhanŋu, “Gatju roŋiyiyayi, ga bitjan nhe yurru yulŋunydja. Biḏi'yurra ḻiya‐ḻupmaraŋa weyika'yu Yitjalnha ga ŋayina yurru buŋgawayirri Djiriyawuyŋuwunydja,
16 ga biyakayi liŋgu ḻiya‐ḻupmaraŋa Djiyunhanydja, ga ŋayinydja yurru buŋgawayirri Yitjuralpuyŋuwu. Ga biyakayi liŋgu ḻiya‐ḻupmaraŋa weyika'yu Yelatjiyanhanydja, liŋgu ŋayinydja yurru dhäwu'‐gänharamirri nhokalana dharapulŋura.
17-18 Yaka warwuyurranydja ga galyurranydja. Ŋunha Yitjuralnydja guḻkuŋ'ka yukurra yolŋu walala ŋarraku buku‐ŋal'yun; yaka walala ŋula bilyurruna, ga wekanharamina walalanhawuy walala Bälwala.” Bitjarranydja waŋana yukurrana Garray Yelatjawala, ga dhunupa ŋayinydja gaŋgathina Yelatjanydja bala yana marrtjina, bala yana marrtjina roŋiyinana wäŋalili Damatjkalilina.
Yelatjiyayu djarr'yurruna ŋunhi ŋayi yurru Yelatjawuna malthunaramirri
19:19–21 (The call of Elisha)
19 Yo, ŋayi Yelatjayunydja gonha'yunna ŋunhi bukunydja wäŋa, bala yana marrtjinana nhinana bala, marrtjinanydja nhinana bala ŋayi ŋunhi gatjaḻ‐ŋuparana‐a‐a, bala ŋayi Yelatjayu dharr‐way nhäma Yelatjiyanhana, ŋayi marrtji munatha' bala buma, buliki'yu marrtji bala warryundja. Ŋayi Yelatjanydja djar'tjaryunna nhina lili‐i‐i, withiyanna ŋanya galkithirrinydja, bala yupmarama ŋayi girri'na nhanukiyingala rumbalŋuruna, bala nhanukalana nherraṉ Yelatjiyawalana, bala yärayi djar'tjaryun.
20 Dhunupa ŋayi Yelatjiyayunydja gonha'yunna wäyinnhanydja, bala ṉaŋ'‐ṉaŋdhunna nhina bala ŋupanna Yelatjanhana, ga waŋanydja ŋayi nhanukala bitjan, “Ŋarranydja yurru dhuwala malthun nhuŋuna. Ŋarra ŋathili balayi roŋiyirrinydja ŋi', ŋäṉḏiwala ga mäḻu'wala, waŋa maṉḏanha, bala ŋarra yurru malthun nhuŋuna.”
Ga ŋayi Yelatjanydja waŋana bitjarra, “Manymak, nhokiyingala warrpam'. Yaka ŋarra nhuna yukurra ḏaḏawmarama.”
21 Dhunupa ŋayi Yelatjiyayunydja marrtjinana bala, ga dhunupa wutthurruna ŋunhi wäyinnhanydja nhanbalayi buliki'nhanydja, bala batharana, liŋgu ŋunhinydja djäma nhanŋu liŋguna dhawar'yurrunana. Walala ḻukanana wäyindja, bala yana malthurruna ŋayinydja Yelatjawana, ŋayi yurru nhanŋuna guŋga'yunaramirri.