12
Yitjuralnydja ga Djudanydja barrkuwatjkunhaminana, yakana biyapulnydja walala yukurrana nhinana waŋganygalaŋumirrinydja buŋgawawalaŋumirri
12:1–33 (Israel and Judah separated, no longer were they ruled by one king)
1-4 Ŋuliŋurunydja dhurrwaraŋuru Djalamangala gäthu'mirriŋuyu ḏarramuyu ŋuriŋi Riyapalamdhu ḻuŋ'maraŋalana bukmaknha bäpurru'nha Yitjuralpuyŋunha ŋunhi, ŋunhinha walalanha ŋunhi walala yukurrana nhinana ŋunhala bala ḻuŋgurrmaŋura gali'ŋura, walala marrtjinanydja ŋunhamala Djikamlili wäŋalili buŋgawakunharawuna nhanŋu Riyapalamgu. Yurru ŋunhi yolŋu'‐yulŋunydja malanydja waŋana dhä‐wirrka'yurrunana ŋanya bitjarra, “Nhokala bäpa'mirriŋuyunydja Djalamandhunydja yukurranha ŋuli ŋanapurrunha wirrki warray gur'kuryuna. Ŋuli nhenydja yurru ŋanapurrunha gäma ŋamathama, ga yakana biyakayi nhenydja yurru garrpila ŋanapurrunha yukirriya rom‐ḏälyunydja romdhu nhokalay, ŋunhinydja bitjan ŋanapurrunydja yurru nhuŋuna yolŋu'‐yulŋu miṯtji, ga nhenydja yurru ŋanapurruŋgu buŋgawana.”
5 Ga ŋayinydja Riyapalamdhunydja yakayi buku‐ruŋiyinmaraŋala waḏutjanydja‐wala dhäruk walalaŋgu, yana ŋayi waŋana bitjarra walalaŋgala, “Roŋi'‐ruŋiyi nhuma boŋguŋu lilinydja gonha ŋayi boŋguŋu ḻurrkun' walu djuḻkthurru.”
6 Ga ŋuliŋurunydja dhurrwaraŋuru ŋayi Riyapalam waŋana ḏilkurruwurruŋgalana yolŋu'‐yulŋuwala bijtarrana, “Nhaltjan dhika ŋarra yurru waŋa dhiyakalanydja walalaŋgala yolŋu'‐yulŋuwala gay'?”
7 Ga walalanydja ḏilkurruwurrunydja ŋunhi ŋaḻapaḻmirrinydja waŋana, “Djäka walalaŋgu nhe yurru ŋamathaŋa yukirriya, ga walalanydja yurru nhuŋunydja märr‐ŋal'yun yukurra, bala djäma nhuŋu ŋamathamana yurru yukurra yana.”
8-9 Yurru ŋayinydja ŋunhi Riyapalamdja yaka galŋa‐ŋamathina ŋuriŋi walalaŋgala dhärukthu malaŋuyu, bala ŋayi marrtjina bala bunana yuḏayuḏawana yawirriny'pa, ga waŋana ŋayi bitjarra yana liŋgu walalaŋgalanydja, “Nhaltjan ŋarra yurru ŋurukalanydja walalaŋgala yolŋu'‐yulŋuwala waŋa?”
10-11 Ga walalanydja ŋunhi yawirriny'tja waŋana bitjarra nhanukala, “Ḻakaraŋa walalambala biyakana ŋe', ‘Ŋarrakala bäpayunydja ŋuli gur'kuryuna nhumalanha märr‐gaŋga warray, yurru ŋarranydja yurru dhiyaŋunydja‐wala ga wirrkina wal'ŋu nhumalaŋgu rom‐nherraṉ ḏälnha.’ ”
12-15 Bala ŋayi Riyapalamdhunydja märraŋalana ŋunhiyi walalanha dhäruk, bala yana ŋayi waŋanana ŋurikala yolŋu'‐yulŋuwala bitjarra yana liŋgu ŋunhi nhaltjarra yukurrana ŋuriŋiyi yawirriny'thu gur'kuryurruna ŋanya waŋana.
16 Ga ŋunhi walala yolŋu'‐yulŋuyunydja ŋuriŋi nhäŋala dharaŋarana ŋunhi yuṯanhanydja buŋgawanha, ŋunhi ŋayi yurru yaka warray mäkiri'‐witjundja walalaŋgu, ga yaka warray ŋamathamanydja yukurra yurru ḏälkuma walalanha, bala walala waŋanana gay, yaka'yurrunana bitjarrana gam', “Yakana ŋanapurru nhuŋu ḏukṯuk, yakana yurru ŋula yol ŋulaŋuru Daypitkala yarraṯaŋuru ŋanapurruŋgu buŋgawayirri. Gul' ŋilimurru Yitjuralpuyŋunydja marrtji wäŋalilina go. Ŋilimurru yurru maḻŋ'marama ŋilimurruŋguwaynha gänana buŋgawanha.”
17-19 Bala yana ŋunhi yolŋunydja walala miṯtji Yitjuralpuyŋunydja marrtjinana, gonha'yurrunana ŋanya Riyapalamnhanydja, yakana ŋayi biyapulnydja walalaŋgu buŋgawa; ŋayi yukurra yurru dharraynydja ŋurikina liŋgu yolŋu'‐yulŋuwunydja bäpurru'wu Djudawuna waŋganyguna. Yo, ŋayi Riyapalam waṉḏinanydja balayi Djurutjalamliliyi beyaṉiyina, märr yurru walala yaka ŋanya buma rakunyguma.
20 Ga walalanydja Yitjuralpuyŋuyunydja miṯtjiyu djarr'yurruna Djirapawumnhana, liŋgu ŋayinydja ŋunhi roŋiyina ŋulaŋuru Yetjipŋuru, ga ŋayina yurru walalaŋgu buŋgawa Yitjuralpuyŋuwunydja, ga ŋunhina liŋguna miṯtji bäpurru' Djudana goŋŋura ŋurikalanydja ŋunhi walala mala‐wunhara ŋulaŋuru Daypitkala.
26-27 Yurru Djirapawumdja ŋunhi yakana ŋamakurru' buŋgawa Yitjuralpuyŋuwunydja bäpurru'wu. Ŋayinydja waŋana nhanukalaŋuwalanydja miṯtjiwala bitjarrana, “Ŋuli ŋarrakunydja yolŋu'‐yulŋu mala marrtji ŋuli bala Djurutjalamlilinydja buku‐ŋal'yunarawu Garraywunydja ŋunhala Godkalanydja Buṉbuŋura, mak walalanydja ŋuli gonha'yurruna ŋarranha ŋiniya? . . . ga djarr'yurru ŋanyana Riyapalamnhana, Djudawuna bäpurru'wu giŋnha. Mak walala ŋuli ŋarranha baymatthurruna.”
28 Bala ŋayinydja marrtjina Djirapawumdhunydja djäma märrma' rumbal‐wäyindhinyara garwarrwarr', bala yana waŋana ŋurikala nhanukalaŋuwala yolŋu'‐yulŋuwalanydja bitjarrana, “Djurutjalamdja ŋunha barrkuna bena‐wala wäŋa! Yakana balayinydja marrtjiya buku‐ŋal'yunarawu! Dhuwalana gay' nhumalaŋgu waŋarrnydja, ŋunhi ŋayi dhawaṯmaraŋala nhumalanha ŋulaŋuru Yetjipŋuru.”
29 Yo, ŋayi nherrara waŋgany nhäyikayunydja Bithullilinydja ga wiripunydja ŋayi nherrara ŋunha Dänlili, ŋunha bala buku ḻuŋgurrmalili. Ga waŋananydja ŋayi bitjarrana gam', “Dhipalana nhuma yurru marrtji, ga buku‐ŋal'yundja nhuma yurru dhiyakuna gay' waŋarrwu.”
30-33 Ga bitjarrayi liŋgu ŋayi djarr'yurruna ḏalkarra'mirrinhanydja walalanha, wiripuŋunha warray walalanha ŋunhi walala yaka warray wal'ŋu Lepaywala yarraṯaŋuru. Yo, bitjanana liŋguna walala ŋuli yukurranha marrtjinyanydja lili dhipalayi wäŋalili ga bathana mundhurrnydja buku‐ŋal'yuna ŋurikiyinydjayi waŋarrwu wäyingunydja; yakana biyapulnydja ŋuli Yitjuralpuyŋu yolŋu walala marrtjinya Djurutjalamlilinydja wäŋalili buku‐ŋal'yunarawu yuwalkŋuwunydja wal'ŋu Godku.